ՀՈՒՄԱՆԻՏԱՐ ՃԳՆԱԺԱՄԻ ՀԱՂԹԱՀԱՐՈՒՄԸ ԽԱՂԱՂՈՒԹՅԱՆ ՏԱՆՈՂ ՃԱՆԱՊԱՐՀԸ ՉԷ
Երևանում նոյեմբերի 23-ին Հավաքական անվտանգության պայմանագրի կազմակերպության գագաթնաժողով անցկացնելու մասին իրազեկվել էր պաշտոնապես՝ այն շեշտադրմամբ, որ կազմակերպության անդամ երկրների ղեկավարների քննարկմանն է դրվելու Հայաստանին տրամադրվող օգնության հարցը։ Ռուսաստանցի փորձագետների վերլուծություններում նշվել է, որ գագաթնաժողովի անցկացումը և դրան Վլադիմիր Պուտինի մասնակցությունը նշանակում է ընդունել, որ Հայաստանն ունի լուրջ խնդիր, հետևաբար, երևանյան հանդիպումն ավելի առարկայական խոսակցություն է ենթադրում։ Սակայն աննախադեպ որոշումների կայացման հավանականությունը շատ փոքր է։
ՌԴ Դաշնային ժողովի Դաշնության խորհրդի փոխնախագահ Կոնստանտին Կոսաչևը նոյեմբերի 21-ին ռուսաստանյան պարբերականի հետ հարցազրույցում ասաց, որ Հայաստանի և Ադրբեջանի միջև հակամարտությունը կազմակերպության իրավասությանը չի վերաբերում, անդամ երկրներից յուրաքանչյուրն ինքնուրույն է որոշում իր վերաբերմունքը։ Ռուսաստանն ամենաանկեղծ ձևով աջակցում է կարգավորմանը։ Հայ-ադրբեջանական հակամարտության մեջ միակողմանի աջակցության դիրք զբաղեցնելը կնշանակի այն ավելի խորացնել, հավելել է Կոսաչևը։ Ինչպիսին կլինի դաշինքի մարտավարությունը՝ տարածաշրջանում իրավիճակի հետագա սրացում թույլ չտալու համար, ցույց կտան առաջիկա զարգացումները։
Ուկրաինական ճգնաժամով պայմանավորված՝ ԵԱՀԿ Մինսկի խմբի գործունեությունը դադարեցվեց, բայց փաստն այն է, որ ներկայում Հայաստան-Ադրբեջան հարաբերությունների կարգավորման, ինչպես նաև Արցախի հիմնախնդրի խաղաղ հանգուցալուծման գործընթացում շոշափելի են հենց համանախագահող պետությունների ջանքերը, որոնք ներկայում ունեն բավականին լարված հարաբերություններ։ Այս փուլում, երբ Ալիևն ասում է, թե հակամարտությունը լուծված է, փորձում է ցույց տալ, որ 2020թ. պատերազմի միջոցով իրեն հաջողվել է լուծել բոլոր խնդիրները, որ ԵԱՀԿ Մինսկի խմբի համանախագահության ինստիտուտ այլևս գոյություն չունի և այդ խմբի հետ կապված ցանկացած շահարկում անարդյունավետ է ու կործանարար, Ֆրանսիայի Սենատի նոյեմբերի 15-ի բանաձևը զրոյացրեց այդ հռետորաբանությունը։ Գնահատելի է Ֆրանսիայի կառավարությանն ուղղված կոչը՝ եվրոպացի դաշնակիցների հետ համատեղ դիտարկել ադրբեջանական նոր հարձակումներին համարժեք արձագանք տալու միջոցները։ Կոչ է արվում Բաքվին դուրս բերել ուժերը Հայաստանի տարածքից ու վերադարձնել հայ գերիներին։ Սենատի բանաձևը, ճիշտ է, խորհրդատվական բնույթ ունի, բայց այն արժեքավոր է ադրբեջանա-ղարաբաղյան հակամարտության չլուծվածության վերաբերյալ միջազգային ասպարեզում հստակ կարծիքի ձևավորման ու հիմնավորման տեսանկյունից։ Սենատի այդ քայլին արձագանքելով՝ ԱՀ արտգործնախարարն ասել է, որ շատ լավ կլիներ, իհարկե, եթե նմանօրինակ բանաձևեր ընդունվեին նաև այլ երկրների կողմից, նաև գործադիրի մակարդակով։
