ՍԱՀՄԱՆԱԴՐՈՒԹՅԱՆ ՀԱՆՐԱՔՎԵԻ ԿԱԶՄԱԿԵՐՊՎԱԾ ԱՆՑԿԱՑՄԱՆԸ ՀԵՏԱՄՈՒՏ

 Համաձայն ԼՂՀ հանրաքվեի կենտրոնական հանձնաժողովի` ՙԱրցախի Հանրապետության Սահմանադրության նախագծի վերաբերյալ 2017թ. փետրվարի 20-ի հանրաքվեի նախապատրաստման և անցկացման հիմնական միջոցառումների ժամանակացույցը հաստատելու մասին՚ որոշման, հունվարի 20-ից Հադրութ քաղաքում և շրջանի խոշոր համայնքներում  կազմավորվել են Արցախի Հանրապետության Սահմանադրության հանրաքվեի  10  շտաբներ: 

Շրջանի համայնքների ղեկավարների կողմից ընդունվել են որոշումներ համայնքների տարածքներում քարոզչական պաստառներ փակցնելու համար հատուկ տեղեր  հատկացնելու մասին: Հադրութի շրջվարչակազմի կողմից ԼՂՀ հանրաքվեի կենտրոնական հանձնաժողով  է ներկայացվել քարոզչություն կատարողներին անվճար հիմունքներով  տրամադրվող դահլիճների և այլ շինությունների ցանկը:

Հադրութի տարածքային  հանձնաժողովը հրավիրել է իր անդրանիկ նիստը, քննարկվել են Սահմանադրության հանրաքվեի կազմակերպմանն առնչվող մի շարք հարցեր: Ըստ հանձնաժողովի նախագահ Բենիկ Կարապետյանի` հանձնաժողովի անդամների միջև կատարվել է աշխատանքի բաշխում: Հանձնաժողովի անդամների կողմից  հայտեր են ներկայացվել տեղամասային ընտրական հանձնաժողովի անդամներ նշանակելու վերաբերյալ: Մի շարք կառույցների ներկայացուցիչների  մասնակցությամբ կազմավորվել են հանրաքվեի տեղամասերը և տեղամասային կենտրոնները, որոնց քանակը շրջանում  33-ն է: Հունվարի 30-ի դրությամբ բոլոր տեղամասային կենտրոնների  տեսանելի տեղերում փակցված են հանրաքվեին մասնակցելու իրավունք  ունեցող քաղաքացիների ցուցակները:  Ըստ հաստատված ժամանակացույցի` հանրաքվեի տեղամասային հանձնաժողովների   առաջին նիստերը կկայանան փետրվարի 3-ից 6-ը:

Շրջանում սկսված են քարոզչության  աշխատանքները: Հունվարի 25-ին Հադրութի մշակույթի տանը շրջկենտրոնի և շրջակա գյուղերի հասարակության ներկայացուցիչների հետ հանդիպել է ԼՂՀ ԱԺ նախագահ, սահմանադրական բարեփոխումների մասնագիտական հանձնաժողովի աշխատանքները ղեկավարած Աշոտ Ղուլյանը: Մնացած համայնքներում  մինչև փետրվարի 18-ը  ևս կիրականացվեն  քարոզչական աշխատանքներ:

Կատարվող աշխատանքները հետամուտ են այն բանին, որ Սահմանադրության հանրաքվեն շրջանում անցկացվի բարձր մակարդակով և շրջանի ընտրողներն արտահայտեն իրենց դիրքորոշումը, գիտակցելով, որ ձայն են տալիս Արցախի անկախության, հզորացման և շենացման օգտին: