ՙՈՒԺԵՂ ԲԱՆԱԿԸ ՊԱՅՄԱՆԱՎՈՐՎԱԾ Է ՆԱԵՎ ՈՒԺԵՂ ՀԵՐԹԱՓՈԽՈՎ՚

Ավանդական ճամբարների կողքին ծնվում են նորերը: 

ՙԱսպետ՚ ռազմամարզական ճամբարն այդ շարքում իր հաստատուն տեղն ունի: Այս տարի այն 10-րդ անգամ իր ՙդռները բացեց՚ նախազորակոչային տարիքի պատանիների առաջ: ԱՀ կրթության, գիտության և սպորտի ու պաշտպանության նախարարությունների հովանու ներքո գործող այս ճամբարը դարձել է հայրենիքի վաղվա պաշտպանների մկրտության դարբնոց: Չորս հերթափոխով   8-օրյա ժամկետով այստեղ իրենց հանգիստն են անցկացնում  և ռազմագիտությունից դպրոցում ստացած գիտելիքները փորձարկում ԱՀ 10-րդ դասարանն ավարտած պատանիները, որոնց  ամեն տարի միանում են ՀՀ և Սփյուռքից ժամանած նրանց հասակակիցները: 

Հուլիսի 6-ին տեղի ունեցավ ՙԱսպետ՚ ռազմամարզական ճամբարի հանդիսավոր բացումը: 

Հայկական երկու հանրապետությունների դրոշների  ներքո եռագույնը խորհրդանշող շապիկներով ճամբարականների վաշտերն սպասում էին հրամանատարի հրահանգին: Հանդիսավոր բացմանը նրանց պատրաստ լինելու մասին ԱՀ ՊԲ ԱՀՏԱԳ  հրամանատարի տեղակալ գեներալ-մայոր Վարդան Բալայանին զեկուցում է ճամբարի պետ մայոր Արսեն Հարությունյանը:  Եվ սկսվում է բանակային հանդիսությանը հատուկ արարողակարգը: ՊԲ բարձրաստիճան հրամանատարի ողջույնին և շնորհավորանքին հետևում  է ՙզորքի՚ եռակի ՙուռա՚-ն,   այնուհետև  հրամանատարների կողմից խրոխտ հնչեցված` ՙՄեր նշանաբանն է՚ խոսքերին`  վաշտերի ավելի խրոխտ պատասխաննները`ՙ Ուժն է ծնում իրավունքը՚, ՙՏղամարդ` նշանակում է զինվոր՚, ՙՈվ չի խիզախում` չի հաղթում՚, ՙՔաջերի սերունդները քաջ են լինում՚:

Ասպետականներին ողջունեց  և 10-րդ անգամ ճամբարի բացման առթիվ շնորհավորեց ԱՀ կրթության, գիտության և սպորտի նախարար Նարինե  Աղաբալյանը, ով նշեց, որ այդ տասնամյակի ընթացքում շուրջ 6000  պատանիներ  Արցախի բոլոր դպրոցներից, մայր հայրենիքից և Սփյուռքից հնարավորություն են ունեցել իրենց ամառային հանգիստն անցկացնել այստեղ, և  այսօր նրանց`  նոր հերթափոխին է վիճակված բնության գեղատեսիլ վայրում հանգիստը համատեղել հետաքրքիր  առօրյայի, զինվորական կյանքին նախապատրաստվելու հետ:  Այն, որ նրանք պատվով են փոխարինելու ԱՀ սահմանին կանգնած ՊԲ զինվորներին, և որ արժանավոր  հերթափոխ է պատրաստվում, կասկած չկա.  2016 թվականի ապրիլը դա  արդեն ապացուցել է: ՙՎաղը դուք եք գնալու վերահաստատելու այդ ճշմարտությունը՚,-ասաց նախարարը: Նա առանձնահատուկ ողջունեց Լիբանանից ժամանած պատանիներին և համոզմունք հայտնեց, որ հայրենիքում  նրանք իրենց ավելի ուժեղ են զգալու և գնալու են  վերադառնալու ցանկությամբ:  Նախարարը  ճամբարարականներին վստահեցրեց` ամեն ինչ անել նրանց առօրյան հետաքրքիր, նպատակասլաց  դարձնելու համար: 

