ՄԻՋԱԶԳԱՅԻՆ ԴԻՏՈՐԴՆԵՐՆ ԱՐՑԱԽԻ ՈՒ ՀԱՆՐԱՔՎԵԻ ՄԱՍԻՆ
Գեորգի ԿՈԼԱՐՈՎ, քաղաքագետ, ռազմական փորձագետ, Բուլղարիա.
- Ես երրորդ անգամ եմ դիտորդական առաքելությամբ այցելում Լեռնային Ղարաբաղ և հետևում ընտրական գործընթացին ու համոզված էի, որ Հանրաքվեն կանցնի նորմալ, օրինավոր՝ միջազգային չափանիշներին համապատասխան։ Ես ճիշտ եմ համարում Նախագահ Բ. Սահակյանի լիազորությունների ժամկետի երկարաձգումը, քանի որ Արցախը, կարելի է ասել, գտնվում է ռազմական դրության մեջ, իսկ նման իրավիճակում ճիշտ չէ գլխավոր հրամանատար փոխելը։ Սա իմ՝ որպես ռազմական փորձագետի, համոզմունքն է։ Ճիշտ եմ համարում նաև Սահմանադրությամբ ԼՂՀ անունը փոխելը և պատմական Արցախ անունը վերականգնելը։
Կարծում եմ, առաջիկայում հայերը պիտի որոշեն նաև՝ անհրաժեշտ է ունենալ երկո՞ւ հայկական պետություն՝ ի դեմս Արցախի և Հայաստանի, թե՞ առաջինը պիտի գոյություն ունենա Հայաստանի կազմում։ Ինչ վերաբերում է Ադրբեջանի հայտնի ՙսև ցուցակին՚, կարող եմ ասել, որ այն վաղուց շատերին, այդ թվում և ինձ, չի մտահոգում։ Ես այցելելու եմ Արցախ՝ երբ ինձ հրավիրեք։
Քամալ ԽԱՆ, իրավապաշտպան, Պակիստան.
- Ձեր հարցին ի պատասխան, թե՝ չե՞մ վախենում, որ Հայաստան, Արցախ այցելելու համար Պակիստանում, որը Ադրբեջանի դաշնակիցն է, կարող եմ խնդիրներ ունենալ, պետք է ասեմ, որ չնայած Պակիստանն իմ հայրենիքն է, բայց ես հիմա ապրում եմ Գերմանիայում: Չեմ պատրաստվում առայժմ մեկնել այնտեղ. ստացվել է այնպես, որ Պակիստանում ապրելով, այնտեղ մարդու իրավունքների հարցեր էի բարձրացնում, ինչի պատճառով ենթարկվել եմ հալածանքների և ստիպված թողել երկիրը։ Ինչպե՞ս եմ լսել և ի՞նչ գիտեմ Արցախի մասին. լինելով իրավապաշտպան, ուսումնասիրել եմ մարդու իրավունքների հետ կապված նյութեր, փաստեր, հոդվածներ, այդպես ծանոթացել Հայաստանին, հայերին, Արցախին և Ադրբեջանի կողմից հայերի հանդեպ ագրեսիայի դրսևորման, մարդու իրավունքների խախտման դեպքերի վերաբերյալ փաստերին։ Կարիք կար ամեն ինչ սեփական աչքերով տեսնելու և գնահատելու, ինչն էլ ինձ բերեց այստեղ: Մինչև այցս ես լսել էի, որ այստեղ պատերազմ է, ավերածություններ, անվտանգ չէ, ոչ ստանդարտ իրավիճակ է և այլն։ Բարեբախտաբար, այն, ինչ տեսա՝ տարբերվում է լսածից. տեսա մաքուր, գեղեցիկ երկիր, բավականին լավատես, հյուրընկալ մարդիկ, և այստեղից վերադառնում եմ դրական լիցքերով: Առիթ ունենալու դեպքում սիրով նորից կայցելեմ:
Սրբուհի ՎԱՆՅԱՆ