ՄԱՐՏՈՒՆՈՒ ՇՐՋԱՆՈՒՄ ՇԱՐՈՒՆԱԿՎՈՒՄ ԵՆ ԳՅՈՒՂԱՏՆՏԵՍԱԿԱՆ ԱՇԽԱՏԱՆՔՆԵՐԸ
Կարինե ԴԱԴԱՄՅԱՆ
Չնայած Ադրբեջանի կողմից Արցախը Հայաստանին կապող միջանցքը փակելու հետևանքով ստեղծված իրավիճակին՝ Մարտունու շրջանում շարունակվում են գյուղատնտեսական աշխատանքները:
Այս մասին տեղեկացրեց Մարտունու շրջվարչակազմի աշխատակազմի Գյուղատնտեսության, հողաշինարարության և հողօգտագործման բաժնի վարիչ Ռոբերտ Վանյանը:
Հողի մշակության հետ կապված՝ աշնանացանի աշխատանքները շարունակվում են: Ներկայում կատարվել է ցանքսի մոտ 75 տոկոսը: Մնացած տարածքներն արդեն նախապատրաստված են ցանքսի համար, իսկ եղանակային պայմանները թույլ են տալիս շարունակել աշխատանքը:
Մեր զրուցակցի խոսքով՝ առկա է սերմացուի անհրաժեշտ պաշարը, տեխնիկան: Հողօգտագործողների մի մասն ունի որոշակի ծավալով դիզվառելիք, ովքեր կշարունակեն ցանքսը, մի մասն էլ դիզվառելիք չունենալու պատճառով խնդրի առջև է կանգնել:
Աշխատանքները շարունակվում են նաև ջերմատներում, որոնց մի մասը ջեռուցվում է և՛ գազով, և՛ էլեկտրականությամբ:
Անասնապահության ոլորտում խնդիրներ են առաջացել կերի հետ կապված, որի գերակշիռ մասը ներկրվում էր Հայաստանից: Չնայած ունեցած պաշարները դեռ բավարարում են, բայց առկա իրավիճակի երկարատև շարունակվելու դեպքում չեն բավականացնի:
Բաժնի վարիչը նշեց նաև, որ աշխատանքներ են տարվում հողօգտագործողներին և անասնապահներին ստեղծված իրավիճակում աջակցելու ուղղությամբ: Ուսումնասիրություն է իրականացվում՝ պարզելու առկա պաշարները և տնտեսությունների վիճակը, որպեսզի կարողանան կողմնորոշվել, թե ում ինչով հնարավոր կլինի օգնել: