ԱՐՑԱԽՑԻ ԳՐՈՍՄԱՅՍՏԵՐԸ 2-ՐԴ ՏԱՐԻՆ ԱՆԸՆԴՄԵՋ ԴԱՐՁԵԼ Է ՀԱՅԱՍՏԱՆՈՒՄ ԱՆՑԿԱՑՎՈՂ ՀՈՒՇԱՄՐՑԱՇԱՐԻ ՀԱՂԹՈՂ
Վան Նովիկով
Երևանի Շախմատի ակադեմիայում հունվարի 17-ին եզրափակվել է Անդրանիկ Մարգարյանի անվան շախմատային 11-րդ հուշամրցաշարը։
Մրցանակային՝ 1500 դոլար կազմող հիմնադրամով, ստուգատեսի գլխավոր մրցաշարում խաղարկվող 3 մրցանակները վիճարկում էին 4 երկրի 10 ուժեղագույն շախմատիստներ։ Հուշամրցաշարի շրջանակներում անցկացվում էին շվեյցարական և շրջանային մրցաշարեր։ Շվեյցարական միջազգային մրցաշարում հանդես էին գալիս 10 երիտասարդ շախմատիստներ՝ Հայաստանից, Ռուսաստանից, Բելառուսից և Իրանից։ Հայաստանը ներկայացնող արցախցի գրոսմայստեր Հովիկ Հայրապետյանը երկրորդ տարին անընդմեջ նվաճեց հուշամրցաշարի հաղթողի տիտղոսը։ Վճռորոշ եզրափակիչ տուրում Հովիկ Հայրապետյան - Լևոն Բաբուջյան պարտիայի համառ մրցապայքարը 81 -րդ քայլում ավարտվեց ոչ-ոքի արդյունքով։ Այսպիսով՝ Հ. Հայապետյանը 9 հնարավորից վաստակելով 7 միավոր, նվաճեց գլխավոր մրցանակը։ Հուշամրցաշարի երկրորդ և երրորդ տեղերը՝ 6-ական միավորով, միմյանց հետ կիսեցին Ռուսաստանից Սերգեյ Լոբանովը և Լևոն Բաբուջյանը։
Հավելենք, որ արցախցի գրոսմայստեր Հովիկ Հայրապետյանը հուշամրցաշարի մրցանակների է արժանացել՝ 2020 և 2021թվականներին՝ 1-ին տեղ, 2012, 2015, 2017թվականերին՝ 2-րդ տեղ, ինչպես նաև 2014-ին՝ 3-րդ տեղ։