ՑՈՒՑԱՆԻՇՆԵՐԸ ՍՊԱՍՈՒՄՆԵՐԸ ՉԵՆ ԱՐԴԱՐԱՑՆՈՒՄ
Կարինե ԴԱԴԱՄՅԱՆ
ք. Մարտունի
Այս օրերին ողջ հանրապետությունում ընթանում է բերքահավաքի եռուն շրջանը։ Մարտունու շրջվարչակազմի աշխատակազմի ԳՀՀ բաժնի վարիչ Ռոբերտ Վանյանի տեղեկատվության համաձայն` շրջանում բերքահավաքի ենթակա տարածքները կազմում են 14221,3 հա, որից ցորեն՝ 10532 հա, գարի՝ 3632հա և հաճար՝ 57հա:
Հունիսի 1-ից ընթանում է գարու, հունիսի 12-ից? ցորենի դաշտերի հունձը։ Հունիսի 25-ի տվյալներով՝ հնձված է 8301,3հա, ամբարվել է 125426,4ց բերք, հեկտարի միջին բերքատվությունը կազմում է 15,1ց, հնձվել է 5348,6հա ցորեն, ամբարվել 80414ց բերք, հեկտարի միջին բերքատվությունը կազմում է 15,0ց, 2952,7հա գարի, ամբարվել 45012,4ց, հեկտարի միջին բերքատվությունը կազմում է 15,2ց։
Կարկտահարությունից 100 տոկոսով վնասվել է 827,7հա ցորենի, 410,3հա գարու ցանքս։
Բաժնի վարիչի խոսքով՝ նախորդ տարիների համեմատ ցածր է բերքատվության ցուցանիշը։ Այն տարբեր հանգամանքներով է պայմանավորում։ Հիմնականը՝ բնակլիմայական։
Բերքահավաքի շրջանում միշտ դժգոհության առիթ է դառնում առանձնապես կոմբայնների պակասը։ Նշվեց, որ օրվա դրությամբ հնձի աշխատանքներում ներգրավված է 60 կոմբայն, ինչը բավարար է բերքահավաքը ժամանակին և անկորուստ կազմակերպելու համար։ Շրջանում սարքին վիճակում է 85 կոմբայն, պահանջարկով պայմանավորված՝ դրանք լրիվությամբ կներգրավվեն հնձի աշխատանքներին։
Կոմբայնավար Սամվել Գևորգյանը տասնյակ տարիներ աշխատում է տեխնիկայի հետ։ Իր կողմից օգտագործվող կոմբայնը գերմանական արտադրության է, մեկ օրվա ընթացքում կարող է մինչև 20հա հունձ կատարել, բայց մեր ցանքսերի դիրքն այն թույլ չի տալիս։ Դժգոհություն է հայտնում նաև տեխնիկայի պարբերաբար խափանումների հետ կապված։ Օրվա մեջ միջինը 16-17հա հունձ է կատարվում։ Տարվա բերքատվությունից նա նույնպես դժգոհ է։ Հույս է հայտնում, որ մնացած դաշտերում պատկերն ավելի հուսադրող կլինի։