ՁԵՌՆԱՐԿՎՈՂ ԲՈԼՈՐ ՄԻՋՈՑՆԵՐՆ ՈՒՂՂՎԱԾ ԵՆ ԳՅՈՒՂԱՏՆՏԵՍՈՒԹՅԱՆ ՈԼՈՐՏԻ ՎԵՐԱԿԱՆԳՆՄԱՆԸ
Լաուրա ԳՐԻԳՈՐՅԱՆ
Հարցազրույց ԱՀ էկոնոմիկայի և գյուղատնտեսության նախարար Արմեն ԹՈՎՄԱՍՅԱՆԻ հետ
- Պարոն Թովմասյան, Ձեր պաշտոնն ստանձնել եք երկրի համար բավականին ծանր ժամանակաշրջանում: Հաշվի առնելով, որ տնտեսության զարգացման կարևոր ճյուղերից է գյուղատնտեսությունը, կարելի է ասել՝ ոչ թեթև բեռ եք վերցրել Ձեր ուսերին...
- Արցախի համար հետպատերազմյան ժամանակաշրջանն, իհարկե, չափազանց ծանր է: Էկոնոմիկայի և գյուղատնտեսության ոլորտում այդ ծանրությունն ավելի ու ավելի ցավոտ է զգացվում՝ պայմանավորված` թե՜ մեր ոլորտի՝ պարենային անվտանգության ապահովման խնդրի կարևորագույն բաղադրիչ լինելու գործոնով, թե՜ այն մեծ բարոյական պատասխանատվությամբ, որը ես զգում եմ մեր երկրին վրա հասած աղետի հետևանքները մեղմելու առնչությամբ: Փաստորեն, գյուղատնտեսության ոլորտում երկար տարիների մեր աշխատանքի արդյունքներն ու զգալի չափի գյուղատնտեսական ռեսուրսներ` վարելահողեր, անասնագլխաքանակ, ջրամբարներ, նորագույն ոռոգման համակարգերի միջոցով ջրարբիացված հողատարածքներ, այգիներ, բարեկարգված ու ջրարբիացված արոտավայրեր, գրեթե զրոյացվել են: Արցախահայությունն այսօր կանգնած է լուրջ տնտեսական մարտահրավերների առաջ, որոնց դիմակայման գործին պետք է անմնացորդ լծվի ամբողջ հայությունը՝ անկախ բնակության վայրից, քանի որ դրանով է պայմանավորված Արցախի հետագա գոյության ու ապագայի հարցը:
- Արցախյան երրորդ պատերազմի հետևանքով վարչական տարածքների հետ միասին՝ կորցրինք նաև վարելահողեր ու արոտավայրեր, անասնագլխաքանակ... Ինչքա՞ն են կազմում կորուստները:
- Կորուստներն ահռելի են. Արցախը կորցրել է վարելահողերի 75 տոկոսից ավելին, այգիների ու անասնագլխաքանակի 50 տոկոսից ավելին, ջրային պաշարները գրեթե ամբողջությամբ՝ Մատաղիս, Վարանդա 1, 2, 3 և Խաչենի ջրամբարներն անցել են թշնամու հսկողության տակ: Կորուսվել են արոտավայրերի 85 տոկոսից ավելին: Համեմատաբար քիչ են կորուստները գյուղատնտեսական տեխնիկայի մասով, դրանք կազմում են ընդամենը 20 տոկոս:
- 2021-ի պետական բյուջեով գյուղատնտեսությանը հատկացված գումարն արդյո՞ք կբավականացնի ոլորտի վերականգնմանն ու զարգացմանը:
- Արցախի Հանրապետությունում տնտեսության զարգացման և գյուղատնտեսության ճյուղերի, այդ թվում՝ բուսաբուծության, անասնաբուծության և ոռոգման համակարգերի բարելավմանն ու զարգացմանն ընթացիկ տարում ուղղվել է ավելի քան 5,8 մլրդ դրամ:
Նշված գումարը ներառում է և՜ ոլորտների զարգացման ծրագրերը, և՜ դրանց շրջանակում հողօգտագործողներին աջակցության տրամադրումը:
Գյուղատնտեսության ոլորտում գործարկվել են մի շարք աջակցության ծրագրեր, որոնք ուղղված են խրախուսելու Արցախում գյուղատնտեսական գործունեության իրականացումն ու մեղմելու պատերազմի հետևանքով գյուղոլորտին հասցված վնասները:
Այսպես, վերջին շրջանում իրականացված աջակցության միջոցառումների շարքում են Արցախում գործող նվազագույնը 100 քառ. մետր մակերեսով ջեռուցվող և չջեռուցվող ջերմոցային տնտեսություններին ցուցաբերվող օգնությունը։ Այս առումով որպես աջակցություն տրամադրվել է համապատասխանաբար 600 և 300 դրամ գումար՝ 1 քառ. մետրի դիմաց: Ընդհանուր առմամբ, շահառուներին հատկացվել է շուրջ 20 մլն դրամ աջակցություն՝ 4,6 հա ջերմոցի համար:
Պետք է նշեմ, որ հաշվի առնելով ջերմոցային տնտեսությունների կարևորությունը՝ երկրի պարենային անվտանգության ապահովման տեսանկյունից, ինչպես նաև՝ եկամտաբերությունը, ԱՀ էկոնոմիկայի և գյուղատնտեսության նախարարության աջակցության կարգերով առաջիկայում նախատեսվում է Արցախում նվազագույնը 2500 քառակուսի մետր մակերեսով, նորագույն տեխնոլոգիաներով հագեցած ջերմոցային տնտեսության հիմնման դիմաց՝ շահառուներին փոխհատուցել կատարած ծախսերի 50 տոկոսը:
