Եթե Բաքուն ուժն է ընտրել որպես պայմանների հասնելու մեթոդ, ապա խաղաղ կարգավորում չի լինի․ ՀՀ ԱԳ նախարար
Հայաստանը չի կասկածել եւ առավել եւս հիմա չի կասկածում, որ ԵԱՀԿ ՄԽ համանախագահությունը Լեռնային Ղարաբաղի հակամարտության կարգավորման առավել արդյունավետ մեխանիզմն է։ Այս մասին հայտարարել է Հայաստանի ԱԳ նախարար Զոհրաբ Մնացականյանը Մոսկվայում ՌԴ ԱԳՆ ղեկավար Սերգեյ Լավրովի հետ համատեղ մամուլի ասուլիսում։
«Այն, ինչ տեղի է ունենում Լեռնային Ղարաբաղում, ագրեսիայի հստակ արտահայտություն է, դա բավականին լուրջ ազդեցություն կունենա աշխատանքի վրա։ Բայց այն կշարունակվի։ Խաղաղ կարգավորմանն այլընտրանք չկա։ Եթե Բաքուն ուժն է ընտրել որպես պայմանների եւ մաքսիմալիստական դիրքերի հասնելու մեթոդ, ապա խաղաղ կարգավորում չի լինի եւ չի լինի խաղաղություն տարածաշրջանում»,- հայտարարել է ՀՀ ԱԳՆ ղեկավարը։
Ի պատասխան Թուրքիայի դերի մասին հարցին՝ նախարարն արձանագրել է, որ հիմա այն հանգում է վարձկան ահաբեկիչների մատակարարմանը եւ Ադրբեջանի ակտիվ ռազմական աջակցությանը, ինչը չի կարող որեւէ կերպ ողջունելի լինել։