[ARM]     [RUS]     [ENG]

ԿԱՌՈՒՑՎՈՒՄ Է ՀԱՄԱՅՆՔԱՅԻՆ ԿԵՆՏՐՈՆ

Հադրութի շրջանի Թաղասեր գյուղում ՙՀայաստան՚ համահայկական  հիմնադրամի ֆինանսավորմամբ կառուցվում է համայնքային կենտրոն:

Կապալառու կազմակերպությունը  ՙԵվրոստրոյ՚ ՍՊԸ-ն է,  որը Հադրութ քաղաքում կառուցում է նաև  2 բազմաբնակարան բնակելի տուն: Այդ մասին մեզ հետ զրույցում ասաց աշխղեկ Սերգեյ Միրզոյանը, միաժամանակ նա հավելեց, որ  համայնքային կենտրոնը երկհարկանի բազմաֆունկցիոնալ  նոր նախագծով շինություն  է, որն իր մեջ ներառելու է գյուղապետարան, հանդիսությունների դահլիճ, գրադարան, բուժկետ, համակարգչային սենյակ: Ըստ աշխղեկի` ձեռնարկվում են հնարավոր բոլոր միջոցները 2017 թվականին ավարտելու շինարարությունը:

Համայնքի ղեկավար Կարեն Հովսեփյանի հավաստմամբ` նման կենտրոն  ունենալու մասին բազմիցս է խոսվել, և ուրախալի է, որ այն այսօր իրականություն է դառնում, ինչը հնարավորություն կտա միանգամից լուծել գյուղապետարանի, բուժկետի, գրադարանի  խնդիրները: Կ. Հովսեփյանը կարևորեց նաև գյուղի ներքին ջրատար ցանցի վերակառուցումը, ջրհաշվիչ սարքերի տեղադրումը: 

Միջնակարգ դպրոցը, որտեղ սովորում է 69 աշակերտ, կապիտալ վերանորոգման խիստ կարիք ունի: Գյուղում կան երիտասարդներ, որոնք նույնպես բնակարանի կարիք ունեն, մեծ է մի շարք բնակարանների  վերանորոգման  անհրաժեշտությունը, որը կարող են իրականացվել բնակարանատերերի կողմից, եթե տրամադրվեն պահանջվող շինանյութերը: 

Ապրիլյան քառօրյա պատերազմը մեկ անգամ  ևս կարևորեց  տարանցիկ ճանապարհների խնդիրը, այդ իսկ առումով անհրաժեշտ է հիմնանորոգել Հադրութ-Ցոր տանող մայրուղու վրա գտնվող կամուրջները: 

Էդիկ ԴԱՎԹՅԱՆ

ք. Հադրութ