ՀԱՄԱՏԵՂ ՆԻՍՏ` ԽՆԴՐԱՀԱՐՈՒՅՑ ՀԱՐՑԵՐԻ ԸՆԴԳՐԿՄԱՄԲ
Այս օրերին աշխատանքային այցով Ստեփանակերտում է գտնվում ՀՀ հանրային ծառայությունները կարգավորող հանձնաժողովի պատվիրակությունը` Ռոբերտ Նազարյանի գլխավորությամբ: Մայիսի 18-ին արցախյան և հայաստանյան համանուն հանձնաժողովները համատեղ նիստ են գումարել, որին մասնակցել է ԱՀ պետնախարար Արայիկ Հարությունյանը:
Պետնախարարը ներկաներին շնորհավորել է Բերձորի ազատագրման 26-րդ տարեդարձի կապակցությամբ՝ հատկանշելով, որ երկար տասնամյակների արհեստական բաժանումից հետո Մայր հայրենիքի հետ Արցախի վերամիավորումն ամենակարևոր իրադարձություններից մեկը դարձավ ողջ հայության համար: Շնորհակալություն հայտնելով հայաստանյան հանձնաժողովին հաճախակի և նախաձեռնողական այցելությունների և օժանդակության համար` պետնախարարն անդրադարձել է վերջին շրջանում հանրության կողմից ակտիվ քննարկումների առիթ դարձած կապի և հեռահաղորդակցության ոլորտի խնդիրներին` այդ համատեքստում ՀՀ հանձնաժողովի նախագահին առաջարկելով համատեղ լայնածավալ ուսումնասիրություններ կատարել` պարզելու այդ դաշտում գործող սակագների հիմնավորվածությունը: ՙՄեր հայրենակիցները պարբերաբար բողոքում են հեռահաղորդակցության ոլորտի խնդիրներից: Մասնավորապես, դժգոհության առիթ են հանդիսանում մատուցվող ծառայությունների որակը և դրանց դիմաց վճարվող սակագները: Այս խնդիրը վերջնականապես ու հիմնավոր լուծելու համար իշխանությունը վճռական է տրամադրված, և ես խնդիր եմ դնում ուսումնասիրել նաև կապի օպերատոր հանդիսացող ընկերության ղեկավարության այս կապակցությամբ արվող հիմնավորումները և մեզ տրամադրել ընթացիկ ժամանակաշրջանի օբյեկտիվ պատկերը, որպեսզի մեր կողմից կայացվեն ճիշտ որոշումներ՚,- ասել է Ա. Հարությունյանը:
Համատեղ նիստի օրակարգում ընդգրկված էր ութ հարց: Քննարկված և դրա առնչությամբ դրական որոշում ընդունված առաջին հարցը վերաբերում էր բնական գազի մատակարարման և օգտագործման կանոնները սահմանելու և ԼՂՀ ՀԾՏՄԿՊՀ 2007թ. նոյեմբերի 27-ի որոշումն ուժը կորցրած ճանաչելուն. որոշումն ուժի մեջ կմտնի ս.թ հուլիսի 1-ից: Մեկ այլ որոշմամբ ուժը կորցրած է ճանաչվել նաև բնական գազի մատակարարման մատակարար-բաժանորդ (բնակիչ) պայմանագրի օրինակելի ձևը սահմանելու ՀԾՏՄԿՊՀ 2008 թ. մայիսի 4-ի համապատասխան որոշումը: Հավանության են արժանացել նաև բնական գազի մատակարարման (մատակարար-բաժանորդ (կազմակերպություն) պայմանագրի օրինակելի ձևը սահմանելու ԼՂՀ ՀԾՏՄԿՊՀ 2008թ. հուլիսի 25-ի թիվ 41Ն և հուլիսի 25-ի թիվ 42Ն որոշումներն ուժը կորցրած ճանաչելու մասին նախագծերը: Նիստի ընթացքում հաստատվել է նաև ՙԱրցախգազ՚ ՓԲԸ-ի կողմից սպառողների սպասարկման որակի վերաբերյալ տեղեկատվության ներկայացման կարգը և ուժը կորցրած ճանաչվել Հանձնաժողովի նախորդ համապատասխան որոշումը:
Հանձնաժողովի վերահսկողության, լիցենզավորման և մուտքերի հաշվառման բաժնի կողմից ներկայացվել է ՙԱրցախՀԷԿ՚ բաց բաժնետիրական ընկերությանը ՙԹրղի-4՚ փոքր հիդրոէլեկտրակայանում էլեկտրաէներգիայի (հզորության) արտադրության լիցենզիա տրամադրելու մասին նախագիծը: Ընկերությանը տրամադրվել է Մարտակերտի շրջանի հյուսիսում` Միջնագետի և Ավազագետի միջին հոսանքներում՝ 1980 մետր և ՙԹրղի՚ փոքր հէկերի կասկադի գլխամասային հանգույցի տեղամասում` 1720 մետր նիշերի հատվածում ՙԹրղի-4՚ փոքր հիդրոէլեկտրակայանում էլեկտրաէներգիայի արտադրության գործունեության նպատակով լիցենզիա՝ մինչև 2033թ. նոյեմբերի 30-ը գործողության ժամկետով, որը ներառում է նաև 2016թ. դեկտեմբերի 22-ից մինչև 2018 թվականի նոյեմբերի 30-ը տևող արտադրական հզորությունների կառուցման ժամանակահատվածը: Քննության է առնվել նաև ՙԷներգո Գրուպ՚ ՍՊԸ-ին ՙԿայծաղբյուր՚ փոքր հիդրոէլեկտրակայան 2-ում էլեկտրական էներգիայի (հզորության) արտադրության լիցենզիա տրամադրելու մասին հարցը: Որոշվել է ՍՊԸ-ին Քաշաթաղի շրջանի Լեռնահովիտ համայնքի վարչական տարածքում` Հոչանց գետի տարածքի 1775-1460 մետր գետահատվածում (բնական ջրահոսք) ՙԿայծաղբյուր՚ ՓՀԷԿ-2-ում էլեկտրաէներգիայի արտադրության լիցենզիա տրամադրել մինչև 2020թ. մայիսի 18-ը: Նույն ընկերությանը նաև լիցենզիա է տրամադրվել Քաշաթաղի շրջանի Շալուա և Դրախտաձոր համայնքների տարածքում` Հոչանց գետի 1460-1353 մետր գետահատվածում էլեկտրաէներգիա արտադրելու համար:
ԼՂՀ ՀԾՏՄԿՊՀ վերահսկողության, լիցենզավորման և մուտքերի հաշվառման բաժնի ներկայացմամբ` այսօրվա դրությամբ մեր հանրապետությունում գործում են 17 փոքր հիդրոէլեկտրակայաններ, ՙՍարսանգ ՀԷԿ՚-ը, ներկայում կառուցման փուլում են 13 փոքր հէկեր: Ապագայում ծրագրված է 6 նման հէկերի կառուցում:
Նիստի ավարտին ԱՀ ՀԾՏՄԿՊՀ նախագահ Հակոբ Ղահրամանյանը ՀՀ հանրային ծառայությունները կարգավորող հանձնաժողովի նախագահ Ռոբերտ Նազարյանին շնորհակալություն է հայտնել տասնամյա հաջողված համագործակցության համար` նշելով, որ հայաստանյան գործընկերների պարբերական այցերի և օժանդակության պայմաններում ավելի է բարձրանում իրենց կողմից կատարված աշխատանքների արդյունավետությունը: Հայաստանյան կառույցի ղեկավարն էլ իր հերթին ցանկացած խնդիր ու ծրագիր համատեղ ուժերով հաղթահարելու պատրաստակամություն է հայտնել: Նա նշել է, որ անհրաժեշտության դեպքում հայաստանյան մասնագետները երկարաժամկետ գործուղման կուղարկվեն Արցախ` անհրաժեշտ ուսումնասիրությունները պատշաճ ու ժամանակին իրականացնելու համար:
Նունե ՀԱՅՐԱՊԵՏՅԱՆ