ԱՇՆԱՆԱՑԱՆԻ ԱՇԽԱՏԱՆՔՆԵՐԻՆ ԼՈՒՐՋ ՈՒՇԱԴՐՈՒԹՅՈՒՆ
Հադրութի շրջանային խորհրդի նիստին, որը վարում էր վարչակազմի ղեկավար Վալերի Գևորգյանը, ներկայացված հարցերը հիմնականում առնչվում էին աշնանացանի կազմակերպմանը:
Նախ, օրակարգային հարցերի շարքում շրջվարչակազմի աշխատակազմի գյուղատնտեսության, հողաշինարարության և հողօգտագործման (ԳՀՀ) բաժնի վարիչ Աբրիկ Մարտիրոսյանը տեղեկություններ ներկայացրեց շրջանում 2014թ. բերքի տակ կատարվելիք աշնանացանի նախապատրաստական աշխատանքների մասին:
Ըստ ներկայացված տեղեկանքի՝ 2014թ. բերքի տակ նախատեսված է կատարել մոտ 7500 հա աշնանացան հացահատիկայինների ցանքս, որից 2500հա¬ն՝ սեփականաշնորհված և համայնքային վարձակալված տարածքներում, իսկ 5000 հա¬ն՝ պետական պահուստային վարձակալված վարելահողերում: Համայնքային սեփականաշնորհված և վարձակալված վարելահողերում կատարվել է ընդհամենը 1200հա հերկ, իսկ պետական պահուստային վարելահողերում՝ 3000 հա, որը դեռևս բավարար համարել չի կարելի: Եղանակային անբարենպաստ պայմանները հնարավորություն չեն տվել հերկի աշխատանքներ իրականացնել, որի հետևանքով շուրջ 3300 հա¬ի վրա հերկ չի կատարվել: Այս հանգամանքը դարձյալ խոսում է այն մասին, որ ցանքսերը կկատարվեն միավարի ձևով:
Համայնքային հողերում աշնանացան կատարելու համար նախատեսվում է պետական աջակցություն դիզվառելիքի տեսքով, շուկայականից ցածր գներով: Բաժնի վարիչը համայնքների ղեկավարներին առաջարկեց ներկայացնել պահանջվող դիզվառելիքի հայտերը: Աշնանացան սկսելու և այն սեղմ ժամկետներում ավարտելու գործում մեծ դեր ունի գյուղատնտեսական տեխնիկայի առկայությունը: Անցյալ տարվա համեմատությամբ զգալի ավելացել է նոր տեխնիկայի քանակը, որի ներկրումը շրջան շարունակվում է: Այսօրվա դրությամբ 138 թրթուրավոր և անվավոր տրակտորներից աշնանացանին պատրաստ են 112-ը, 96 գութաններից՝ 74-ը, 82 շարքացաններից՝ 66-ը, 44 կուլտիվատորներից՝ 36-ը: Նման քանակի տեխնիկան արդյունավետ օգտագործելու դեպքում ագրոտեխնիկական սեղմ ժամկետներում կավարտենք աշնանացանը, նշեց բաժնի վարիչը:
Ի դեպ, վերջերս Հադրութի շրջվարչակազմում ԼՂՀ վարչապետ Արա Հարությունյանի կողմից անցկացված աշխատանքային խորհրդակցությունում նա հստակ հանձնարարականներ է տվել համայնքների ղեկավարներին հողի մշակման, ցանքաշրջանառության վերաբերյալ, և հողօգտագործողներին մնում է առաջնորդվել այդ հանձնարարականներով: Շատ քիչ ժամանակ է մնացել գարու ցանքսերը կատարելու համար: Անդրադառնալով վարչապետի հանձնարարականներին՝ շրջվարչակազմի ղեկավարը նշեց, որ անհրաժեշտ է ձեռնարկել բոլոր միջոցները՝ մինչև հոկտեմբերի 15-ը ավարտին հասցնելու գարու ցանքսը, իսկ հոկտեմբերի 20-ից սկսել ցորենի ցանքսի աշխատանքները: Աշնանացան կատարելու համար կտրամադրվի դիզվառելիք: Ժամանակն է, որ կատարվեն նաև վարելահողերի պարարտացման աշխատանքները։
ՙ2013թ. պետական պահուստային վարելահողերի վարձակալության տրամադրման և վարձավճարների գանձման ընթացքի մասին՚ ներկայացված տեղեկանքում ԳՀՀ բաժնի վարիչը նշեց, որ 2013թ. սեպտեմբերի 1-ի դրությամբ շրջանի ՊՊՀ-ից վարձակալությամբ տրամադրվել են 6685 հա հողատարածքներ, որից 5577 հա վարելահող, 155 հա խաղողայգի, 885 հա արոտավայր, 58 հա խոտհարք, 6 հա թթենու այգի և այլն։ Միայն 2013թ. անցած ժամանակահատվածում վարչակազմի ղեկավարի որոշմամբ վարձակալությամբ տրամադրվել է 1716 հա վարելահող, որից պետական գրանցում է ստացել 1656 հա-ն: 9 ամսվա ընթացքում միակողմանի չեղյալ է համարվել հողի վարձակալության 17 պայմանագիր:
Հողերի վարձավճարների գանձման ուղղությամբ տարվող աշխատանքները դեռևս բավարար համարել չի կարելի: 2013թ. սեպտեմբերի 1-ի դրությամբ վարձավճարների ընդհանուր ապառքը կազմում է 72 մլն դրամ: 2013թ. անցած ժամանակահատվածում հավաքագրվել է 16 մլն 300 հազար դրամ։ Վարձավճարների գանձման նպատակով 74 հողօգտագործողների նկատմամբ 33 մլն 714 հազար դրամի հայց է ներկայացվել դատարան, վերջինիս վճիռներով գանձվել է 13 մլն 279 հազար դրամ։ 2013թ. հոկտեմբերի 1-ից սկսված է վարձավճարների հաշվարկը, որի մասին կտեղեկացվի հողօգտագործողներին, նշեց Ա. Մարտիրոսյանը։
Վարչակազմի աշխատակազմի ղեկավար Վ. Գասպարյանը ներկայացրեց ՙ2013թ. բերքի տակ շրջանին տրամադրված փոխառությունների մարման ընթացքի մասին՚ հարցը: Ըստ ներկայացված տեղեկանքի՝ ԼՂՀ գյուղի և գյուղատնտեսության աջակցության հիմնադրամի կողմից հատկացված 52 մլն 686 հազար դրամ փոխառություններից մարվել է 32 մլն 796 հազար դրամը:
Ներկայացված հարցերի առթիվ շրջվարչակազմի ղեկավարն արտահայտեց իր մտահոգությունները և համայնքների ղեկավարներից պահանջեց ձեռնարկել հնարավոր բոլոր միջոցները մարելու տրամադրված փոխառությունները:
Շրջանային խորհրդի նիստի քննարկմանը ներկայացվեցին մի շարք այլ հարցեր։
Նիստի աշխատանքներն ամփոփեց շրջվարչակազմի ղեկավարը։ Նա ներկաների ուշադրությունը հրավիրեց հոկտեմբերի 13-ին Ստեփանակերտ քաղաքում կազմակերպվող բերքի տոնին և համայնքների ղեկավարներին առաջարկեց ակտիվ մասնակցություն ցուցաբերել այդ միջոցառմանը:
Էդիկ ԴԱՎԹՅԱՆ
ք. Հադրութ