ԱՀ ՈՍՏԻԿԱՆՈՒԹՅԱՆ ՕՊԵՐԱՏԻՎ ԱՄՓՈՓԱԳՐԵՐ
Ըստ Արցախի Հանրապետության ոստիկանության օպերատիվ ամփոփագրերի` ս.թ. հուլիսի 10-17-ն ընկած ժամանակահատվածում հանրապետության տարածքում արձանագրվել է մարմնական վնասվածքի առաջացմամբ ճանապարհատրանսպորտային 2 պատահար, ինչի հետևանքով 2 քաղաքացի ստացել է մարմնական վնասվածքներ։
Հուլիսի 14-ին, ժամը 13։00-ի սահմաններում, Վանք-Ստեփանակերտ ավտոճանապարհի 6-րդ կիլոմետրին, 1978թ. ծնված Ասկերանի շրջանի բնակիչը, վարելով իրեն պատկանող ՙՕպել Աստրա՚ մակնիշի ավտոմեքենան, բախվել է աջակողմյա հողաթմբին և կողաշրջվել, ինչի հետևանքով ուղևոր՝ 1978թ. ծնված Ասկերանի շրջանի բնակչուհին, ստացած մարմնական վնասվածքով տեղափոխվել է Հանրապետական բժշկական կենտրոն։
Նախնական տվյալներով վթարի պատճառ է հանդիսացել ՙՕպել Աստրա՚ մակնիշի ավտոմեքենայի վարորդի անզգուշությունը։
ԱՀ ոստիկանության ճանապարհային ոստիկանության վերլուծությունները վկայում են, որ ճանապարհատրանսպորտային պատահարների պատճառների մեջ զգալի թիվ են կազմում նաև անզգուշության հետևանքով առաջացող պատահարները։
Հուլիսի 15-ին, ժամը 16։35-ի սահմաններում, Ստեփանակերտ-Դրմբոն-Քոլատակ ավտոճանապարհի խաչմերուկում իրար են բախվել ՀՀ Արարատի մարզի 1984թ. ծնված բնակչի վարած ՙԴԱՖ 95XF 380՚ մակնիշի և Ստեփանակերտ քաղաքի՝ 1981թ. ծնված բնակչի վարած ՙՎԱԶ-21213՚ մակնիշի ավտոմեքենաները, ինչի հետևանքով վերջինիս ուղևոր՝ 2009թ. ծնված մայրաքաղաքի բնակիչը ստացած մարմնական վնասվածքներով տեղափոխվել է ՙԱրևիկ՚ մանկական բուժմիավորում։
Նախնական տվյալներով` վթարի պատճառ է հանդիսացել ՎԱԶ-21213՚ մակնիշի ավտոմեքենայի վարորդի կողմից գլխավոր ճանապարհով երթևեկող տրանսպորտային միջոցին չզիջելը։
Նույն ժամանակահատվածում հանրապետության տարածքում արձանագրվել է մարմնական վնասվածք հասցնելու 9, գողության, թմրամիջոցների ապօրինի շրջանառության, գույքը դիտավորությամբ ոչնչացնելու 2–ական հանցագործության դեպք։
Իրականացված օպերատիվ-հետախուզական և քննչական աշխատանքների արդյունքում բոլոր դեպքերով, բացառությամբ գողության 1 հանցադեպի, հանցագործություններ կատարած անձինք հայտնաբերվել են։
Նույն ժամանակահատվածում ոստիկանության տարածքային ստորաբաժանումների հերթապահ մասերում արձանագրվել է 193 ահազանգ: Բոլոր ահազանգերով անմիջապես դեպքի վայրեր են մեկնել ոստիկանության տարածքային ստորաբաժանումների օպերատիվ խմբերը և օրենքով սահմանված կարգով ընթացքավորել դրանք։
Ճանապարհային երթևեկության կանոնների խախտումներ կատարելու համար նշված ժամանակահատվածում վարչական պատասխանատվության է ենթարկվել տրանսպորտային միջոցների 514 վարորդ, որոնցից 323-ը՝ սահմանված արագությունը գերազանցելու, 14-ը՝ առանց վարորդական իրավունքի, 12-ը՝ անսթափ վիճակում, իսկ մնացածը` այլ կարգի խախտումներ կատարելու համար։