ԻՐԱՆԱԿԱՆ ՙԴՈՍՅԵ՚
Վահրամ ԱԹԱՆԵՍՅԱՆ
Օգոստոսի 5-ին Իրանում տեղի է ունեցել նախագահ Էբրահիմ Ռեիսիի պաշտոնամուտի արարողությունը։ Միջազգային մամուլն իսկույն ընդգծել է պետական-արարողակարգային այդ միջոցառմանը ՙՀամաս՚ եւ ՙՀեզբոլլահ՚ կազմակերպությունների առաջնորդների ներկայությունը։ Փորձագետները միանշանակ պնդում են, որ դա ՙազդակ է Իսրայելին՚։ Չափազանց ուշագրավ է, որ Ռեիսին իր երդմնակալությանը հրավիրել է ոչ թե Պաղեստինի միջազգայնորեն ճանաչված առաջնորդ Մահմուդ Աբասին, այլ ՙՀամասի՚ եւ ՙՀեզբոլլահի՚ ղեկավարներին, որոնք Իսրայելի նկատմամբ շատ կոշտ, կարելի է ասել՝ անհանդուրժողական կեցվածք ունեն։ Եթե Պաղեստինի լեգիտիմ ղեկավարը որոշ վերապահումներով ճանաչում է հրեական պետության գոյության իրավունքը, ապա նշված խմբավորումները համարում են, որ ամբողջական Պաղեստինը պետք է Երուսաղեմ մայրաքաղաքով լինի բացառապես արաբական պետություն։
Իրանի նախագահի դիվանագիտական ակնարկը, որ արաբա-իսրայելական հակամարտության կողմ ճանաչում է ՙՀամասի՚ եւ ՙՀեզբոլլահի՚ առաջնորդներին, հստակ ուղերձ է, որ Իրանի համար Իսրայելը որպես անկախ եւ լեգիտիմ պետություն գոյություն չունի։ Պաշտոնական Թեհրանի դեմարշն իսկույն արձագանքվել է Իսրայելում։ Կառավարությունը գումարել է արտակարգ նիստ, եւ վարչապետ Բենետը, պաշտպանության նախարարի, Զինված ուժերի Գլխավոր շտաբի պետի եւ հետախուզական ծառայության ղեկավարի հետ փակ քննարկումներից հետո նախազգուշական հայտարարություն է արել, որ առաջիկա տասը շաբաթների ընթացքում Իրանը ձեռք կբերի ռազմական այնպիսի բաղադրիչներ, որ նրան թույլ կտան ՙմիջուկային զենք ստանալ՚։ Անցած մի քանի տարիներին Իսրայելն առնվազն չորս հատուկ գործողություն է իրականացրել՝ թիրախավորելով Իրանի միջուկային օբյեկտները։ Վարչապետ Բենետի հայտարարությունը, որ ՙխոսքից գործի անցնելու ժամանակն է՚« հնչում է բավական չարագուշակ։ Իսրայելը կարող է թիրախային հարվածներ հասցնել Իրանին։ Առայժմ իրավիճակը գնահատվում է ՙօդից կախված՚։
Անցած մարտ-ապրիլ ամիսներին Վիեննայում մի քանի փուլում բանակցություններ են ընթացել՝ հաղթահարելու ԱՄՆ-Իրան դիմակայությունը։ Հունիսի 18-ին Իրանում նախագահական ընտրությունների կապակցությամբ վերջնական որոշումներն առկախվել են։ Այսօր պարզ չէ՝ նոր կառավարությունը շարունակելու՞ է դրանք, թե՞ հրաժարվելու է իրավանախորդի պայմանավորվածություններից։ Իրանի հոգեւոր առաջնորդ Ալի Խամենեին կոշտ քննադատության է ենթարկել հեռացած նախագահ Ռուհանիի արտաքին քաղաքական ուղեգիծը եւ այն համարել ՙԱրեւմուտքից չափազանցված ակնկալիքներ՚։ Սա նշանակում է, որ նախագահ Ռեիսին ավելի կարծր ուղեգիծ է վարելու։ Արեւմտյան փորձագիտական շրջանակներում տպավորություն կա, որ Ռեիսին հոգեւոր առաջնորդի պաշտոնում կփոխարինի Խամենեին, եթե ՙֆորս-մաժոր առաջանա՚։ Իրանի հոգեւոր առաջնորդի ծանր հիվանդության մասին մամուլում արդեն մի քանի տարի է՝ չհաստատված տեղեկություններ են շրջանառվում։
Մեզ համար իրանական ՙդոսյեն՚ հետաքրքրություն է ներկայացնում մի քանի առումներով։ Նախագահ Ռեիսիի պաշտոնամուտի արարողությանը հրավիրված էր նաեւ Հայաստանի վարչապետը։ Երկկողմ հանդիպման մասին պաշտոնական հաղորդագրությունից դատելով՝ Իրանը շարունակում է Հայաստանը դիտարկել որպես միայն առեւտրատնտեսական գործընկեր։ Հայկական փորձագիտական եւ քաղաքական որոշ շրջանակներ, մինչդեռ, Իրանի հետ աշխարհաքաղաքական կարեւորության համագործակցության տեսլական են ներկայացնում՝ դրանից բխող առարկայական շահերով հանդերձ։ Դա կարող է իրատեսական լինել միայն մի դեպքում՝ եթե Իրանը հաղթահարի Միացյալ Նահանգների հետ թշնամանքը եւ բացվի Եվրամիության եւ, առհասարակ, արեւմտյան ֆինանսատնտեսական շուկաների առջեւ։ Իրանի նկատմամբ ահռելի ճնշումներ են գործադրում Թուրքիան եւ Չինաստանը։ Արեւմուտքի հետ հաշտություն կնքած Իրանը չի ներգրվում նաեւ Ռուսաստանի աշխարհաքաղաքական մեգա-ծրագրերին։ Առանց այս երկվությունից դիվանագիտական ելքի Իրանը հազիվ թե ռազմավարական նշանակության որեւէ ծրագիր իրականացնելու լինի Հայաստան-Վրաստան-Եվրոպա ուղղությամբ։ Իսկ նախագահ Ռեիսիի առաջին քայլերը հուշում են, որ Իրանը շարունակելու է ջատագովել Մերձավոր Արեւելքում ՙշիա աղեղի՚ կառուցման ծրագիրը, որ սկիզբ է առել իսլամական հեղափոխությամբ, բայց այդպես էլ չի ամբողջանում, որովհետեւ Իրաքում եւ Սիրիայում այն հակակշռվում է ամերիկյան, ռուսական եւ մասամբ էլ թուրքական ներկայությամբ, անընդմեջ լարվածություն է հրահրվում Լիբանանում, իսկ Պարսից ծոցի արաբական միապետությունները շարունակում են Իրանը դիտարկել որպես ՙվտանգավոր մրցակից՚։
Կարելի է, թերեւս, իրանական այդ, ինչպես նաեւ ամբողջ Պաղեստինը ՙսիոնիստական ռեժիմից ազատագրելու՚ ծրագրերը գնահատել ժամանակի եւ միջոցների զուր վատնում, բայց դա ինքնիշխան երկրի որոշումն է։ Ստեղծված եւ դրանից ենթադրվող առավել բարդ իրավիճակում հայկական դիվանագիտությունը պարտադրված է ոսկերչական բծախնդրությամբ եւ խնայողաբար մոտենալ Իրանի հետ հարաբերություններին։
Իրանական ՙդոսյեն՚ դեռեւս երկար է քննարկվելու։