Խորհրդարանի նախագահը ընդունել է «Հայաստանի եվրոպացի բարեկամներ» կազմակերպության տնօրենին

Ողջունելով հյուրերին՝ խորհրդարանի նախագահը ընդգծել է պարբերական հանդիպումների կարևորությունը՝ տարբեր հարցերի շուրջ մոտեցումները տարածաշրջանային և միջազգային նոր իրողություններին համապատասխանեցնելու և առաջնահերթությունները վեր հանելու տեսանկյունից:

Շնորհակալություն հայտնելով ընդունելության համար՝ Դիոգո Պինտոն ուրախությամբ հայտնել է, որ կազմակերպությանը հաջողվել է արդյունավետ աշխատանք տանել նախորդ հանդիպման ժամանակ քննարկված հարցերի ուղղությամբ՝ մասնավորապես առանձնացնելով Արցախի սահմանադրական բարեփոխումների վերաբերյալ եվրոպացի պաշտոնյաների մասնակցությամբ Բրյուսելում տեղի ունեցած միջոցառման կազմակերպումը:

Հանդիպման ընթացքում կողմերը մտքեր են փոխանակել եվրոպական երկրներում վերջին շրջանում տեղի ունեցող զարգացումների, Արցախյան հակամարտության կարգավորման հեռանկարների և այս ուղղությամբ տարվող աշխատանքների շուրջ: Միաժամանակ անդրադարձ է կատարվել Եվրոպայում Արցախը մարդասիրական տեսանկյունից ներկայացնելու և երկրի բնականոն կյանքը եվրոպացիներին հասանելի դարձնելու անհրաժեշտությանը:

«Կարծում եմ, որ Արցախն ունի շատ ավելի կարևոր կողմեր, որոնց մասին Եվրոպան պետք է իմանա: Մենք աշխատում ենք այդ ուղղությամբ՝ ցույց տալու համար, որ հակամարտությունից բացի կա երկիր, որտեղ մարդիկ ապրում են, սովորում են, աշխատում են, գերազանց արտադրանք են տալիս»,- ընդգծել է Դիոգո Պինտոն:

Բարձր գնահատելով «Հայաստանի եվրոպացի բարեկամներ» կազմակերպության կատարած աշխատանքները՝ խորհրդարանի նախագահը հույս է հայտնել, որ նման այցերը շարունակական կլինեն և հիմք կհանդիսանան համագործակցությունը կոնկրետացնելու և ընդլայնելու համար:

Հանդիպմանը մասնակցել է Արցախի Հանրապետության ԱԺ արտաքին հարաբերությունների մշտական հանձնաժողովի նախագահ Արզիկ Մխիթարյանը: