Ասկերանի ՄՊՍԿ-ն ծանրոցներ է ուղարկել առաջնագծի զինվորներին
Ասկերանի մանկապատանեկան ստեղծագործական կենտրոնի տնօրինության նախաձեռնությամբ խմբակավարները ծանրոցներ են պատրաստել մեր հայրենյաց պաշտպանների համար: Ասկերանի ՄՊՍԿ աշխատողներն իրենց պատրաստած տաք ուտեստները, համեմված սիրով և աղոթքով, ուղարկեցին մարտական դիրքեր: Կենտրոնի տնօրեն Նարինե Պետրոսյանը հուզմունքով էր խոսում նախաձեռնության մասին. «Խոնարհվում ենք մեր վտանգված հայրենիքը պաշտպանող բոլոր հայորդիների առջև: Անտեսելով ամեն ինչ՝ նրանք օրուգիշեր սահման են պահում, անմնացորդ նվիրումով կատարում իրենց առաքելությունը: Մեր այս փոքրիկ նախաձեռնությունն իրականություն է դարձել կոլեկտիվի անձնական միջոցներով: Մեր պաշտպաններն զգալով իրենց թիկունքն ամուր, ավելի վստահաբար կկանգնեն մայր հողին՝ մշտարթուն պաշտպանելով մեզ»,-ասաց մեր զրուցակիցը:
Կարինե ԲԱԽՇԻՅԱՆ