Սյունիքի մարզպետարանի օպերատիվ շտաբին ճանապարհին մնացած արցախցիները դիմել են կեցության և առողջապահական խնդիրներով
Այս օրերին Սյունիքի մարզպետի որոշմամբ ստեղծված օպերատիվ շտաբում գրանցվել է մոտ 400 զանգ. Արցախի Հանրապետության ճանապարհին մնացած քաղաքացիները հիմնականում դիմել են կեցության ապահովման և առողջապահական հարցերով: Այս մասին մեզ հետ զրույցում ասաց Սյունիքի մարզպետարանի գլխավոր քարտուղար Էդգար Մարտիրոսյանը:
«Այս պահին 280 քաղաքացի տեղակայված է Գորիսի հյուրանոցներում: Սա ճանապարհին մնացած քաղաքացիների հստակ թիվը չէ: Ըստ տեղեկությունների՝ մի մասը մեկնել է ՀՀ այլ բնակավայրեր, մի մասը ժամանակավոր ապաստանել է Գորիսում՝ ծանոթ-բարեկամների տանը: Օպերատիվ շտաբ դիմած բոլոր քաղաքացիների կեցության, սննդի և առողջության հետ կապված խնդիրները լուծված են»,-նշեց Էդգար Մարտիրոսյանը: Նրա խոսքով՝ տեղական և միջազգային տարբեր կազմակերպություններ են իրենց աջակցությունը հայտնել:
«Սյունիքը կանգնած է Արցախի կողքին և պատրաստ է մինչև միջանցքի բացվելը ապահովել Գորիսում ապաստանած արցախցիների կարիքները: Պայմանավորվածություն է ձեռք բերվել անհրաժեշտության դեպքում դիմել ՀՀ կառավարությանը և օգնություն առաջարկող կազմակերպությունների,- ասաց մարզպետարանի գլխավոր քարտուղարը՝ նշելով, որ ամենօրյա ռեժիմով կապ են պահում Արցախի Հանրապետության կառավարության համապատասխան պաշտոնյանների, ինչպես նաև Արցախում ստեղծված օպերատիվ շտաբի հետ:
Արցախը Հայաստանին կապող միակ մայրուղին փակ լինելու հետևանքով Սյունիքի մարզպետի որոշմամբ դեկտեմբերի 13-ին մարզպետարանում ստեղծվել է օպերատիվ շտաբ՝ ուղևորների համար առաջացող խնդիրների լուծման աշխատանքը համակարգելու նպատակով: Շուրջօրյա գործող թեժ գծի հեռախոսահամարն է 093 25-08-08:
ԱԱ