Ստեփանակերտում բերքի տոն է կազմակերպվել
Այսօր Ամերիկայի Հայ Ավետարանչական ընկերակցության Արցախի գրասենյակի բակում կազմակերպվեց բերքի տոն, որին ընկերակցության Ասկերանի գրասենյակի տնօրեն Անահիտ Դանիելյանի գլխավորությամբ ակտիվ մասնակցություն են ցուցաբերել նաև «Շող» ցերեկային կենտրոնի և մանկապարտեզի աշխատողները: Իրենց բարձրորակ արտադրանքը ներկայացրին նաև Ասկերանի շրջանի գյուղմթերք արտադրողները, միաժամանակ ցույց տալով, որ վճռականությամբ լցված արցախցին նույն ոգով շարունակում է ապրել ու արարել իր հարազատ հողում: Մեղր, մուրաբաներ, մրգեր, լեռնային դեղաբույսերի փնջեր, ձու, կաթնամթերք, լոբի, մասուր, թթուների, պանրի, չրերի տեսականի, գինի, օղի, հյութեր և այլ տնական ու էկոլոգիապես մաքուր մթերք է ներկայացվել: Աշնանային գեղեցիկ օրը հագեցած էր ազգային երգ ու պարով և արցախյան ուտեստների հյուրասիրությամբ:
Կարինե Բախշիյան