ԻՐԱՆԻ ԲԱԶՄԱՇԵՐՏ ԱՌԵՂԾՎԱԾԸ
Վահրամ ԱԹԱՆԵՍՅԱՆ
Ի տարբերություն հայկական եւ ադրբեջանական եւ մասամբ էլ իրանական լրատվամիջոցների, միջազգային մամուլը ոչ մի ուշադրություն չի դարձնում իրանա-ադրբեջանական սահմանի իրավիճակին եւ երկու երկրների միջեւ դիվանագիտական ՙփոխհրաձգությանը՚։ Սա պետք է ազդակ լինի, որը, ցավոք, Հայաստանում եւ Արցախում փորձագիտական անհրաժեշտ գնահատականի չի արժանանում։ Ավելին, քաղաքագիտական եւ հանրային դիսկուրսում իշխում են տրամադրություններ, որ ՙԻրանը կպատժի Ադրբեջանին՚։
Իրական քաղաքական ռեժիմում, մինչդեռ, սահմանային ՙլարվածության՚ մեկնարկի օրերին Նյու-Յորքում տեղի է ունեցել Իրանի արտաքին գործերի նախարարի հանդիպումը ինչպես թուրք, այնպես էլ ադրբեջանցի գործընկերոջ հետ։ Ընդ որում, Իրանի արտգործնախարարը թուրք գործընկերոջն է փոխանցել Թուրքիայի նախագահին Իրան այցելելու՝ իր երկրի նախագահի պաշտոնական հրավերը, որն ընդունվել է։ Տեսանելի ապագայում ծրագրված է Թեհրանում գումարել Իրան-Թուրքիա-Ադրբեջան՝ ԱԳ նախարարների հանդիպում։ Ամենեւին էլ բացառված չէ, որ դա երեք երկրների առաջնորդների գագաթաժողով նախապատրաստելու նպատակով է արվում։
Այս համատեքստում շատ ակնհայտ է ռուս-իրանական հարաբերությունների սառնությունը։ Դա ավելի պարզ է երեւում, երբ համեմատում ենք, որ Իրանի նորընտիր նախագահի պաշտոնամուտին հաջորդած շուրջ երկու ամսում Մոսկվայի եւ Թեհրանի միջեւ հրապարակային որեւէ շփում տեղի չի ունեցել, իսկ Իսրայելի արտգործնախարարը թեեւ կարճատեւ, բայց սկզբունքային նշանակության այց է կատարել Մոսկվա։
Իսրայելին, այլ երկրների հետ Իսրայելի հարաբերություններին վերաբերող ցանկացած տեղաշարժ Իրանի ռազմավարական հետաքրքրությունների ուղեծրում է։ Ճիշտ այդպես էլ Իսրայելն է վերաբերվում Իրանին։ Իրան-Ադրբեջան սահմանին լարվածության պատճառ շատերը համարում են իսրայելա-ադրբեջանական համագործակցությունը։ Բայց դա Իրանի համար նորություն չէ։ Եւ եթե սուր անհանգստության հիմքեր լինեին, ապա Իրանը նույն կոշտությամբ կարձագանքեր ավելի վաղ։ Եւ բացարձակ անհամարժեք է այն տեսակետը, թե քանի որ քառասունչորսօրյա պատերազմից հետո իրանա-ադրբեջանական սահմանը փոխվել է, ուրեմն Իսրայելը թիկունքից Իրանին անհանգստացնելու նոր հնարավորություն է ստացել։
Իրանը ՙբանանային՚ երկիր չէ, հզոր հետախուզական ցանց ունի եւ նրա համար քառասունչորսօրյա պատերազմն անակնկալ չէր։ Թեհրանը բոլոր հնարավորություններն ուներ, որպեսզի թույլ չտար իր թիկունքում իսրայելա-ադրբեջանական որեւէ խարդավանք։ Եթե չի արել, ուրեմն նման սպառնալիք անգամ տեսականորեն չի դիտարկել։ Այստեղ առարկություն չի կարող լինել։ Այլ բան է, որ պոստկոնֆլիկտային իրավիճակում Իրանը դժգոհության պատճառներ ունի։ Սլաքներն ուղղված են Թուրքիային եւ Ռուսաստանին։