Այդպիսով ԱՀ կառավարությունը կխրախուսի Արցախում խոշոր ներդրումների իրականացումը՝ նվազեցնելով տեղում տնտեսական գործունեություն ծավալող անհատների ու կազմակերպությունների հնարավոր ռիսկերը:
Արցախում այգետնկումների խրախուսման նպատակով մասնակի փոխհատուցվում է պտղատու ծառերի տնկիների արժեքը՝ մինչև 1000 դրամ 1 հատի դիմաց` 0,5-ից մինչև 10 հա ավանդական կամ ինտենսիվ եղանակով մշակվող այգի հիմնելու պայմանով: Տվյալ ծրագրի շրջանակում Արցախում հիմնվել են ավելի քան 76 հա պտղատու-հատապտղատու այգիներ: Մինչև տարեվերջ դրանց թիվը նախատեսվում է հասցնել 150 հա-ի: Առայսօր տնկիների փոխհատուցման ծրագրի շահառուներին է փոխանցվել 30 մլն դրամ գումար:
Հատիկաընդեղենային մշակաբույսերի սերմերն այս տարի հողօգտագործողներին են տրամադրվել լրիվ անհատույց:
Բանջարաբոստանային մշակաբույսերի մշակությունն Արցախում խրախուսվում է 1 հա-ի դիմաց 300 հազար դրամ գումարի տրամադրմամբ: Ծրագրի շահառու կարող են դառնալ նվազագույնը 0,5 հա բանջարեղեն մշակող հողօգտագործողները:
Ծխախոտի հումքի մթերումը նույնպես կխրախուսվի՝ 1 կգ-ի դիմաց 20 դրամի չափով:
Անասնաբուծության և անասնաբուժության խթանման նպատակով ևս գործարկվել են մի շարք ծրագրեր:
- Ընդհանուր առմամբ՝ ինչպիսի՞ն է տնտեսավարողների տրամադրվածությունը, կա՞ն անհատներ, ովքեր ցանկություն ունեն նոր ներդրումներ անել...
- Պատերազմից հետո Արցախում ներդրումների իրականացման ռիսկայնության շեմն, իհարկե, բարձրացել է, ինչի հետևանքով պետությունը գյուղատնտեսության ոլորտում ներդրումներ կատարել ցանկացողներին որոշել է խրախուսել հետևյալ կերպ.
Սպանդանոցների, անասնաբուծական մթերքների, հումքի վերամշակման արտադրամասերի կառուցման, անասնաշենքերի կառուցման, վերակառուցման ու վերանորոգման արժեքի մասնակի սուբսիդավորման, գյուղատնտեսական կենդանիների արհեստական սերմնավորման, ներմուծվող տոհմային կենդանիների արժեքի մասնակի սուբսիդավորման, ինչպես նաև նորարարական տեխնոլոգիաներով հագեցած նվազագույնը 2500 քառակուսի մետր մակերեսով ջերմոցային տնտեսության հիմնման ծրագրերով նախատեսվում է փոխհատուցել քաղաքացիների կողմից տվյալ ծրագրերի իրականացման համար ծախսված ֆինանսական միջոցների 30-ից 50 տոկոսը: Սա լուրջ ներդրումային փաթեթ է պետության կողմից, որն ուղղված է Արցախում գյուղատնտեսության ոլորտում խոշոր ներդրումների իրականացման խրախուսմանը և կոչված է նվազեցնելու տնտեսական գործունեություն ծավալող անհատների ու կազմակերպությունների հնարավոր ռիսկերը:
Առաջին ծրագրի շրջանակում (անասնաշենքերի կառուցման, վերակառուցման ու վերանորոգման արժեքի մասնակի սուբսիդավորում) արդեն նախարարություն են դիմել մոտ 2 տասնյակ քաղաքացիներ:
Ներմուծվող տոհմային կենդանիների արժեքի մասնակի սուբսիդավորման ծրագրի շրջանակում վերջերս Արցախ է ներկրվել 120 գլուխ խոշոր եղջերավոր անասուն:
Հուսով ենք՝ մեր բնակիչներն ավելի համարձակ կգտնվեն իրենց նախաձեռնությունների մեջ՝ դիմելու և օգտվելու բոլոր առաջարկվող սուբսիդավորման ծրագրերից, որոնք շահավետ են և՜ իրենց, և՜ պետության համար:
-Ըստ Ձեզ՝ ինչքա՞ն ժամանակ է հարկավոր կորցրածը վերականգնելու համար: Ձեր ասելիքը` հողօգտագործողներին, տնտեսավարող սուբյեկտներին...
- Ինչպես արդեն նշել եմ, ցավոք, երկար տարիների աշխատանքի արդյունքը հնարավոր չէ արագ վերականգնել, հատկապես, երբ խոսքը վերաբերում է ռեսուրսների կորստին և խնդիրը կայանում է դրանց փոխարինող? այլ արժեքների ու պաշարների ստեղծման մեջ:
Նշվածներից զատ, առաջիկայում նախարարությունը քաղաքացիներին կառաջարկի դրամաշնորհային ծրագրերից օգտվելու հնարավորություն, ինչը նոր հորիզոններ կբացի տարբեր գործարար գաղափարների կյանքի կոչելու համար:
Առաջիկայում նախատեսվում են նաև այլ ներդրումային ծրագրեր, որոնք այժմ գտնվում են քննարկման փուլում: