ԻՆՉՊԵՍ ԴՐԱԽՏԻԿԸ ԴԱՐՁՆԵԼ ԴՐԱԽՏ...
Սիրվարդ ՄԱՐԳԱՐՅԱՆ
Հադրութի շրջանի Դրախտիկ համայնքի ղեկավար Վիտալի Միրզոյանին հանդիպեցինք գյուղամիջում: Մի խումբ տղամարդկանցով, գլուխ-գլխի թեժ զրուցում էին. ներողություն խնդրելով միջամտության համար, գյուղապետին օրը ցերեկով ՙառևանգեցինք՚։ Լրագրողներիս ներկայությունից նեղվող-նեղսրտվող համայնքի ղեկավարն, այնուամենայնիվ, տեղի տվեց և կամա՛ց-կամաց հարմարվելով խոսք դուրս քաշող, ինչ-որ տեղ նաև սադրող հարցերիս՝ ՙբացվեց՚, իսկ մեզ էլ հենց դա էր անհրաժեշտ։
Վ. Միրզոյանն էլ այն գյուղապետերի շարքից է, ովքեր չեն խոսում, չեն բարձրաձայնում, սակայն իրենց իսկ մտքում շարված խնդիրներին փորձում են լուծումներ տալ՝ որոնելով ելք ու ուղիներ։ Վիտալին համայնքի ղեկավարի պաշտոնում ընտրվել է նախորդ տարվա հոկտեմբերին… Մինչ այդ սակրավոր, վաշտի հրամանատար, ավագ լեյտենանտ, Արցախյան պատերազմի 2-րդ կարգի հաշմանդամություն ունեցող Վիտալին ՊԲ-ից զորացրվել է 1999 թվականին ու, ինչպես ասում են, գլուխը կախ իր գործին էր, չնայած առողջական խնդիրներին` հոգում էր ընտանիքի կարիքները` ունենալով անձնական փոքր բիզնես։ Հետո անսալով համագյուղացիների առաջարկ-պահանջին, ստացավ նրանց վստահության քվեն։ Ներկայում նրա մտահոգության առանցքային շեշտադրումներից մեկն էլ համագյուղացիներին հուսախաբ չանելն է։
Դրախտիկն ունի 430 բնակիչ, 80 ծուխ, ժամանակավոր բնակիչների թիվն էլ անցնում է 2 տասնյակից, վերաբնակներ էլ կան, սպայական ընտանիքներ էլ, այնպես որ, բացի հիմնական բնակիչներից, գյուղի բնակչության ՙներկապնակը՚ բազմագույն է ու բազմաշերտ… Նրանց սոցիալական դրությունը տարբեր է, ինչպես մնացած մեր համայնքներում, այստեղ էլ լավ, միջակ ու համեմատաբար վատ ապրողներ կան։ Գյուղն աշխատող մարդու տեղ է, ասում է համայնքապետը, ինչքան էլ որ օգնես, միջոցներ տրամադրես, միևնույն է, գյուղացին ինքը պիտի ոչ միայն ձեռքերով բանի, այլև խելքով գործ բռնի։ Նրա բերած տվյալներով` Դրախտիկի բնակիչներից և ոչ մեկը նախապատերազմական, պատերազմական ու ետպատերազմյան տարիներին գյուղը չի լքել։ Սա գյուղի առանձնահատկություններից է, գյուղից հեռացող չկա։
Ընդամենը մի քանի տարվա պատմություն ունեցող Սալաքաթին ադրբեջանական գյուղը ժամանակին աղետ էր դրախտիկցիների համար, այն իշխող դիրքում էր ու օր ու արև չէր տալիս դրախտիկցիներին, բայց վերջիններիս կամքը կոտրել չհաջողվեց` 91-ին քշեցին, ու մեծով-փոքրով, իրենց հող ու արմատին պինդ կպած ապրեցին ու արարեցին` նոր շունչ ու ոգի հաղորդելով հայրենի գյուղին։ Սակայն գյուղապետի համար (և ոչ միայն նրա) մտահոգիչ է, որ ջահելները չեն ամուսնանում, Վիտալիկը նույնիսկ նրանց ստույգ քանակը գիտի՝ 33-ն են, ասել է թե՝ 33 ընտանիք չի կազմվել, չի կայացել։ Պատճառները տարբեր են, բայց, մեղմ ասած, բացթողումն, իրոք, արդարացում չունի։ Երևակայություններս չարչարելու կարիք չկա, մի փոքր թվաբանություն` և Դրախտիկը փաստորեն զրկված է 100 երեխայի ներկայությունը վայելելուց, եթե հաշվի առնենք, որ յուրաքանչյուր ընտանիքում առնվազն 3 երեխա կլիներ։ Մեծն Թումանյանի կերպավորած Կիկոսի ողբն անելու ու ծնկները ծեծելու փոխարեն Վ. Միրզոյանին առաջարկեցինք կոնկրետ խնդիր դնել ու դիմել կառավարության օգնությանը: Հարսնացուների պակաս էլ թե լինի, կողքի գյուղերից օգնություն կհայցեն։ ՙԵթե այդ ջահելները ժամանակին ամուսնանային` հիմա Դրախտիկի բնակչությունը 600-ից անց կլիներ՚,- ասում է համայնքապետը ու խոստանում լուրջ մտածել մեր առաջարկած ծրագրի շուրջ, գո՞ւցե բարերարներ էլ կգտնվեն, ինչ իմանաս, պարզապես ձեռքերը ծալած նստելու փոխարեն անհրաժեշտ է գործել, ընդ որում՝ նպատակաուղղված։
Ինչպես հարակից գյուղերում, այստեղ` Դրախտիկում էլ մշակութային կյանք ասածը գոյություն չունի, գյուղի ակումբը ենթակա է վերանորոգման։ Հիմնական, տոնական և ոչ տոնական միջոցառումներն անցկացվում են դպրոցում` աշակերտների ու նրանց ուսուցիչների ջանքերով։ Գյուղի համայնքապետարանը նոր է, այնտեղ տեղակայված բուժկետը նորակառույց է, նորակառույց է նաև դպրոցական շենքը՝ գրեթե 90 աշակերտների ընդգրկմամբ։ Մասնագետներով ապահովված են, դեռ աշխատուժի ՙավելցուկ՚ էլ ունեն, ժամաքանակը չի հերիքում, բայց մի հնար գտնում են, որ գոնե նվազագույն ժամերով ուսուցչին ապահովեն, որ ստիպված չլինի այլ տեղ աշխատանք որոնել։
Դրախտիկցիների հիմնական զբաղմունքը գյուղատնտեսությունն է, նրանք բոլորն արտեր ունեն, մշակաբույսեր են վարում-ցանում, նաև այգեգործությամբ ու բանջարաբոստանային կուլտուրաների մշակությամբ են զբաղվում։ Եթե տարին բարենպաստ է լինում, նրանք հոգում են ողջ տարվա կարիքները, դեռ ավելին, մի բան էլ նեղ օրվա համար են հետ գցում, իսկ եթե ոչ, սպասում ու ապրում են լավ օրերի հույսով։ Գյուղը ոռոգման ջրի լուրջ խնդիր ունի, նախկինում բերքի տակ կռացած պտղատու ծառերը այսօր բերք չեն տալիս, գյուղի համար բրենդ հանդիսացող տանձենիները հերթով չորանում են։ Խմելու ջրով ապահովված են, բայց ամռան տապին, երբ տնամերձները ջրելու խնդիր է առաջանում, դա էլ չի հերիքում։ Պետական ծրագրով նախատեսվում է ոչ միայն Դրախտիկի, այլև ողջ ձորակի գյուղերի ջրի խնդիրն արմատապես լուծել։ Եթե ոռոգման ջուր լիներ, դրախտիկցիները բաղ ու բախչա կջրեն, նրանք ձևը գիտեն, գիտեն գյուղն ինչպես իսկական դրախտ դարձնել, բայց դե ջրի սակավությունը իսկապես նեղում է նրանց։ Իսկ թե դրախտն ընդհանրապես ինչ կապ ունի իրենց գյուղի հետ, համայնքապետը պարզաբանում է հետևյալ կերպ. ՙՆախկին գյուղը վերևներում էր և Արաքսի կողմից ծագող արևն իր շողերը ձգելով դրախտի էր վերածում անտառներով, սար ու ձորերով հարուստ ձորակը, ու մարդիկ արեգակին վերևից նայելով այնքան գեղեցիկ պատկերների էին ականատես լինում, որ այն նրանց դրախտի մասին էր հիշեցնում, և գյուղն իրենց կոչեցին Դրախտիկ՚։ Եթե որոշակի խանգարող հանգամանքները չլինեին, նրանք նոր Դրախտիկն էլ դրախտ կդարձնեն, և այսօր յուրաքանչյուր դրախտիկցի քնում-արթնանում է այդ հույսով։ Արդեն ասացինք, որ ցորենի արտեր ունեն դրախտիկցիները, նրանք նաև անասնապահությամբ են զբաղվում, անտառներն էլ թեկուզ մի փոքր հեռու են գյուղից, բայց հավելյալ եկամտի աղբյուր են նրանց համար։ Թթայգիներն էլ նույն դերն են կատարում, մի զգալի մասն էլ մեղվաբուծությանն է զարկ տալիս։ Այստեղ էլ, ինչպես հարակից գյուղերում, համայնքապետարան դիմում են շինանյութեր ստանալու խնդրանքով, հնարավորության սահմաններում օգնում-աջակցում են։ Նորընտիր գյուղապետը մտահոգված է, որ մեկը տասն անգամ շինանյութ է ստացել, մեկ ուրիշը` ոչ մի… Նա փորձում է այդ խնդրին լուծում տալ արդարության սկզբունքը չխախտելով, հուսանք, որ հաջողելու է։ Այդ հարցում, ինչպես միշտ, առաջնահերթությունը տրվել և տրվելու է զոհվածների ընտանիքներին և վիրավոր հաշմանդամներին, այստեղ արդեն երկու կարծիք լինել չի կարող։ Հանդիսությունների տան բացակայության պատճառով դրախտիկցիները հարսանիքներ են անում կողքի գյուղերում, այս խնդիրն էլ է օրակարգային ու շուտափույթ լուծում պահանջող։ Վ. Միրզոյանը գտնում է, որ 5 տարին փոքր ժամանակահատված չէ և ինքը կհասցնի գյուղի զարգացման գործում անձնական ներդրում ունենալ։ Նա պարզապես չի կարող իր ընտրողներին հուսախաբ անել, իսկ նրանք բացարձակ մեծամասնություն էին, չնայած իրեն չընտրողներին էլ նա պարտավոր է տեր կանգնել, և դա միանշանակ է։