[ARM]     [RUS]     [ENG]

ՀՈՒԼԻՍԻ 1-ԻՑ 20 ՏՈԿՈՍՈՎ ԿԲԱՐՁՐԱՑՎԵՆ ԱՐՑԱԽԿԱՊ՚ ՓԲԸ ԱՇԽԱՏԱԿԻՑՆԵՐԻ ԱՇԽԱՏԱՎԱՐՁԵՐԸ

kkk.jpgԼՂՀ վարչապետը երեկ ներկա է գտնվել ՙԱրցախկապ՚ փակ բաժնետիրական ընկերության ընդհանուր ժողովին, որի ընթացքում ներկայացվել է 2013թ. կատարված աշխատանքների և կառավարության` 2008թ. հաստատած ծրագրի իրագործման ընթացքի վերաբերյալ հաշվետվություն:
Հաշվետու տարում ընկերությունը հիմնական աշխատանքներն ուղղել է հեռուստահաղորդիչ կայաններում տեղադրված սարքավորումների շահագործմանն ու սպասարկմանը, ինչպես նաև ԼՂՀ ռադիոհեռուստատեսային ծրագրերի հեռարձակման և թվային համակարգի ներդրման իրականացմանը:
2014թ. հունվարի 1 -ից հանրապետության տարածքում տեղադրվել և շահագործվում է 43 լրակազմ  DVB-S վերահաղորդիչ կայան, բաժանորդային արբանյակային կցորդների քանակը ներկայումս կազմում է 6450 լրակազմ:
Ընկերության գործադիր տնօրենի խոսքով` թվայնացման ծրագիրը կարելի է ավարտել մինչև 2015թ.` ներգրավելով լրացուցիչ 120-130 մլն դրամ: Այդ գումարը և ընկերության շրջանառու միջոցները թույլ կտան 2014-2015թթ. մի շարք աշխատանքների հետ մեկտեղ հիմնական կայաններում ավարտել թվային  DVB-T2 հեռուստահաղորդիչների տեղադրման գործընթացը, սպասարկել ռադիոծածկույթից դուրս գտնվող բնակչությանը, վճարովի բաժանորդների թիվը հասցնել մինչև 8500-ի, թվային հեռուստատեսության բաժանորդներին առաջարկել վճարովի 1-2 փաթեթ ևս և այլն:
 Ի տարբերություն որոշ  մասնագետների կողմից հնչեցվող թերահավատ կարծիքների`  ընկերության գործադիր տնօրենը նշել է, որ առկա համակարգը կայուն է և արտաքին ազդեցությանը դիմակայող, հավելելով, որ առաջիկա տարիներին դրա վերանայման անհրաժեշտություն չի լինի:
Կառավարության ղեկավարը ողջունել է գործող համակարգի նոր սերնդի ներդրման ուղղությամբ կատարվող աշխատանքները: Նա մի շարք հանձնարարականներ է տվել ոլորտի պատասխանատուներին` հատկապես կարևորելով հանրապետության ողջ տարածքում տեղական հեռուստառադիոհաղորդումների հեռարձակման ապահովումը և պահանջելով մինչև տարեվերջ սոցիալական փաթեթով  բնակչության մի մասին ևս ապահովել կցորդներով:
Վարչապետը հանձնարարել է վերանայել համակարգի աշխատակիցների աշխատավարձերը, որոնք ներկայումս ցածր են հանրապետական միջինից: Նա  առաջարկել է ընթացիկ տարվա հուլիսի 1-ից այն բարձրացնել 20 տոկոսով և երեք տարվա ընթացքում հավասարեցնել հանրապետական միջին աշխատավարձին:
Ընդհանուր ժողովի ընթացքում քննարկվել են այլ հարցեր ևս, մասնավորապես, ընդգծվել է մասնագետների վերապատրաստման անհրաժեշտությունը, գնահատվել ընկերության գործադիր մարմնի՝ ռեսուրսները խնայողաբար ծախսելու աշխատաոճը:
 
ԼՂՀ կառավարության  տեղեկատվության և հասարակայնության հետ կապերի 
բաժին