ԳՅՈՒՂԱՏՆՏԵՍՈՒԹՅՈՒՆԸ՝ ԳՅՈՒՂԻ ԶԱՐԳԱՑՄԱՆ ԿԱՐԵՎՈՐ ՊԱՅՄԱՆ
Հեծանիվ հայտնագործած չենք լինի, եթե ասենք, որ գյուղի զարգացման տնտեսական հիմքը եղել և մնում է գյուղատնտեսությունը: Բավական է նշել, որ մոտավոր հաշվարկներով համախառն ներքին արդյունքում նրա ծավալը կազմում է մոտ 37տոկոս: Գյուղատնտեսության հետագա զարգացման ուղղությամբ ի՞նչ է արվել և ի՞նչ հեռանկարներ կան Հադրութի շրջանում. հարցի առթիվ հարցազրույցի ենք հրավիրել շրջվարչակազմի աշխատակազմի գյուղատնտեսության, հողաշինարարության և հողօգատգործման բաժնի վարիչ Աբրիկ ՄԱՐՏԻՐՈՍՅԱՆԻՆ։
¬Պարոն Մարտիրոսյան, ինչպե՞ս եք գնահատում գյուղատնտեսության բնագավառում իրականացվող աշխատանքների արդյունավետությունը:
¬ 2013 թվականին դարձյալ հիմնական ուշադրությունը դարձրել ենք հացահատիկային մշակաբույսերին, գարնանացանին, անասնագլխաքանակի ավելացմանը և նրա մթերատվության բարձրացմանը։ Ընթացիկ տարվա բերքի տակ կատարել ենք 7900 հա հացահատիկայինների հունձ, որից 4068 հա ցորեն, 3832 հա գարի: Ստացվել է 16900 տոննա համախառն բերք, հեկտարի միջին բերքատվությունը կազմել է 21 ցենտներ: Ստացված բարձր բերքն ապահովվել է աշնանացանի՝ ագրոտեխնիկական ժամկետներում և որակով կատարման շնորհիվ: Ժամանակին կատարվել են խնամքի բոլոր միջոցառումները: Որոշակի աշխատանքներ են տարվել հողային ֆոնդի նկատմամբ վերահսկողության և նրա արդյունավետ օգտագործման ուղղությամբ: Շրջանի վարչական սահմաններում առկա են 7545,46 հա վարելահողեր, որից սեփականաշնորհված է 3457,38 հա, վարձակալված՝ մոտ 850 հա: Համայնքային վարչական սահմաններից դուրս հողերից վարձակալությամբ տրամադրվել է 6685 հա, որից 5577 հա-ն վարելահողեր են, 155 հա-ն՝ խաղողայգի, 885 հա-ն՝ արոտավայր, 58 հա-ն՝ խոտհարք, 6 հա-ն՝ թթենու այգի: Միայն տարվա անցած ժամանակահատվածում շրջվարչակազմի ղեկավարի որոշմամբ վարձակալությամբ տրամադրվել է 1716 հա վարելահող: Միակողմանի չեղյալ է համարվել հողի վարձակալության 17 պայմանագիր:
¬ Շրջանում ին՞չ աշխատանքներ են տարվում մշակաբույսերի տեսականին ավելացնելու և ցանքաշրջանառության ուղղությամբ:
¬ Վերջին 10 տարիների ընթացքում ցանքաշրջանառության ուղղությամբ որոշակի աշխատանքներ իրականացվել են: Գարնանացանի ցանքսերն ավելացել են ավելի քան 4 անգամ: Այսօր հողի մշակման նոր մեթոդներ են պահանջվում, և բարձր բերքի ապահովման համար հողօգտագործողն իր առջև նոր խնդիրներ և պահանջներ է դնում: 2013թ. շրջանում գարնանացանի տակ կատարվել է 1786 հա հերկ, որից մոտ 504 հա թողնվել է սև ցելի տակ: 1294 հա-ի վրա կատարվել է գարնանացան: Ցանվել է 77 հա հաճար, 568՝ եգիպտացորեն, 151՝ կարտոֆիլ, 200՝ արևածաղիկ, 53՝ սորգո, 109՝ կորնգան, 6 սոյա, 129 հա բանջարեղեն: Այս մշակաբույսերը ցանքաշրջանառության մեջ ներգրավելով նպաստում են հողի բերքատվության ցուցանիշի բարելավմանը:
¬ Ի՞նչ աշխատանքներ եք իրականացնում 2014թ. բերքի տակ աշնանացան կատարելու ուղղությամբ:
¬ Աշնանացանի նախապատրաստման ուղղությամբ տարվող աշխատանքներին անդրադարձել ենք դեռևս ս.թ. սեպտեմբերին: Նախատեսված է 2014թ. բերքի տակ կատարել 7500 հա աշնանացան, որից 2500 հա համայնքային սեփականաշնորհված և վարձակալված, իսկ 5000 հա՝ պետական պահուստային վարելահողերում:
Համայնքային վարելահողերում աշխատանքներն արագ տեմպերով են ընթանում, որին խթան է հանդիսացել ԼՂՀ գյուղի և գյուղատնտեսության աջակցության հիմնադրամից մատչելի գնով հատկացված 150 տոննա դիզվառելիքը: Հացահատիկայինների ցանքսի աշխատանքներն այս օրերին արագ թափով են ընթանում ինչպես հարթավայրային գոտում, այնպես էլ համայնքային տարածքներում: Մաքրվել և թունախեղդվել է մոտ 500 տոննա գարու և ցորենի սերմնացու, որը հնարավորություն կտա ցանքս կատարել շուրջ 2500 հա տարածքի վրա: Հերկի և ցանքսի աշխատանքները շարունակվում են:
