ՖԻԶԻՈԹԵՐԱՊԻԱՅԻ ՍԵՆՅԱԿ` ՔԵՐՈԼԱՅՆ ՔՈՔՍԻ ԱՆՎԱՆ ՎԵՐԱԿԱՆԳՆՈՂԱԿԱՆ ԿԵՆՏՐՈՆՈԻՄ
Ստեփանակերտի Քերոլայն Քոքսի անվան վերականգնողական կենտրոնում բացվել է ֆիզիոթերապիայի սենյակ, որը վերանորոգվել և կահավորվել է ԱՄՆ Արևմտյան ափի Հայ Օգնության Միության շրջանային վարչության կողմից:
Ֆիզիոթերապիայի սենյակը կօգտագործվի վերականգնողական բուժման և կանխարգելման, ինչպես նաև առողջացման նպատակով:
Առաջիկայում սենյակի համար նախատեսվում է ձեռք բերել նաև պրոֆեսիոնալ տեխնիկա:
ԱՄՆ Արևմտյան ափի Հայ Օգնության Միության շրջանային վարչության գրասենյակի տնօրեն Ժասմին Բունիաթյանի խոսքով՝ մեծ աշխատանք է կատարվել, որպեսզի վերականգնողական կենտրոնն ունենա նման հնարավորություն:
1998 թվականին բացված հաստատությունը փորձում է ֆիզիկական տարբեր խնդիրներ ունեցող մարդկանց վերադարձնել լիարժեք կյանքի։ Այսօրվա դրությամբ կենտրոնը տարեկան սպասարկում է ավելի քան 1500 քաղաքացու։
Վերջին տարիներին կենտրոնում բացվել է նաև աուտիզմի բաժանմունք, մանկական առողջության կենտրոն, որը գործում է որպես մանկապարտեզ` համապատասխան մասնագետների աջակցությամբ:
Ստեփանակերտի վերականգնողական կենտրոնի տնօրեն Վարդան Թադևոսյանը մեզ հետ զրույցում ասաց, որ տարբեր հիմնադրամների եւ ծրագրերի համագործակցության շնորհիվ քայլ առ քայլ բարելավվում են պայմանները։
Սերգեյ ՍԱՖԱՐՅԱՆ