[ARM]     [RUS]     [ENG]

ՄԱՐԴՈՒ ԻՐԱՎՈՒՆՔՆԵՐՆ ԸՆԴԴԵՄ ԱԶԳԱՅԻՆ ԻՐԱՎՈՒՆՔՆԵՐԻ ԵՎ ԱՌԱՋՆՈՒԹՅՈՒՆՆԵՐԻ

185588.jpgՄարդու իրավունքների եվրոպական դատարանի վճիռը, որի համաձայն, Հայոց ցեղասպանության ժխտումը չի կարելի քրեական արարք համարել, իբրեւ բացատրություն հիմնվում է ազատ կարծիքի սկզբունքի վրա։ 
Սակայն ածանցյալ հիմնավորում կա Մարդու իրավունքների եվրոպական դատարանի վճռում։ Պարզ ձեւով ասվում է, որ Հայոց ցեղասպանության ճանաչման առումով միատեսակ կարծիք չկա։ Ճիշտ այստեղ է, որ մարդու իրավունքի եվրոպական կառույցը մատնում է ինքն իրեն։ Հարցը համեմատվում է հրեական Ողջակիզման (Հոլոքոստ) հետ
Հիմա փորձենք համեմատել ազատ կարծիքի իրավունքը եւ միջազգային համախոհությունը։ Եթե մարդու կարծիքի ազատությունը բացարձակ եւ անքննարկելի սկզբունք է, ապա այդ դեպքում միջազգային համաձայնությունը տվյալ երեւույթի  նկատմամբ ինչպե՞ս կարող է արգելել այդ կարծիքի հրապարակումը։ Փաստորեն արգելված է ժխտել հրեական Ողջակիզումը։ Իսկ նման դիրքորոշումը  մարդու կարծիքի արտահայտության դեմ ճնշամիջոց չէ՞։  
Առանց խորանալու այլ հիմնավորումների բացատրության մեջ, միայն այս անհամատեղելիությունը պարզում է խնդրին մոտենալու զուտ քաղաքական մղումը։ Որովհետեւ բողոքառուն Մարդու իրավունքների եվրոպական դատարանն է եւ ոչ թե միջազգային դատարանը։ Իսկ Եվրոպական դատարանը Հայոց ցեղասպանության ճանաչման նկատմամբ գոյացած համախոհությունը դատելու համար պիտի հիմնվեր Եվրոպական խորհրդարանի որդեգրած կեցվածքների, դիրքորոշումների եւ բանաձեւերի վրա եւ ոչ թե միջազգային ընտանիքի` ընդհանրապես։ Ուրիշ հարց, որ մասնակիորեն այս ձեւով եվրոպական կառույցն իր դիրքորոշումով հակասում է եվրոպական պետության որդեգրած օրենքին։ Բայց իրավաբանական մեկնաբանությունների ծալքերի ոլորապտույտից հեռու մնալու համար կենտրոնանանք հարցի քաղաքական մոտեցումների վրա։
Հիշենք, որ նույն Ֆրանսիան իր Ազգային ժողովի մեկ հաստատությունից մյուսը եւ՝ փոխադարձաբար, հարցը քաղաքական շրջագայությունների մեջ դնելուց հետո  չհաստատեց օրինագծի սահմանադրականությունը՝ ինքնահակասական ակներեւ  երեւույթ պարզելով դիպաշարին հետեւողների առջեւ։ Նույն Ֆրանսիայի համար քրեականացված է հրեաների Ողջակիզումը, մինչ սահմանադրական չի նկատվում Հայոց ցեղասպանության ուրացումը պատժելի նկատելը։ Իսկ այստեղ միջազգային համախոհության եւ համաձայնության հղում կատարելու խնդիր չկա, որովհետեւ խոսում ենք մի երկրի մասին, որ պաշտոնապես ճանաչել է երկու ցեղասպանությունները։ Իսկ այսօր Մարդու իրավունքների եվրոպական դատարանը շատ հանգիստ հղում է կատարում Ֆրանսիայի Սահմանադրական դատարանին։
Եվրոպական ինքնահակասական դրսեւորումները՝ իրենց հերթին։ Հայկական կողմն   անհրաժեշտության առջեւ է` վերանայելու իր մարտավարությունը այս հարցի ուղղությամբ։ Կարծիքի կամ արտահայտվելու ազատությունն ընդհանրապես քաղաքակիրթ երկրների համար օրինաչափ է, որ գերարժեւորման ենթարկվի։ Այստեղ մեր խնդիրը զուտ հայեցողական առումով արդեն իսկ որոշ խոչընդոտների  է հանդիպում, մանավանդ երբ նկատի ենք ունենում, որ ժխտողականության քրեականացման աշխատանքն առավելաբար կենտրոնացել է եվրոպական միջավայրերի վրա։ Այս բոլորի վրա ավելանում են նաեւ հրեական խմբավորումների կողմից անուղղակիորեն ստեղծվող արգելակումները՝ Ողջակիզման դեպքի եզակիությունը պահպանելու համար։
Այս եւ նմանատիպ հանգամանքների բերումով, արդյունքում ստացվում է այն, որ Ֆրանսիայում կամ Շվեյցարիայում մեր առավելները վերածվում են նվազների։ Այն երկրները, որոնք ճանաչել են Հայոց ցեղասպանությունը, այժմ մերժում են այն ժխտելու քրեականացումը կամ էլ ենթարկվում են քրեականացման իրենց որոշումների բեկանումներին։
Ճանաչումից հատուցում աշխատանքային անցման մեջ գտնվող հայկական կողմը բոլոր պատճառներն ունի այսօր իր մարդուժն ու տնտեսական ուժն ըստ առաջնահերթությունների կենտրոնացնելու։ Իսկ այդ առաջնահերթությունները առավելաբար վերաբերում են Հայաստանի Հանրապետության ժամանակակից խնդիրներին։ Ապաշրջափակման պահանջը, Անկարայի նախապայմանային քաղաքականության մերժումը, արցախյան հակամարտության մեջ թուրքական միջնորդության նկրտումների անընդունելիությունը առաջադրանքներ են, որոնք  Թուրքիայի վարքագիծը հակադրում են միջազգային նորմերին եւ այդ առումով  կարող են որոշակի առավելություններ ապահովել հայկական կողմին։
 
 
Շահան ԳԱՆՏԱՀԱՐՅԱՆ
ՙԱզդակ՚ թերթի գլլխավոր խմբագիր