Error
  • JLIB_APPLICATION_ERROR_COMPONENT_NOT_LOADING
  • Error loading component: com_content, 1
  • Error loading component: com_content, 1

«ՄԻՆ ԿԱՐԳԵՆ ՏԸՂ». ԶԲՈՍԱՅԳԻ ՈՒ ԽԱՂԱՀՐԱՊԱՐԱԿ ՔԵՐԹ ԳՅՈՒՂՈՒՄ

 

Մարտունու շրջանի Քերթ համայնքում  «Դասավանդի՛ր, Հայաստան»-ի ուսուցիչ-առաջնորդներ Վիտալի և Արևիկ Պետրոսյանները ձեռնամուխ են եղել  հերթական ծրագիրը կյանքի կոչելուն: Նրանց նախաձեռնությամբ գյուղում նախատեսվում է  կառուցել զոհված ազատամարտիկների հիշատակին նվիրված զբոսայգի և մանուկների ու պատանիների համար նախատեսված խաղահրապարակ: Այդ նպատակով արդեն մեկնարկել է  դրամահավաք:

Աշխատանքները տարվում են դպրոցի աշակերտների հետ համատեղ: 

Վ. Պետրոսյանի խոսքով՝ ծրագրի իրականացմանն աջակցելու են Մարտունու շրջանի վարչակազմն ու Քերթի համայնքը:

Նախագծման ընթացքում համագործակցել են Քերթի համայնքի ղեկավար Գեղամ Լալայանի հետ, ով խոստացել է կազմակերպել տեղանքի  հարթեցման աշխատանքները:

Մարտունու շրջվարչակազմի ղեկավար Էդիկ Ավանեսյանն էլ պատրաստակամություն է հայտնել օժանդակել տեխնիկական միջոցներով և աջակցել դրամահավաքի ընթացքին: 

  Վ. Պետրոսյանը նշում է, որ համայնքում բացակայում են հասարակության հանգստի  պայմանները, իսկ նման ծրագրերի իրագործմամբ  այս վայրերը կծառայեն ոչ միայն հանգստի ու խաղերի կազմակերպմանը, սթրեսի հաղթահարմանը, այլ նաև` անցյալի արժևորմանը: Ե՛վ զբոսայգու, և՛ խաղահրապարակի կառուցումն ունեն նաև կրթական նպատակներ:

Զբոսայգին նվիրված է լինելու արցախյան պատերազմների ընթացքում զոհված քերթեցիների հիշատակին. տարածքում նախատեսվող ծառերը կրելու են նահատակված տղաների անվանական հուշատախտակները: Այստեղ պարբերաբար կազմակերպվելու են ռազմահայրենասիրական դասեր, տարբեր միջոցառումներ:

Ինչ վերաբերում է խաղահրապարակին, լինելու են ինչպես փոքրերի, այնպես էլ մեծերի համար նախատեսված սարքավորումներ ու կահավորանք:

                Նախահաշվարկով՝ ծրագրի իրականացման համար անհրաժեշտ է 14 միլիոն 500 հազար ՀՀ դրամ: