ՄԱՐՏՈՒՆԻՈՒՄ ԱՆՑԿԱՑՎԵՑ ԱԶԱՏ ՈՃԻ ԸՄԲՇԱՄԱՐՏԻ ԱՌԱՋՆՈՒԹՅՈՒՆ
Նարինե ՀԱՅՐԱՊԵՏՅԱՆ
Մարտի 5-7-ը Մարտունու մանկապատանեկան մարզադպրոցում անց է կացվել ազատ ոճի ըմբշամարտի Արցախի Հանրապետության առաջնությունը, որը կազմակերպել է ԱՀ կրթության, գիտության, մշակույթի և սպորտի նախարարությունը։ Առաջնության անցկացման նպատակը հանրապետությունում ազատ ոճի ըմբշամարտի մասսայականացմանն ու զարգացմանը նպաստելն է, պատանի ըմբիշների վարպետության բարձրացումը։
Առաջնությանը մասնակցել է ՙՆերքին Հոռաթաղ՚, ՙԳանձասար՚, ՙՄարտունի՚, ՙՄարտակերտ՚, ՙՍտեփանակերտ՚, ՙՍտեփանակերտ-2՚, ՙՃարտար՚, ՙԱսկերան՚ թիմերի 123 մարզիկ։
Շրջվարչակազմի ղեկավար Էդիկ Ավանեսյանն աաջնության բացման ելույթի իր խոսքում կարևորել է սպորտի դերն ու նշանակությունը հասարակության շրջանում, մարզիկներին շնորհավորել է ազատ ոճի ըմբշամարտի ԱՀ առաջնության մեկնարկի կապակցությամբ և մաղթել հաջողություն։
Առաջնությունն անց է կացվել օլիմպիական եղանակով՝ 12 քաշային կարգում։ Առանձին քաշային կարգերում 1-ին, 2-րդ, 3-րդ տեղեր գրաված մարզիկները կպարգևատրվեն նախարարության պատվոգրերով, մեդալներով և դրամական պարգևով։
Լավագույն մարզիկները կընդգրկվեն Արցախի հավաքականի կազմում և ապրիլին կմասնակցեն ազատ ոճի ըմբշամարտի Հայաստանի առաջնությանը։