Մեղվաբուծությունն Արցախում կբարձրացվի նոր մակարդակի
Ընդամենը մի քանի ամիս է, ինչ հիմնադրվել է Honey House ՍՊԸ-ն: Նպատակն Արցախում արտադրվող մեղրը միջազգային շուկա դուրս բերելն է:
Սա թերևս արցախյան մեղվաբուծությունն այլ մակարդակի բարձրացնելու, մեղրը որպես պարենային մթերք սննդի արդյունաբերության մեջ, միջազգային նորմերին համապատասխան ներկայացնելու և միջազգային շուկա դուրս բերելու առաջին փորձն է:
Ընկերությունը հիմնադրվել է Սուրեն Գրիգորյանի և Էրիկ Մկրտումյանի կողմից:
Honey House-ի համահիմնադիր Ս. Գրիգորյանի խոսքով, ապրանքն արտաքին շուկայում կներկայացվի ՙԱրցախ-մեղրի երկիր՚ կարգախոսով: ՙԱյստեղ մեղրի արտադրության համար կան բոլոր կատարյալ պայմանները, և արցախյան մեղրը պիտի յուրահատուկ տրենդի վերածվի՚,-համոզված է մեր զրուցակիցը, ով արցախցիներին հայտնի է որպես նոր տեխնոլոգիաներով՝ (ՙկՈվրՍՌռ րՏՑ՚), մեղրի արտադրման կողմնակից: Արդեն մի քանի ամիս է, ինչ գործարարն աշխատանքներ է տանում մեր հանրապետությունում, հանդիպումներ է ունենում մեղվաբույծների հետ, համագործակցում՝ նրանց ներկայացնելով բլիստերային` պլաստիկ թափանցիկ ջերմակաղապարային տարաներով կամ ուրվագծային բջջային փաթեթավորմամբ մեղրի ստացման առավելությունները: ՙԿան միջազգային նորմեր, որոնց անհրաժեշտ է հետևել, եթե միջազգային շուկայում ներկայանալու, սեփական տեղը գտնելու ցանկություն կա,-ասում է Ս. Գրիգորյանը:-Ցանկացած պարենային մթերք հայտնվում է վաճառասեղաններին համապատասխան սերտիֆիկատ ստանալու պարագայում միայն, որը տրամադրվում է համապատասխան պայմանների կատարման դեպքում: Բլիստերային փաթեթավորումն ինքնաբերաբար լուծում է մի քանի խնդիր. այն ապրանքն արդյունավետորեն պաշտպանում է արտաքին ազդեցությունից, խոնավությունից, կեղտի ներթափանցումից՚:
Լինելով գրեթե բոլոր բնակավայրերում, որտեղ մեղվաբուծություն կա, նա մասնագիտական օժանդակություն է ցույց տալիս մեղվաբույծներին: Հանրապետության չորս շրջաններում ստեղծվել են մեղվանոցներ՝ բաղկացած 20 մեղվաընտանիքից, որոնք կաշխատեն նոր տեխնոլոգիաներով, ստանալով ինչպես քամած մեղր, այնպես էլ` ՙկՈվրՍՌռ րՏՑ՚: Վերջինն արդեն մեղրի միջազգային շուկայում ունի իր սպառողը: Մեղվաբույծը կարևոր է համարում այս ընթացքում կատարած նախապատրաստական աշխատանքը: Այն հնարավորություն տվեց կողմնորոշվել, թե ինչպես, ինչ ուղղությամբ պետք է առաջնորդվել, ինչ մեթոդներով զարգանալ, ինչպես և որտեղ տեղափոխել մեղվանոցները և այլն: Հաշվի է առնվել յուրաքանչյուր մանրուք, ինչն օգտակար կլինի մեծածավալ արտադրություն սկսելու դեպքում, և դա էլ հենց ընկերության գլխավոր նպատակն է: Ընկերությունը կօգտագործի ամենաժամանակակից սարքավորումները, որոնք ժամանակը և աշխատուժի ծախսերը տնտեսելու հնարավորություն կտան:
