ԱՐՑԱԽՈՒՄ ՄԵԿՆԱՐԿԵԼ Է ՀԱՑԱՀԱՏԻԿԻ ԲԵՐՔԱՀԱՎԱՔԸ
Հանրապետությունում հացահատիկի բերքահավաքի մեկնարկի, ցուցանիշների, հացահատիկի մթերման և գների վերաբերյալ մեզ հետ զրույցում մանրամասներ է ներկայացրել ԱՀ գյուղատնտեսության նախարարի տեղակալ Վիլեն Ավետիսյանը։
- Ե՞րբ և ո՞ր գոտիներում կմեկնարկեն հացահատիկի բերքահավաքի աշխատանքները։
-Հանրապետության բնակլիմայական պայմաններից ելնելով հիմնականում բերքահավաքի առաջին աշխատանքներն իրականացվում են Մարտունու և Մարտակերտի շրջանների հարթավայրային գոտիներում։ Նախկինում հարթավայրային հատվածներում գարու բերքահավաքը մեկնարկում էր մայիսի վերջին կամ հունիսի սկզբին։ Այս տարի այն 10-15 օր ուշացավ։ Օրեր առաջ բերքահավաքը մեկնարկել է Մարտունու հարթավայրային հատվածներում, իսկ եղանակային պայմանները բարելավելուց հետո ավելի լայն թափով կշարունակենք նաև այլ տարածքներում։
- Հացահատիկի բերքահավաքի համար բավարար տեխնիկա կա՞։
-Գյուղատնտեսության նախարարությունում գրանցված տվյալների համաձայն՝ առկա գյուղտեխնիկան և՛ քանակով, և՛ սարքինությամբ բավարար է, որպեսզի բերքահավաքը ժամանակին և անկորուստ իրականացնենք։ Հնարավոր է, կոմբայների բաշխվածության խնդիր լինի, որը կփորձենք հնարավորինս կարգավորել։ Հողօգտագործողների կողմից որևէ ահազանգ լինելու դեպքում, նույնպես կաջակցենք։
- Ի՞նչ միջոցառումներ են իրականացվում կամ իրականացվելու բերքահավաքն անկորուստ կազմակերպելու համար։
- Ի դեմս Գյուղատնտեսության նախարարության, պետության կողմից իրականացվում է հիմնականում հակահրդեհային երկու միջոցառում։ Առաջինն արդեն իսկ իրականացվել է. քիմիական եղանակով ոչնչացվել են ճանապարհի և դաշտամիջյան ճանապարհների եզրերին փարթամ մոլախոտերը, որոնք հրդեհի հիմնական պատճառն են։ Երկրորդ միջոցառման շրջանակներում հանրապետության վարչակազմերին և այլ շահագրգիռ մարմիններին համապատասխան ֆինանսական միջոցներ կտրամադրվի, որպեսզի այն տարածքներում, որտեղ մոլախոտերի ոչնչացման դեմ քիմիական եղանակով պայքար չի տարվել, իրականացվեն հերկի և սկավառակման աշխատանքներ։ Հերկի միջոցով շերտեր կստեղծվեն, որպեսզի հրդեհը չտարածվի։ Հրշեջ ծառայության կողմից լրացուցիչ հենակետեր ենք տեղադրել, ինչպես նաև կսահմանվի տվյալ համայնքի բնակիչների շուրջօրյա հերթապահություն։ Այս միջոցառումներն իրականացնելու համար պետության կողմից տրամադրվելու են համապատասխան ֆինանսական միջոցներ։ Որոշման նախագիծն արդեն ներկայացված է Կառավարության հաստատմանը։
- Ի՞նչ նախնական ցուցանիշներ են գրանցվել բերքահավաքից և ի՞նչ կանխատեսումներ կարելի է անել։
- Օրերս փորձնական բերքահավաքի արդյունքում ունեցել ենք այդ տարածաշրջանի համար բավականին բարձր բերքատվության ցուցանիշներ։ Քանի որ մեր հարթավայրային գոտիներում տեղումների քանակը հիմնականում քիչ է, իսկ ջերմաստիճանային ֆոնը բարձր, այդ տարածքներում երաշտ է լինում կամ ցածր է բերքատվությունը։ Այս տարի նախնական հնձի տվյալներով՝ գարու միջին բերքատվությունը մեկ հեկտարից կազմել է 20-21, իսկ առանձին դաշտերում մինչև 24 ցենտներ։ Հաշվի առնելով բնակլիմայական պայմանները, այդ տարածքի համար սա բավականին լավ ցուցանիշ է։ Բերքատվության վրա դրական ազդեցություն են ունեցել նաև մարտ ամսում տեղացած ձյունը, աշնանացանի համար տրամադրված բարձրորակ սերմացուն, իսկ դաշտերը սնուցելու համար՝ ազոտական պարարտանյութը։ Կարծում եմ՝ այս տարվա ցուցանիշները նախորդ տարվա համեմատ ավելի բարձր են լինելու։
- Ի՞նչ միջոցառումներ են իրականացվում բերքի իրացման համար։
- Գյուղի և գյուղատնտեսության աջակցության հիմնադրամը բոլոր շրջաններում ունի համապատասխան պահեստներ, որտեղ իրականացվում է մթերումը։ Քանի որ անցած տարի քիչ բերք ենք ունեցել, ապա իմ կարծիքով, հանրապետությունում արտադրված հացահատիկը պետք է մնա այստեղ։ Այս տարվա կանխատեսումների համաձայն՝ եղած բերքը պետք է բավարարի ներքին պահանջարկը։ Իհարկե, եթե մենք անընդհատ բերքատվության բարձրացման ուղղությամբ աշխատենք, չեմ բացառում նաև արտահանումը։
- Պետության կողմից արդյո՞ք քայլեր են ձեռնարկվելու հացահատիկի գինը կարգավորելու համար։
- Ի դեմս Գյուղի և գյուղատնտեսության աջակցության հիմնադրամի, պետության կողմից սահմանվում է համապատասխան մթերման գին։ Գարու գինն արդեն սահմանված է, մոտ օրերս կսահմանվի նաև ցորենինը։ Կարծում եմ, հողօգտագործողների համար մթերման ձեռնտու գին է լինելու։ Որոշ մտավախություններ կան, որ ցորենի թանկ մթերման արդյունքը լինելու է ալյուրի և հացի գնի բարձրացումը։ Նման խնդիրները լուծելու համար քննարկումներ ենք իրականացնում, որպեսզի որոշակի միջոցներ ձեռնարկենք։
- Ի՞նչ հետևանքներ են առաջացել վերջերս տեղացած անձրևն ու կարկուտը։
- Նախնական տվյալների համաձայն՝ որոշակի վնաս է հասցվել բերքին, բայց կանխատեսվածից քիչ։ Վնասի աստիճանը ճշտելու գործընթացը շարունակվում է։
Աննա ԱԼԵՔՍԱՆՅԱՆ