[ARM]     [RUS]     [ENG]

Կայացած ՏԻՄ ընտրությունները վերահաստատել են Արցախի ժողովրդի հավատարմությունը սեփական ճակատագիրը տնօրինելու ժողովրդավարական ճանապարհին

2021 թվականի հոկտեմբերի 10-ին Արցախի Հանրապետության 4 համայնքներում՝ Ասկերանի շրջանի Խաչմաչ և Ծաղկաշատ, Մարտակերտի շրջանի Նոր Ղազանչի և Մարտունու շրջանի Հերհեր համայնքներում անց են կացվել տեղական ինքնակառավարման մարմինների՝ համայնքի ղեկավարի և ավագանու անդամների ընտրություններ։
Ընտրական իրավունքների իրացման և ընտրական օրենսդրության պահպանման տեսանկյունից չափազանց կարևոր է ընտրությունները լուսաբանող լրատվամիջոցների ներկայացրած տեղեկատվությունը և դիտորդական կազմակերպությունների գնահատականները։ Ընտրությունները լուսաբանել են 27 լրագրողներ, իսկ դրանց ընթացքը վերահսկել են մի շարք դիտորդական կազմակերպությունների 17 ներկայացուցիչներ, որոնց ներկայացրած ամփոփումները արձանագրում են, որ ընտրությունները, ընդհանուր առմամբ, ընթացքել են սահուն, առանց խոչընդոտների՝ ԱՀ ընտրական օրենսգրքի նորմերին և միջազգային ստանդարտներին համապատասխան։
2020 թվականի աշնանը Արցախի խաղաղ բնակչության դեմ սանձազերծված ագրեսիայից հետո սա Արցախում կազմակերպված առաջին ընտրական պրոցեսն է։ Այն առանձնահատուկ կարևորություն ունի այն իմաստով, որ վերահաստատում է Արցախի ժողովրդի հավատարմությունը սեփական ճակատագիրը տնօրինելու՝ անկախությունից ի վեր որդեգրած ժողովրդավարական ճանապարհին՝ երաշխավորելով միջազգային կոնվենցիաներով և ներպետական օրենդրությամբ ամրագրված մարդու կարևորագույն քաղաքական իրավունքներից մեկը՝ ընտրական իրավունքը։
Արցախյան շարժումը, Արցախի Հանրապետության անկախության հռչակումը, պետականաշինության 30-ամյա ճանապարհը բյուրեղացրել են մեր ժողովրդի հանձնառությունը՝ առաջնորդվելու ժողովրդավարական արժեքներով և մարդու իրավունքների լիակատար հարգման և պաշտպանության օրակարգով։
 
Այս մասին իր ֆեյսբուքյան էջում գրել  է ԱՀ ՄԻՊ Գեղամ Ստեփանյանը