ԳԹԱՍՐՏՈՒԹՅԱՆ ԵՎ ԿԱՐԵԿՑԱՆՔԻ ԿԵՆԴԱՆԻ ՕՐԻՆԱԿ

 Մայիսի 23-ին Արցախի պետական համալսարանի դահլիճում բուհի ուսանողադասախոսական կազմը   հյուրընկալել էր ՙԱվրորա՚ միջազգային մարդասիրական մրցանակի առաջին դափնեկիր Մարգարիտ Բարանկիցեին: Պատվավոր հյուրի գլխավորած պատվիրակությանն ուղեկցում էին ԼՂՀ մշակույթի և երիտասարդության հարցերի նախարար Նարինե Աղաբալյանը, հիշյալ մարդասիրական նախաձեռնության ծրագրերի ղեկավար Արման Ջիլավյանը:  Մինչ հանդիպումը հյուրերը ծաղիկներ են խոնարհել Արցախյան ազատամարտում նահատակված ուսանողների հիշատակին կառուցված հուշաքարին: 

Ողջունելով հյուրին` ԱրՊՀ ռեկտոր Մանուշ Մինասյանը բարձր է գնահատել Բարանկիցեի ծավալած գործունեությունը, անդրադարձել վերջինիս կողմից հիմնված Maison Shalom (ՙԽաղաղության տուն՚) բարեգործական կազմակերպության կողմից կյանքի կոչված մարդասիրական ծրագրերին: Բուհի ղեկավարն իր խոսքում Մ. Բարանկիցեի կյանքը մարդկանց օգնելու մեծ առաքելություն է որակել, հիշեցնելով, որ  նա իր գործունեությամբ հարազատ երկրի՝ Կենտրոնական Աֆրիկայում գտնվող Բուրունդիի Հանրապետությունում բռնկված  քաղաքացիական պատերազմի տարիներին հազարավոր մարդկանց, այդ թվում՝ 30 հազար երեխայի կյանք է  փրկել: Այսօր էլ նրա հիմնադրած հիվանդանոցում բուժվում են բազմաթիվ կարիքավոր մարդիկ: ՙԱյդպիսիք լույս, հավատ և սեր են սփռում իրենց շուրջը, նրանց հետ շփումներն առաջին հերթին յուրատեսակ դաս են մեզ բոլորիս և հատկապես ուսանողության համար՚,-նշել է Մ. Մինասյանը և համոզմունք հայտնել, որ Բարանկիցեն իր կյանքով և գործունեությամբ գթասրտության և կարեկցանքի կենդանի օրինակ է,  դժվար պահերին՝ հույսի շող: 

Հյուրերին ողջունել է նաև Մշակույթի և երիտասարդության հարցերի նախարար Ն. Աղաբալյանը: Նա մանրամասնել է, որ  հիշյալ մրցանակը շնորհվում է Հայոց մեծ եղեռնը  վերապրածների անունից՝ ի երախտագիտություն նրանց, ովքեր փրկության ձեռք են մեկնել հայ ժողովրդին: Ամենամյա մրցանակն ստեղծվել է մարդկության ուշադրությունը եւս մեկ անգամ ուղղելու աշխարհում այսօր տեղի ունեցող աղետներին ու ոճրագործություններին, մեծարելու մերօրյա հերոսներին, ովքեր անձնվիրաբար օգնում են կարիքավորներին:  Անդրադառնալով ՙԱվրորայի՚ ստեղծման նախապատմությանը, նախարարը հիշեցրել է« որ ՙԱվրորա՚ մրցանակը  ՙ100 կյանք՚  նախաձեռնության բաղադրիչներից մեկն է և հիմնադրվել է հայ բարերարներ Ռուբեն Վարդանյանի, Նուբար Աֆեյանի և Վարդան Գրեգորյանի կողմից:

Այդ ձեռնարկումով նախաձեռնության համահիմնադիրները նպատակ են հետապնդում  գնահատել և արժանին հատուցել բոլոր նրանց, ովքեր մարդկային կյանքեր փրկելու առաքելություն են իրականացնում ամբողջ աշխարհում: ՙՀայոց մեծ եղեռնից հարյուր տարի անց այսպիսին է հայերիս պատասխանը ցեղասպանությունից մազապուրծ հայրենակիցներին ձեռք մեկնած այլազգի մարդասերներին՚,-նշել է Ն. Աղաբալյանը և հիշեցրել, որ  հաշված օրեր անց Երևանում կամփոփվեն այս տարվա մրցանակաբաշխության արդյունքները, ու հայտնի կդառնա երկրորդ դափնեկրի անունը: Մրցանակաբաշխության հանձնաժողովում ընդգրկված են ճանաչված գործիչներ, և նրանց անկախ գնահատականներով է որոշվում, թե ով է արժանանալու այդ մրցանակին: Ն. Աղաբալյանը Մ. Բարանկիցեի` անդրանիկ մրցանաբաշխության դափնեկիր ընտրվելը պատահական չի համարում, քանի որ իր ամբողջ կյանքում վտանգելով սեփական կյանքը` նա փրկում է մարդկանց` նրանց տալով գոյատևելու եւ բարօրության հասնելու հնարավորություն: Ընտրող հանձնաժողովը կարեւորել է նրա գործունեության բացառիկ նշանակությունը` որբերի ու փախստականների փրկությանն ուղղված նրա ջանքերը: 

