Փրկարար. մասնագիտությո՞ւն
Անի Մանգասարյան
Հոտեմբերի 30-ը Արցախի փրկարար ծառայողի մասնագիտական օրն է: Փրկարարի աշխատանքն առավել ընդգծված էր պատերազմի ժամանակ: Զինադադարից հետո էլ ԱԻ պետական ծառայությունն ստանձնեց ամենաբարդ առաքելությունը: Նախ՝ Արցախի գրավյալ տարածքներում իրականացնել որոնողական աշխատանք, տարհանել աճյուններ ու մասունքներ, չպայթաց զենք-զինամթերքից մաքրել խաղաղ բնակավայրերը, դրանց հարող տարածքները: Դրան զուգահեռ՝ ժամանակին արձագանքել բոլոր կանչերին և փրկել կյանքեր: Հասարակությունը գնահատում և կարևորում է փրկարարի առաքելությունը: Փրկարարի օրվա առթիվ ,,Ազատ Արցախ,,-ը զրուցել է ԱՀ ՆԳ նախարարության տեղեկատվության և հասարակայնության հետ կապերի բաժնի պետ Հունան Թադևոսյանի հետ:
Փրկարար. օրվա խորհուրդը
Ցանկացած մասնագիտական օր յուրահատուկ հաշվետվություն է, առիթ՝ ևս մեկ անգամ բոլորի ուշադրությունը հրավիրել այդ ոլորտին, արժևորել կատարածը, գնահատել նվիրյալներին: Օրը տոնական նոտաներով պիտի սկսվեր, բայց Հայրենիքին պատուհասած աղետը խոշոր հաշվով դեռ շարունակվում է:
Պատերազմում…
Համակարգի բոլոր ծառայողները հերոսաբար իրենց դրսևորեցին այս պատերազմում: Կապ չուներ ժամն ու վտանգը. նրանք այնտեղ էին, որտեղ հրթիռակոծություն էր: Իրադարձությունները շատ արագ էին զարգանում և մենք հայտնվել էինք սկզբունքորեն նոր իրականության մեջ, այսինքն՝ պատերազմական գործողություններն առաջնագծից, ըստ էության, տեղափոխվել էին թիկունք: Թիրախավորվում էին բնակավայրերը, քաղաքացիական օբյեկտները, սոցիալ-մշակութային օբյեկտները և խաղաղ բնակչությունը։ Փրկարար ծառայողի շնորհիվ բազմաթիվ կյանքեր փրկվեցին, մեծ մասը՝ քաղաքացիական բնակչության շրջանում:
Հոգեբանական խնդիրներ. Ինչպե՞ս է հաջողվում հաղթահարել
Հոգեբանական ամենաբարդ աշխատանքը, երևի, սկսվեց պատերազմից հետո: Երբ որոնողափրկարարական աշխատանքներն սկսեցինք Ադրբեջանի հսկողության տակ անցած տարածքներում: Բայց, քանի որ փրկարար ծառայողը հրաշալի է տիրապետում իր պարտականություններին, որի մաս է կազմում նաև սառնասրտությունը, ամեն ինչ հաղթահարելի է դառնում: Այսինքն, չնայած կորուստներին, մեծ դժվարություններին՝ մենք պահպանում էինք սառնասրտություն, զգոնություն: Այդ օրերին հետևում էինք իրավիճակից բխող հրամաններին, միասնաբար գործելու կարգադրություններին:
Արցախի փրկարարի առանձնահատկությունը
Ինչպես արցախցին, այնպես էլ Արցախի փրկարարը միշտ էլ տարբերվել է: Երևի աշխարհագրական բարդ տարածաշրջանը և մարտահրավերներով լի ժամանակաշրջանի թելադրանքով է այդպես: Եթե այլ երկրներում հանրությունը փրկարար ծառայողին գոհունակություն է հայտնում իր կանչին արձագանքելու համար, ապա մեզ մոտ պատկերն այլ է: Փրկարար լինելուց առաջ ԱԻ ծառայողը մարտիկ է, եղբայր է ու ընկեր:
Փրկարարն ու զինվորականը
Երկու ոլորտների ծառայության մատուցումը երկրի ներքին ու արտաքին անվտանգությանն է միտված: Բայց, գործառույթներով տարբեր են: Բանակն առաջնագծում է, փրկարարը թիկունքի զինվորն է: Բայց, այս պատերազմում փրկարարները նաև առաջնային գծում են աշխատել: Համագործակցելով պաշտպանության և առողջապահության նախարարությունների հետ, ռազմադաշտից տարհանում էին զոհված մարտիկների մարմիններն ու վիրավորված հայրենիքի պաշտպաններին:
Հետպատերազմյան իրավիճակ
Հիմա մեջքն ուղղելու, գոտին պինդ ձգելու և առաջ նայելու ժամանակն է: ՆԳ նախարար Կարեն Սարգսյանը ոլորտում սկսել է բարեփոխումների ծրագիր: Վերանորոգվում են պատերազմի հետևանքով վնասված շենք-շինությունները, թարմացվել է նյութատեխնիկական բազան: Ստեղծվում են բոլոր պայմանները, փրկարար ոլորտն ամրապնդելու ուղղությամբ:
Փրկարար. մասնագիտությո՞ւն
Փրկարարը մասնագիտություն չէ, այլ՝ ապրելակերպ: Սա մի առաքելություն է, որի հիմքում ընկած է մարդասիրության արժեքը, բարությունն ու լավությունը: Կյանքի հաշվին կյանքեր փրկելը՝ խոսքից, գործից առավել սխրանք է: Ուրախ եմ, որ ճակատագրի բերումով ճիշտ ժամանակին հայտնվել եմ մի տեղում, որտեղ պետք է գործի դնեի մասնագիտական կարողությունս: Երբ ծառայում ես ոլորտում, շփվում իսկական փրկարարների հետ՝ միանշանակ, տեսակով դառնում ես իրենցից մեկը: Այդպես եղավ 44 օրերի ընթացքում: Մեր աշխատանքից զատ, իրավիճակի թելադրանքով նաև փրկարարական աշխատանքներին էինք մասնակից դառնում:
Հաղորդավար , լրագրող, հանդիսավար Հունանը պատերազմի օրերին …
… դարձավ պատերազմի ականատեսն ու պատերազմող երկրից լուրեր հաղորդողը: Իրականում ես կարծում էի չեմ դիմանա այդ ամենին: Բայց, պատերազմի առաջին օրից մինչև ավարտը փրկարար ծառայողների հետ չենք լքել Ստեփանակերտը և մեր մյուս բնակավայրերը: Անգամ կորսված բնակավայրերը վերջին լքողները եղել են փրկարար ծառայողները: Մտնելով համակարգ՝ ավելացավ պատասխանատվությունս, սերը հայրենիքի ու ժողովրդի հանդեպ: Անգամ իմ բնավորության գծերում են փոփոխություններ նկատում:
ՆԳ նախարարության կազմում փրկարարը շարունակում է իր ամենօրյա աշխատանքը՝ պահպանելով երկրի կայունությունն ու ներքին անվտանգությունը:
