ԵՐԲ Է ԲՈՒԺՍՊԱՍԱՐԿՈՒՄԸ ԴԱՌՆՈՒՄ ՎՃԱՐՈՎԻ

Մի կողմ թողնենք եվրոպացի տարեցների երանելի առօրյան (չմոռանանք միայն նշել, որ այն ապահովելու համար նրանք երկար տասնամյակներ  զգալի հատկացումներ են անում սեփական աշխատավարձից) և մեկ անգամ ևս փաստենք, որ  մեզ մոտ, իրոք,  չի կարելի ասել, որ աշխատանքային թոշակը քիչ-ինչ նախադրյալներ է ապահովում բարեկեցիկ ծերության համար:

Կենսաթոշակառուների մեծամասնությունն ստանում է նվազագույն աշխատավարձի չափից էլ փոքր գումար, որը կհերիքի միայն առաջին անհրաժեշտության սննդամթերք գնելու համար: Թերևս այս իրողությունը հաշվի առնելով` տարեցների համար  տարբեր ուղղություններով ստեղծվել են արտոնությունների հնարավորություններ, իսկ քանի որ վերջիններս ավելի շատ խնդիրներ ունենում են առողջության հետ կապված, բնականաբար, առողջապահության ոլորտը պետք է այդ ցուցակում առաջին դիրքեր լինի: 

Ինչպես հայտնի է, առաջնային բուժսպասարկումը մեր հանրապետությունում անվճար է, ինչը հաստատված է Սահմանադրությամբ և կառավարության համապատասխան որոշմամբ: Չնայած դրան` կենսաթոշակառուները հենց այս ծառայությունից օգտվելիս են բախվում տարբեր` հաճախ անհեթեթության հասնող խոչընդոտների: Գաղտնիք չէ, որ տարիներ ի վեր տարբեր հետազոտություններ և համեմատաբար ճշգրիտ ախտորոշում ստանալու համար ԱՀ առողջապահության նախարարության Հանրապետական բժշկական կենտրոնի Արմինե Փակումեանի անվան պոլիկլինիկա է դիմում ոչ միայն մայրաքաղաքի, այլև հանրապետության շրջանների բնակչությունը: Այս իրողությամբ են բացատրվում բուժհաստատության հետազոտություններ և ախտորոշում իրականացնող տարբեր կաբինետների առջև, հատկապես առավոտյան ժամերին, գոյացող  հերթերը` տարեցների մեծամասնությամբ: Այդ հերթերին կողքից հետևելիս կարելի է արձանագրել գյուղական բնակավայրերից եկած հիվանդների անթաքույց դժգոհությունը: Բանն այն է, որ եթե տարիներ առաջ բուժհաստատությունում թոշակառուի գրանցման վայրն այնքան էլ ուշադրության չէր արժանանում, և հետազոտությունների հիմնական մասն անվճար էր իրականացվում, ապա ներկայում այստեղ առաջին հերթին պահանջում են մայրաքաղաքի գրանցում` լաբորատոր հետազոտություններն անվճար իրականացնելու համար: Պետք է ասել, որ միայն  հետազոտությունների համար տրվելիք գումարը զգալի ճեղքվածք է առաջացնում նրանցից շատերի ամսական միակ եկամուտի` կենսաթոշակի մեջ, փաստ, որն ավելի է խորացնում  դժգոհություններն ու նրանց առողջության հետ կապված բողոքները: 

Խնդրի պարզաբանումների նպատակով դիմեցինք բուժհաստատության նորանշանակ գործադիր տնօրեն Արմեն Խաչատրյանին:  Նա տեղեկացրեց, որ դեռևս մի քանի տարի առաջ պոլիկլինիկայում ստեղծվել է շրջաններից եկած հիվանդներին սպասարկող կաբինետ, և անհետաձգելի դեպքերում տվյալ հիվանդներն անհրաժեշտ օգնությունն անվճար հիմունքներով են ստանում:  Ա. Խաչատրյանը համաձայնեց, որ այստեղ կանոնակարգման և հստակեցման անհրաժեշտություն կա և խոստացավ խնդրի լուծման տարբերակներ առաջարկել Առողջապահության նախարարությանը: 

ԱՀ առողջապահության նախարարության բժշկական օգնության համակարգող Կարինե Ալեքսանյանի պարզաբանմամբ` եթե հիվանդը Ստեփանակերտ է հասնում` ունենալով շրջանի բուժհիմնարկի ուղեգիրը, ապա,  անկախ նրանից` սոցիալական որևէ խմբի ներկայացուցիչ է նա, թե ոչ, նախատեսված բոլոր լաբորատոր  հետազոտություններն անվճար են կատարվում, մնացած բոլոր դեպքերում հիվանդը պարտավոր է վճարել բոլոր հետազոտությունների համար: Կ. Ալեքսանյանը նաև տեղեկացրեց, որ հանրապետության յուրաքանչյուր շրջանային բուժհիմնարկին ամեն տարի հատկացվում է որոշակի գումար` բնակչության առաջնային բուժսպասարկումն ապահովելու, այդ թվում`  լաբորատոր հետազոտություններ իրականացնելու համար:  Ըստ մեր զրուցակցի` մայրաքաղաքի բուժհաստատություններում բուժօգնություն կազմակերպելիս, որպես ուղեցույց, ծառայում են պետության կողմից երաշխավորված անվճար և արտոնյալ պայմաններով բուժօգնության  հաստատված համապատասխան չափորոշիչները, ըստ որոնց` ամբուլատոր նեղ մասնագիտական բժշկական օգնության և սպասարկման մատչելիությունն ապահովելու նպատակով անհետաձգելի դեպքերում մայրաքաղաքի բուժհաստատության պատասխանատու բժշկի ուղեգրմամբ անվճար հիմունքներով կազմակերպվում են լաբորատոր-գործիքային ախտորոշիչ հետազոտություն, նեղ մասնագետի խորհրդատվություն և բուժում: ՙՄենք համեմատաբար խոշոր գյուղական բնակավայրերում ունենք նաև գյուղական բժշկական ամբուլատորիաներ, որոնք գործում են և հնարավորության սահմաններում ոչ միայն կարող են ցույց տալ առաջին բուժօգնությունը, այլև առավել տագնապահարույց դեպքերում հիվանդին տրամադրել ուղեգիր` մայրաքաղաքի պոլիկլինիկայում հետագա հետազոտություն անցնելու համար՚,- ասաց նա:  Կ. Ալեքսանյանի խոսքով` ԱՆ պատասխանատուներին տարիներ ի վեր ևս մտահոգում է կենսաթոշակառուներին հուզող այդ խնդիրը: Ժամանակին որպես տարբերակ առաջարկվել է  նաև շրջանային հիվանդանոցների առաջնային բուժօգնության համար նախատեսված գումարը հատկացնել  մայրաքաղաքի պոլիկլինիկային: Հանրապետությունում քիչ չեն  գյուղերը, որոնք ավելի մոտ են տեղակայված մայրաքաղաքին, քան շրջկենտրոնին, և ուղեգիր ստանալու համար հիվանդներն ստիպված են կրկնակի ծախս կատարել` մայրաքաղաքում նեղ մասնագիտական ախտորոշում և բուժում ստանալու համար:  Գաղտնիք չէ նաև, որ շրջանների բուժհիմնարկները թե՜ բուժսարքավորումների, թե՜ բուժանձնակազմի և  թե՜ հիվանդանոցի թողունակության խնդիր ունեն, ինչը թույլ է տալիս  ենթադրել, որ ապագայում ևս հիվանդները շարունակելու են նախընտրել մայրաքաղաքի ամբուլատոր ծառայությունը, որն իրենց համար գերազանցապես վճարովի է: 

Խնդիրը, որը մտահոգում է ոչ միայն տարեցներին, առկախ է, այդ պատճառով հետագայում ևս կփորձենք կրկին անդրադառնալ այդ թեմային` ներգրավելով շրջանային բուժհաստատությունների պատասխանատուներին ևս:

Նունե ՀԱՅՐԱՊԵՏՅԱՆ