Ուշադրության արժանի է նաև ԱՄՆ Սենատի արտաքին հարաբերությունների հանձնաժողովի նախագահ Ռոբերտ Մենենդեսի հերթական հրապարակային ելույթը Միացյալ Նահանգների կողմից Ադրբեջանին ցուցաբերվող աջակցության դադարեցման մասին։ Օգնության հատկացումը Մենենդեսի համար աններելի է, բարոյապես անընդունելի։ Վերջին հայտարարությունում նա շեշտեց Արցախի դեմ Ադրբեջանի սանձազերծած պատերազմի ժամանակ ԱՄՆ-ի անբավարար արձագանքի փաստը։ Լեռնային Ղարաբաղում ապրողները, նրա խոսքով, արժանի են ազատության և անվտանգության, իսկ դա նշանակում է երաշխավորել, որ Հայաստանի և Ադրբեջանի միջև խաղաղության պայմանագիրը չի հանգեցնի ԼՂ հայ բնակչության էթնիկ զտումների։ Սենատորի վերջին շեշտադրումը՝ էթնիկ զտումների հետ կապված, անչափ կարևոր է այն առումով, որ Արցախում հումանիտար ճգնաժամի արդյունքում ի հայտ եկած խնդիրների լուծումն ու միջազգային ինչ-որ մեխանիզմների կիրառումը չեն կարող կայուն խաղաղություն ապահովել, որ Արցախի ժողովուրդն իր հայրենիքում պետք է ազատ ու անվտանգ ապրի։
Պատերազմից հետո՝ մինչ այսօր, Արցախի օկուպացված տարածքներում տեղակայված ադրբեջանական հենակետերից կրակում են խաղաղ աշխատանքով զբաղված մարդկանց վրա՝ ահաբեկելով նրանց, ստիպելով հեռանալ հայրենիքից։ Ալիևը նույնիսկ համաձայն չէ Հայաստանի հետ խաղաղության համաձայնագրում Լեռնային Ղարաբաղին վերաբերող հարցերի ընդգրկմանը։ Դա չի լինի, դա անհնար է. այսպես է նա արտահայտվել ԵՄ Արևելյան գործընկերության հատուկ բանագնացի հետ հանդիպմանը։ Նման հայտարարությունների ֆոնին ադրբեջանական զինված ուժերի ստորաբաժանումները շարունակում են տարբեր տրամաչափի հրաձգային զինատեսակներից կրակել հայ-ադրբեջանական սահմանի արևելյան հատվածում և Արցախի տարածքում տեղակայված հայկական դիրքերի ուղղությամբ։
Ադրբեջանն ակնհայտորեն փորձում է չեղարկել Արցախի՝ որպես հակամարտության կողմի կարգավիճակը, փորձում է բանակցությունները ներկայացնել որպես «խոսակցություն Ղարաբաղում ապրող հայերի հետ» և Ադրբեջանի ներքին քաղաքականության շրջանակներում ընկած գործընթաց։ Արցախի Հանրապետության արտաքին քաղաքական գերատեսչությունը հերթական անգամ ընդգծում է, որ ԵԱՀԿ Մինսկի խմբի ձևաչափն ադրբեջանա-ղարաբաղյան հակամարտության խաղաղ կարգավորման լավագույն հարթակն է և այն պետք է պահպանվի։
Ռուզան ԻՇԽԱՆՅԱՆ