Մ. Բարանկիցեն Հայաստան է այցելել սպասվող նոր մրցանակաբաշխության առիթով և դրան նախորդող օրերին ցանկություն է հայտնել լինել Արցախում: Ն. Աղաբալյանն արցախցիների անունից շնորհակալություն հայտնեց այցի համար և շեշտեց, որ Արցախում շատ լավ գիտեն, թե ինչ է նշանակում օգնության ձեռք մեկնել մարդկանց, ովքեր, թվում է,  կորցրել են արդեն վերջին հույսը: ՙՄենք անցել ենք նման փորձությունների միջով, արժանապատվորեն  հաղթահարել անկարելի թվացող փորձություններն ու ցավը: Այժմ Դուք Ձեր փորձով մեր երիտասարդներին կպատմեք, թե ինչպես պետք է հաղթել դժվարությունները՚,- ասել է նա:  Նախարարը հայտնեց նաև, որ հյուրերից  մեկն առաջարկություն է հնչեցրել կազմակերպել այն բոլոր երիտասարդների այցն Արցախ, ովքեր պատերազմի պատճառով ստիպված են եղել լքել իրենց հայրենիքը` այստեղ հասկանալու և համոզվելու համար, որ պետք է մնալ հայրենիքում և պետք է փորձել դիմագրավել ցանկացած դժվարության:  

Միջոցառման ընթացքում ներկաների համար  նաև մրցանակակրի գործունեության մասին պատմող ֆիլմ ցուցադրվեց:

ՙԱվրորա՚ նախաձեռնության ներկայացուցիչ Արման Ջիլավյանն անդրադարձել է  մարդասիրական  մրցանակի ստեղծման շարժառիթներին, ներկայացրել կազմակերպության  գործունեության հիմնական ուղղությունները, որոնք առավելապես կապված են Հայոց ցեղասպանության հետ: Նա նշել է, որ այդ մրցանակը միտված է հավասարապես ե՜ւ անցյալին, ե՜ւ ապագային՝ երախտիք հայտնելով անցյալում ինքնազոհաբերության օրինակների հեղինակներին եւ միաժամանակ աջակցելով մարդասիրական քայլերը: Մրցանակը ճանապարհ է հարթում՝ օգնելու եւ ֆինանսապես աջակցելու ապագայում խիզախության եւ կարեկցանքի դրսեւորումներին: 

Մարգարիտ Բարանկիցեն իր խոսքում ուղերձ է փոխանցել ՙԱվրորայի՚ հիմնադիրներին, ասելով, որ ինքը հիացած է նրանց գործերով: Նա ուսանողներին  է ներկայացրել իր կյանքի պատմությունը, նշել, որ իր համար միշտ որպես կենդանի ուղենիշ է ծառայել մայրը, ով ժամանակին դստերը խորհուրդ էր տվել մոմ լինել խավարի մեջ: Մարդասիրական իր գործունեությունը Բարանկիցեն  սկսել է տասնվեց տարեկանից՝ որդեգրելով անօթևան առաջին մանուկներին: Քսանչորս տարեկանից մասնագիտությամբ ուսուցչուհի Բարանկիցեն կարողացել է նաև կրթարան հիմնել:

Մրցանակակիրը համոզված է, որ աշխարհը վերափոխելու միակ զենքը կրթությունն է: Իսկ բարությունը կարող է երջանկացնել բոլորին:  ՙԵս հիացած եմ ձեր երկրով, մշակույթով և երիտասարդությամբ։ Երբ դու ունես կարեկցանք, քեզ ոչինչ չի կարող կանգնեցնել: Ես ձեր ծնողների նման մեկ նպատակ եմ միայն ունեցել` ազատ ու երջանիկ տեսնել իմ հայրենիքը:  Նույնիսկ եթե ոչինչ չունենք, մենք կարող ենք պարգևել խինդ ու քնքշանք` անկախ ազգությունից և էթնիկ պատկանելությունից՚,-ասել է նա: 

Հանդիպման վերջում ԱրՊՀ ռեկտոր Մ. Մինասյանը Մարգարիտ Բարանկիցեին ծաղիկներ և խորհրդանշական հուշանվերներ է հանձնել:

Նունե ՀԱՅՐԱՊԵՏՅԱՆ