Այս տեսակետից, ահա, մեզ պետք է ավելի շատ անհանգստացնի այն, որ Թուրքիան եւ Ադրբեջանը փորձում են Իրանի հետ ինչ-որ հեռանկարներ քննարկել, մինչդեռ Մոսկվա-Թեհրան ուղղությամբ դեռեւս խոր լռություն է։ Ընդ որում, դա վերաբերում է նաեւ Սիրիային, որի հետ կապված հարցերն արծարծվում են Ռուսաստան-Թուրքիա դիմակայությամբ եւ դրանից ածանցված՝ դիվանագիտական ՙմենամարտով՚։ Մինչդեռ գոյություն ունի այսպես կոչված ՙԱստանայի ձեւաչափ՚՝ Ռուսաստան-Թուրքիա-Իրան։
Ո՞րն է ռուս-իրանական սառնության պատճառը։ Պաշտոնաթողությունից կարճ ժամանակ առաջ Իրանի արտգործնախարար Զարիֆը լրատվամիջոցներից մեկին տված իր հարցազրույցից արտահոսք էր կազմակերպել եւ ԱՄՆ-ի հետ միջուկային ծրագրի հարցում համաձայնության չգալու համար կշտամբել ինչպես Իրանի հոգեւոր առաջնորդին, այնպես էլ Ռուսաստանին։ Նման մակարդակով կազմակերպված արտահոսքը երբեք թեթեւամտության դրսեւորում չէ, Իրանի նման փակ երկրի պարագայում՝ հատկապես։
Պետք է նկատի ունենալ, որ իրանական դժգոհությունը միջազգային հանրությանն ի ցույց դրվեց Ժնեւում Ռուսաստանի եւ ԱՄՆ նախագահների հանդիպման համատեքստում եւ փորձագիտորեն ընկալվեց այնպես, որ Իրանը Ռուսաստանին հաշիվ է ներկայացնում ԱՄՆ-ի հետ իր թիկունքում սկզբունքային համաձայնության գալու համար։ Պարզ լեզվով դա կարելի է ձեւակերպել այսպես. ՙԵթե դու ի վերջո պիտի ԱՄՆ-ի հետ ինչ-ինչ համաձայնությունների գաս, ապա նրա հետ մեր համաձայնությանն ինչու՞ խանգարեցիր՚։
Առօրեական հայացքով, իհարկե, իրանա-ադրբեջանական սահմանային լարվածությունը դժվար է կապել Ռուսաստան-ԱՄՆ հարաբերությունների հետ։ Բայց պետք է հաշվի առնել, որ ռուս-ամերիկյան միջգերատեսչական բանակցությունների մի փուլ արդեն ավարտվել է, նախապատրաստվում է երկրորդը։ Իսկ քննարկվում են ռազմավարական հարձակողական սպառազինությունների սահմանափակման, միջուկային զենքի չտարածման հետ կապված լրջագույն հարցեր։ Իրանը չափազանց մոտ է միջուկային առնվազն մի քանի մարտագլխիկի ստեղծմանը։ Միաժամանակ Իրանը հրթիռաշինության շատ հավակնոտ ծրագրեր է մշակում։
Միջազգային քաղաքականության ՙբարձրագույն լիգայի՚ ոչ մի խաղացողի, այդ թվում եւ՝ Ռուսաստանին, ձեռնտու չէ գործ ունենալ տարածաշրջանային միջուկային երկրի հետ՝ լինի դա Թուրքիան, Իրանը, թե, ասենք, Սաուդյան Արաբիան։ Ահա այս կտրվածքով դիտարկելիս Ադրբեջանի հետ սահմանին ուժի ցուցադրմամբ Իրանը պարզապես տարածաշրջանից իր ՙարդար բաժինն է ուզում՚։ Խնդիր, որ Ադրբեջանի իրավասությունից բացարձակապես դուրս է, իրական ռեժիմում գտնվում է ռուս-թուրքական ՙգործընկերային մրցակցության՚, իսկ մեծ հաշվով՝ ՌԴ-ԱՄՆ՝ միջուկային զինանոցով դեռեւս հավասարակշռվող հանդուրժողականության տիրույթում։
Հայաստանի համար սա չափազանց զգայուն իրավիճակ է։ Եթե իշխանությունները տեղի տան եւ Ադրբեջանի արեւմտյան շրջաններ-Նախիջեւան հաղորդակցությունը դիտարկվի ՙմիջանցքի՚ տրամաբանությամբ, ապա Իրանը հավելյալ լարվածություն է հաղորդելու Ադրբեջանի հետ սահմանի խնդրին՝ փորձելով, թերեւս, օրակարգ բերել ՙմիջանցք-2՚ թեման. եթե մեկը կարող է արեւելք-արեւմուտք ՙմիջանցք՚ տեսնել, մյուսն ինչու՞ չպիտի նույն հայացքով դիտարկի հարավ-հյուսիս հաղորդուղին։