ԲՌՆԱՏԵՂԱՀԱՆՎԱԾ ՀԱՄԱՅՆՔՆԵՐԸ ՈՏՔԻ ԵՆ ԿԱՆԳՆՈՒՄ
Ս.թ. ապրիլին լրացավ ՙԿոլցո՚ ռազմագործողության 26-րդ տարին, գործողություն, որը Հադրութի շրջանում իրականացվեց մայիսի 13-16-ն ընկած ժամանակահատվածում` առանձնակի դաժանությամբ, թալանով, ջարդերով ու բռնի տեղահանությամբ: Շրջանի 14 գյուղեր ենթարկվեցին բռնի տեղահանման: Իրենց բնակավայրերը թողեցին ավելի քան 1500 բնակիչներ, 677 տնտեսություն հիմնահատակ ավերվեց:
ՙԿոլցո՚ ռազմագործողության հետևանքով հայաթափվեցին Հադրութի շրջանի հարավային թևում գտնվող բոլոր գյուղերը` բացի Հին Թաղեր և Խծաբերդ գյուղերից: Արփագետիկ գյուղում թուրք-ազերիների կողմից սրի մատնվեցին յոթ խաղաղ բնակիչներ: Բռնատեղահանման հետևանքով այդ գյուղերից ազերիները տարան 1300 գլուխ ԽԵԱ, շուրջ 2500 ՄԵԱ, հիմնահատակ ավերեցին 700 բնակելի տուն, արտադրական նշանակության տասնյակ օբյեկտներ, 8 դպրոցական շենք, մշակույթի 10 օբյեկտ, 1 տեղամասային հիվանդանոց, 7 բուժական հիմնարկ, առևտրի, հասարակական սննդի, կենցաղային սպասարկման տասնյակ օբյեկտներ: Ավերածության և թալանի ենթարկվեցին 1 խորհրդային և 4 կոլեկտիվ տնտեսություններին պատկանող ինչպես վարչական, այնպես էլ արտադրական նշանակության տասնյակ օբյեկտներ, տասնյակ կիլոմետրերի հասնող էլեկտրական, կապի օդային գծեր, ջրատարներ:
Հրադադարից հետո սկսեցին շենանալ բռնագաղթի ենթարկված գյուղերը: Տեղահանված 14 գյուղերից 12-ում վերաբնակեցման աշխատանքներ իրականացվեցին: Կառուցվեց շուրջ 250 բնակելի տուն: Բնակելի տների կառուցումը և վերանորոգումը շարունակվում են: Դպրոցական նոր շենքեր կառուցվեցին Բանաձոր, Առաքել, Խանձաձոր, Ծամձոր, Արևշատ գյուղերում: Կապիտալ վերանորոգման աշխատանքներ իրականացվեցին Հին Թաղերի և Խծաբերդի դպրոցական շենքերի վրա: Վերանորոգվեցին այդ գյուղերում տեղակայված բուժական հիմնարկները: Վերը նշված համայնքներում լուծում են ստացել արտադրական ենթակառուցվածքների հետ կապված բոլոր խնդիրները: Բոլոր գյուղերը էլեկտրիֆիկացվել են, լուծում են ստացել բնակչության ջրամատակարարման հարցերը:
Այդ գյուղերի բռնագաղթից հետո անցել է 26 տարի: Հաշվի առնելով դրանց ռազմավարական նշանակությունը` որպես սահմանամերձ բնակավայրերի, ԼՂՀ կառավարության որոշմամբ դեռևս 2009 թվականին մշակվել և հաստատվել է Բանաձորի ենթաշրջանի զարգացման 5-ամյա ծրագիր, որը պետք է ապահովի այդ համայնքների համաչափ զարգացումը, հնարավորություն տա արդյունավետ օգտագործելու առկա բնատնտեսական ներուժը, աստիճանաբար վերացնելու բռնատեղահանման հետևանքները, հաղթահարելու սահմանամերձ, լեռնային և բարձրլեռնային գոտու յուրացման անհամամասնությունները` համեմատած հարթավայրային տարածաշրջանների հետ: Համայնքների զարգացման ռազմավարական նշանակությունը կարևորվում է նաև տեղերում ժողովրդագրական վիճակի աստիճանական բարելավմամբ: Այդ նպատակով զգալի աշխատանքներ են իրականացվում: 1995 և 2005 թվականներին նոր կազմավորված Հայկավան և Առաջամուղ գյուղերում կառուցվել են շուրջ 40 բնակելի տներ, դպրոցական հարմարավետ շենքեր, վարչական և բուժական հիմնարկներ: Ավերված Արփագետիկ գյուղը շենացել է, կառուցվել է 8 բնակելի տուն: Բնակեցվել են Արաքսավան և Եղեգն բնակավայրերը, որտեղ կառուցվել են ժամանակավոր կացարաններ և բնակելի տներ:
Ենթաշրջանի համայնքներում բնակչության թիվը կազմում է 1138 մարդ: Ժողովրդագրական վիճակի առումով բնակչության աճ է գրանցվել: Միայն 2017 թվականին ենթաշրջանի համայնքներում ծնվել է 25 երեխա:
Ենթաշրջանի տնտեսության հիմնական ճյուղը անասնապահությունն է, որի համար պետության կողմից համայնքների զարգացման ծրագրի շրջանակներում իրականացվել է վարկավորման քաղաքականություն: Անասնապահության զարգացման համար տրամադրվել է 67,8 մլն դրամի վարկ:
Ենթաշրջանի համայնքներում որոշակի աշխատանքներ է իրականացվել նաև բուսաբուծության բնագավառում. արտադրվել են բավարար քանակության կարտոֆիլ, բանջարաբոստանային մշակաբույսեր:
Ասել է թե` բռնագաղթի ենթարկված գյուղերը շենանում են:
Լուծելով կենսական նշանակության խնդիրները, կունենանք զարգացած համայնքներ, ինչն այսօր ամենևին էլ կասկածի տեղիք չի տալիս:
Էդիկ ԴԱՎԹՅԱՆ
ք. Հադրութ