Հիմնադիրները գոհ են արձանագրված ցուցանիշներից՝ 22-24 կգ՝ մեկ մեղվաընտանիքից, սակայն համոզված են, որ կարող էին ավելին ստանալ: Նրանց կողմից մշակվում է համապատասխան մեթոդիկա, որի կիրառումը թույլ կտա հասնել այդ ծավալներին: Այս ցուցանիշները ցույց տվեցին, որ ապագա ներդրումներն արդյունավետ կլինեն: Արցախում նոր տեխնոլոգիաների կիրառմամբ մեղվաբուծությունն արդեն ունի իր հետևորդները, որոնք համոզվել են նոր մեթոդի արդյունավետության մեջ:
Ծրագիրը կյանքի է կոչվում հանրապետության Գյուղատնտեսության նախարարության հետ համագործակցությամբ: ՙՄենք պահանջ դրեցինք վերահսկողություն իրականցնել մեր իսկ հանդեպ, քանի որ դա կարևորագույն հանգամանք է: Հիմա գործում է համապատասխան լաբորատորիա, որտեղ 10 տեսակի հետազոտություն է իրականցվում, այն դեպքում, երբ պահանջվող պարտադիր հետազոտությունները միջազգային չափորոշիչերով ինն են: Կոչ ենք անում բոլոր մեղվաբույծներին օգտվել այդ ծառայությունից. դրանք թանկ արժեցող պրոցեդուրաներ չեն, բայց անչափ կարևոր են: Բոլոր հարցերում պետական աջակցություն է եղել, մեծ աջակցություն է ցույց տվել Գյուղնախարարությունը՚,-ասաց Ս. Գրիգորյանը:
Ստեղծվել է Մեղվաբույծների ասոցիացիա, ինչը մեր զրուցակիցը ռազմավարական նշանակության քայլ է համարում: Այն կհամախմբի ոլորտում գործունեություն իրականացնողներին, որոնք, ի դեպ, Արցախում փոքր թիվ չեն կազմում՝ շուրջ 1000 հոգի: Նրանց մեջ կանանց թիվը 40 է: ՙՀետաքրքիր է, որ կանանց մեղվափեթակներն առանձնանում են իրենց կոկիկությամբ ու մաքրությամբ, և ես հաճախ եմ բերում նրանց օրինակն ուժեղ սեռի ներկայացուցիչների մոտ: Իսկ սանիտարական վիճակը, եթե խոսվում է մեղրի՝ որպես մթերքի մասին՝ կարևոր է. սննդամթերքն առաջին հերթին պիտի անվտանգ լինի՚,-կարծիք հայտնեց Ս. Գրիգորյանը
Ոլորտում կներմուծվի նաև անձնագրային համակարգ. երկու տարվա ընթացքում մեղվաբուծության ոլորտում գոյություն ունեցող բոլոր հարցերը կկարգավորեն, որպեսզի միջազգային շուկայում տեղի ունեցող գործընթացներից Արցախը հետ չմնա: Դա կբարձրացնի մեր մեղվաբույծների վարկանիշը և արցախյան մեղրի հեղինակությունը:
Honey House ՍՊԸ-ն նախատեսում է 50 անուն մեղրամթերք արտադրել: Խնդիր է դրվել նախ բավարարել ներքին պահանջարկը, ապա և արցախյան մեղրի նկատմամբ հետաքրքրություն առաջացնել արտաքին սպառողի մոտ: Մեղրը հետաքրքիր է նախևառաջ իր օգտակարութամբ, այն պետք է գնահատել:
Ընկերությունը պատրաստվում է առաջիկայում՝ գյուղատնտեսական ամենամյա տոնավաճառի ժամանակ, ներկայանալ իր արտադրած մթերքով, որի մի մասն, ի դեպ, ցուցադրված է ՙԱրցախբերրի՚ ընկերության ֆիրմային խանութում: Սոցիալական որոշ խմբերի Honey House-ն իր արտադրանքը կտրամադրի զեղջերով:
Սրբուհի ՎԱՆՅԱՆ