ՎԱՐԿԵՐԻ ՄԱՐՈՒՄԸ՝ ԿԱՐԵՎՈՐ ՊԱՅՄԱՆ
Դեկտեմբերի 27-ին տեղի ունեցավ Հադրութի շրջանային խորհրդի տարեվերջյան նիստը, որի օրակարգում ընդգրկված հարցերը տարաբնույթ էին:
Վարչակազմի աշխատակազմի ԳՀՀ բաժնի վարիչ Ստեփան Հակոբյանը հանգամանալից ներկայացրեց 2017 թվականի բերքի տակ իրականացված աշնանացանի և մկնանման կրծողների դեմ տարվող պայքարի համար աշխատանքների ընթացքը: Ըստ բանախոսի՝ . դեկտեմբերի 25-ի դրությամբ շրջանում կատարվել է 9500 հա աշնանացան մշակաբույսերի ցանքս, որից 2650 հա ցորեն, 6850 հա՝ գարի: Կատարված ցանքսերից 1750 հա ցանվել է հոկտեմբերին և գտնվում է լավ վիճակում, 3490 հա՝ նոյեմբեր ամսին, 4260 հա՝ դեկտեմբերին, որոնց ներկայիս վիճակի վերաբերյալ բաժնի վարիչը դժվարացավ որևէ գնահատական տալ։ Մկնանման կրծողների դեմ պայքար է տարվել շուրջ 2800 հա տարածքի վրա։ Առկա իրավիճակը, Ս. Հակոբյանի խոսքով, ցույց է տալիս, որ պայքարի աշխատանքները պետք է շարունակել:
Վարչակազմի ղեկավար Վալերի Գևորգյանը հորդորեց համայնքների ղեկավարներին հողօգտագործողների շրջանում բացատրական աշխատանքներ տանել՝ կրծողների դեմ պայքարը շարունակելու համար: Բացի այդ, նա առաջարկեց գարնանը հացահատիկային ցանքսերը սնուցել, որպեսզի նորմալ բերք ստանան:
Քննարկման թեմա դարձավ ձմեռային առաջին զորակոչի հետ կապված հարցը, ինչի կապակցությամբ շրջվարչակազմի ղեկավարը համայնքապետերին կոչ արեց աջակցել զորակոչիկներին՝ շրջանային զինկոմիսարիատ ներկայանալու համար:
ԼՂՀ ԱՎԾ աշխատակազմի Հադրութի շրջանային բաժնի պետ Արթուր Սարգսյանը ներկայացրեց ՙՀադրութի շրջանի բնակավայրերում 2017 թ. հունվարի 1-ի դրությամբ բնակչության սեռատարիքային կազմի ճշտման նախապատրաստական աշխատանքների մասին՚ և ՙՀադրութի շրջանի բնակավայրերում 2017 թ. հունվարի 1-ի դրությամբ անասնագլխաքանակի համատարած հաշվառում անցկացնելու նախապատրաստական աշխատանքների մասին՚ հարցերը:
ՙԵնթաշրջանային ծրագրերի շրջանակում տրամադրված վարկերի մարման գործընթացի մասին՚ օրակարգային հերթական հարցը ներկայացրեց վարչակազմի աշխատակազմի ղեկավար Վարդան Գասպարյանը: Նրա հավաստմամբ՝ շրջանում 2009 թվականից մինչև 2013 թվականը գործել են Բանաձորի ենթաշրջանի, իսկ 2012 թվականի հունվարի 1-ից և 2013 թվականի հունվարի 1-ից՝ Ուխտաձորի և Տողի ենթաշրջանների համայնքների զարգացման ծրագրերը: Նշված ծրագրերով համայնքների բնակիչներին տրամադրվել են փոխառություններ անասնապահության զարգացման և գյուղտեխնիկա ձեռք բերելու համար: 2016 թ. դեկտեմբերի 1-ի դրությամբ այդ նպատակին հատկացվել է 291,5 մլն դրամ, որից 253,5 մլն դրամը՝ անասնապահության զարգացման, 38մլն դրամը՝ գյուղտեխնիկա ձեռք բերելու համար։ Անասնապահության զարգացման համար տրամադրված փոխառությունների մնացորդը կազմել է 104 մլն 363 հազար դրամ:
Վ. Գասպարյանը մանրամասն ներկայացրեց ենթաշրջանների զարգացման ծրագրերի ողջ գործընթացը և առաջացած պարտքերի պատճառները:
Քննարկվող հարցի վերաբերյալ իր նկատառումներն արեց վարչակազմի ղեկավարը, ով հատկապես գյուղբաժնի և համայնքների ղեկավարների ուշադրությունը մեկ անգամ ևս հրավիրեց վարկերի մարման գործընթացի վրա:
Ի շարս այլ հարցերի՝ քննարկվեցին նաև ՙՇրջանում գործող արվեստի դպրոցների գործունեության մասին՚, ՙՄիջագետ՚ ՓԲԸ գործունեության մասին՚, ՙԱնչափահասների շրջանում հանցագործությունների կանխարգելման ուղղությամբ տարվող աշխատանքների մասին՚ և այլ հարցեր:
Ամփոփելով շրջխորհրդի նիստի աշխատանքները, Վ. Գևորգյանը ներկաներին շնորհավորեց գալիք Նոր տարվա առթիվ՝ մաղթելով ամենալավն ու բարին։
Էդիկ ԴԱՎԹՅԱՆ
ք. Հադրութ