¬ Ինչպիսի՞ն է անասնապահության վիճակը շրջանում։
- Շրջանում գործում է Բանաձորի և Ուխտաձորի ենթաշրջանների համայնքների զարգացման ծրագիրը: Այդ ծրագրի շրջանակներում Բանաձորի և Ուխտաձորի ենթաշրջանի համայնքներում անասնագլխաքանակի աճ է գրանցվել: Ավելացել է ինչպես խոշոր եղջերավոր, այնպես էլ մանր եղջերավոր անասունների գլխաքանակը:
2013թ. հունվարի 1-ի դրությամբ շրջանում առկա են 7696 գլուխ խոշոր եղջերավոր, 8059 գլուխ մանր եղջերավոր անասուններ, 3277 գլուխ խոզ, 39026 թև թռչուն: 2012թ. հունվարի 1-ի ցուցանիշների հետ համեմատումը ցույց է տալիս, որ շրջանում անասնագլխաքանակի զգալի աճ է գրանցվել: Անասնագլխաքանակի և մթերքների արտադրությունում կունենաինք ավելի մեծ աճ, եթե չլինեին որոշ հիվանդություններ (բրուցելյոզ, աֆրիկյան ժանտախտ), որոնց վերացման ուղղությամբ զգալի աշխատանքներ են տարվել: Անասնապահության զարգացման համար շրջանում պետք է ունենալ անասնապահական մթերքների իրացման կետ (մսի և կաթի մթերում): Տեղերում լինելուց պարզվում է, որ բնակչության կողմից անասունների ձմեռման համար համապատասխան քանակի կերեր են կուտակվել (ծղոտ, խոտ):
¬Ի՞նչ աշխատանքներ են տարվում նախկինում վերցված վարկերի մարման ուղղությամբ:
¬ Խնդրի կարևորությունից ելնելով՝ հաճախակի ենք անդրադարձել նախկինում վերցրած վարկերի մարմանը: 2008-2013թթ. աշնանացանի, պարարտանյութերի, տարբեր տեսակի սերմերի, դիզվառելիքի ձեռքբերման նպատակով շրջանի հողօգտագործողներին հատկացված անտոկոս վարկերի մնացորդը կազմում է 420 մլն 374 հազար դրամ, որից ժամկետանց վարկեր՝ 150 մլն 706 հազար դրամ: Անասնապահության զարգացման ծրագրով ապառքը կազմում է 64 մլն 312 հազար դրամ, այդ թվում ժամկետանց վարկեր՝ 12 մլն 481 հազար դրամ: Աշխատանքներ են տարվում ժամկետանց վարկերը ժամանակին մարելու համար: 2012-2013թթ. հողերի վարձակալության վարձավճարները ժամանակին չմուծելու հետևանքով դատարան է ներկայացվել 126 գործ, ստացել ենք 125 վճիռ, 1 գործ ընթացքի մեջ է: Դատարանի կայացած վճիռներով հավաքվել է 27 մլն 896 հազար 221 դրամ: Ս. թ. հոկտեմբերի 1-ի դրությամբ վարձավճարների գծով պարտավորությունները կազմում են 100 մլն 121 հազար դրամ, որից ապառքը՝ 77 մլն 113 հազար դրամ, տուգանքը՝ 23 մլն 800 հազար դրամ:
¬ Ինչպիսի՞ն է գյուղտեխնիկայի վիճակը։
¬ Շրջանում առկա են 138 թրթուրավոր և անվավոր տրակտոր, 96 գութան, 82 շարքացան, 44 կուլտիվատոր, 10-ից ավելի խոտհնձիչ: Վերջին երկու տարվա ընթացքում զգալիորեն թարմացվել է գյուղատնտեսական տեխնիկան, լիզինգով ձեռք են բերվել տրակտորներ, կոմբայններ: Չնայած առկա տեխնիկայի զգալի քանակին, դրա մեծ մասը հին է և ֆիզիկապես ու բարոյապես մաշված: Պահեստամասերի պակասը և թանկ գները հնարավորություն չեն տալիս տեխնիկան ժամանակին վերանորոգել:
2013թ. բերքի տակ հունձ կատարելու նպատակով կոմբայնները վերանորոգելու համար ԼՂՀ գյուղի և գյուղատնտեսության աջակցության հիմնադրամից վարկի տեսքով հատկացվել է 5 մլն դրամ:
¬ Օրերս ԼՂՀ Նախագահ Բակո Սահակյանը փոխվարչապետ Արթուր Աղաբեկյանի և պաշտոնատար այլ անձանց հետ աշխատանքային խորհրդակցություն էր հրավիրել Հադրութի վարչակազմում: Սոցիալ-տնտեսական հարցերի շարքում ի՞նչ խնդիրներ են առաջ քաշվել գյուղատնտեսության զարգացման համար :
¬ Գյուղատնտեսությանն առնչվող հիմնական հարցը, որի վրա ծավալվել է ԼՂՀ Նախագահը, դա մերձարաքսյան տարածքում գյուղատնտեսական ծրագրերի իրականացումն է: Բ. Սահակյանը նշել է, որ այս տարածքի շենացումը մեծապես կնպաստի ոչ միայն Հադրութի շրջանի, այլև ողջ հանրապետության գյուղատնտեսության զարգացմանը: Այդ առթիվ հանրապետության նախագահը մի շարք հանձնարարականներ է տվել շահագրգիռ կազմակերպություններին:
Էդիկ ԴԱՎԹՅԱՆ
ք. Հադրութ