ՄԱՐԶԱԿԱՆ ՊԱՐԱԳԱՆԵՐ՝ ՔԱՐՎԱՃԱՌԻ ԽԱՌԸ ՄԵՆԱՄԱՐՏԵՐԻ ԱԿՈՒՄԲԻՆ
Թամար ԳՐԻԳՈՐՅԱՆ
ք. Քարվաճառ
Օրերս ԱՀ Շահումյանի շրջանի Քարվաճառ շրջկենտրոնում գործող ՙԽաչեն՚ մարզադպրոց էին այցելել Արցախի խառը մենամարտերի (MMA) ֆեդերացիայի ներկայացուցիչներ՝ ֆեդերացիայի նախագահ Գարեգին Աղաբալյանի գլխավորությամբ։
Այցելության նպատակը մարզադպրոցում գործող Խառը մենամարտերի ակումբին (MMA) մարզագույք նվիրաբերելն էր։
Ինչպես մեզ հետ զրույցում նշեց Արցախի մարտարվեստների ասոցիացիայի նախագահ, Արցախի խառը մենամարտերի (MMA) ֆեդերացիայի նախագահ և Արցախի MMA-ի հավաքականի երիտասարդների և մեծահասակների հավաքականի գլխավոր մարզիչ Գարեգին Աղաբալյանը, ասոցիացիայի առաջնահերթություններից է շրջաններում մարզաձևերի զարգացմանն աջակցելը, սպորտային խմբակներն ավելացնելը՝ դրանով նպաստելով առողջ ապրելակերպի տարածմանը։
ՙՇահումյանի շրջանում ունենք խառը մենամարտեր պարապող մոտ 72 սան, Քարվաճառում՝ մոտ 40 մարզիկ, Նոր Բրաջուր համայնքում ունենք երկու խումբ, շրջանում ընդհանուր առմամբ այդ սպորտաձևով զբաղվում է 70-ից ավելի մարզիկ՚,- նշեց մեր զրուցակիցը։
Մարզագույքը Քարվաճառի ակումբին է տրամադրվել ռուսաստանաբնակ Միսակ և Արսեն Խիդիրյան եղբայրների նվիրատվության շնորհիվ։
Հետագայում նախատեսվում է մարզական գույք տրամադրել նաև Նոր Բրաջուր համայնքին։
Արցախի մարտարվեստների ասոցիացիայի մեջ ընդգրկված երկու մարզաձևերի՝ Մուայ-թայի և խառը մենամարտերի խմբակներ գործում են Արցախի տարբեր համայնքներում։ ՙՄասնավորապես, MMA-ի խմբակներ ունենք Շահումյանի շրջանում, Ասկերանի շրջանի Այգեստան համայնքում, ինչպես նաև՝ բազմաթիվ խմբակներ Ստեփանակերտ քաղաքում։ Մուայ-թայ սպորտաձևի խմբակներ ունենք Ասկերան, Շուշի և Ստեփանակերտ քաղաքներում՚,- տեղեկացրեց ասոցիացիայի նախագահը։
Խոսելով առաջիկա ծրագրերից՝ Գ. Աղաբալյանն ընդգծեց, որ չնայած համավարակը խանգարել է տարվա հիմնական պլանով առաջ շարժվելուն, այնուամենայնիվ, առաջիկայում նախատեսվում է Ստեփանակերտում անցկացնել երիտասարդների ու մեծահասակների ուսումնամարզական հավաք։ ՙԱյս հավաքը կկազմակերպվի Հայաստանի Հանրապետության առաջնության նախաշեմին։ Կախված իրավիճակից՝ հնարավոր է նաև, որ կազմակերպվի Հայաստանի առաջնություն Երևանում, որին կմասնակցեն նաև մեր մարզիկները՚։
Խառը մենամարտերի Քարվաճառի ակումբի մարզիչ Աղվան Գևորգյանը շնորհակալություն հայտնեց նվիրատվության համար՝ նշելով, որ մարզագույքն առավել արդյունավետ պարապելու հնարավորություն կտա, ինչի արդյունքում էլ Քարվաճառի մարզիկները նոր հաղթանակներ կունենան։
;