ՊԲ  հրամանատարի  և բանակի ողջ անձնակազմի անունից ճամբարի բացման առթիվ շնորհավորեց նաև գեներալ-մայոր Վարդան Բալայանը: 

ՙՀակառակորդը խաղաղ ճանապարհով չի ուզում լուծել արցախյան հիմնահարցը, ինչից բխում է, որ մենք դատապարտված ենք ուժեղ լինելու: Իսկ ուժեղ  բանակը պայմանավորված է նաև ուժեղ հերթափոխով՚,-դիմելով ճամբարականներին` ասաց նա: Այս պատանիներն են մեկ-երկու տարի հետո փոխարինելու  սահմանում կանգնած զինվորին: Իսկ ապագա զինվորը  պետք է ռազմագիտությունից գրագետ լինի, առնվազն տիրապետի ինքնաձիգին,  նախնական գիտելիքներ ունենա  զինվորական կանոնադրությունից, պահակային ծառայությունից: Ի դեպ, այդ հատկություններով օժտված զինվորը նախևառաջ կարողանում է ապահովել իր անվտանգությունը: Գաղտնիք չէ, որ բանակում տեղ գտած պատահարները նաև զինվորների` այս ունակություններին թույլ տիրապետելու արդյունք են: 

ՙԱսպետ՚ ճամբարի ստեղծման ակունքներում է եղել ԱՀ կրթության, գիտության և սպորտի նախկին նախարար Սլավա Ասրյանը, ով նույնպես հրավիրված էր ճամբարի բացմանը: Ինչպես միշտ, պատանիներին նրա մաղթանքն էր տվյալ ժամանակահատվածը խելացի օգտագործել հանգստի և ռազմամարզական վարժանքների ուղղությամբ: Ճամբարը նաև  այն  վայրն է, որտեղ յուրաքանչյուրը բացահայտում է սեփական թերությունները և հնարավորություն ստեղծում այդտեղից դուրս գալ դրանք վերացրած, միայն թե պետք են կամքի ուժ, ցանկություն: 

Ճամբարականներին բարեմաղթանքի խոսք ասաց նաև ԱՀ մշակույթի, երիտասարդության հարցերի և զբոսաշրջության փոխնախարար Գայանե Գրիգորյանը: Ոչ միայն  ռազմական առումով պատրաստված, այլև կիրթ, տեխնոլոգիապես զարգացած երիտասարդները կարողանում են դիմագրավել ցանկացած մարտահրավեր, ճամաբարին բարի երթ մաղթեց նա:

Ք. Իվանյանի անվան ռազմամարզական վարժարանի տնօրեն փոխգնդապետ Վահրամ Հակոբյանը նկատեց, որ ՙԱսպետ՚-ի գոյության 10 տարին ցույց է տվել, որ ճամբարում ձևավորված ընկերական մթնոլորտը նպաստում է հետագայում բանակային ծառայության դյուրին անցկացմանը: Այստեղ, ի դեմս հայության երեք հատվածների   ներկայացուցիչների, ավելի առարկայորեն  է երևում Մայր հայրենիք-Արցախ-Սփյուռք  եռամիասնությունը, ձևավորվում միացյալ Հայաստան կերտողների սերունդը:

Լիբանանից ժամանած երիտասարդներն ավարտել են  որևէ վարժարան կամ  քոլեջ: Եվ համալսարան ընդունվելուց առաջ, ճամբարին մասնակցելով,  հայրենիքի հանդեպ իրենց սիրո հավաստումն են բերել, մեզ հետ զրույցում  վստահեցրին Մեսրոպ Հովհաննիսյանը, Միհրան Մուրադյանը, Պարույր Գյույումջյանը, Վարագ Քյոսայանը:  Մ. Հովհաննիսյանը նաև ելույթ ունեցավ ճամբարի բացմանը և ուրախությամբ փաստեց, որ արդեն հինգ օր այդտեղ գտնվելու ժամանակ մտերմացել են ոչ միայն ճամբարականների, այլև տարածքում գտնվող զորամասի զինվորների հետ, նրանց դուր է եկել զինվորական նիստուկացը: 

Մարտավարական հիմունքներ, կրակային պատրաստություն, համազորային կանոնադրություն, շարային պատրաստություն, ռազմական տեղագրություն, առաջին բուժօգնություն. տեսական և գործնական այս պարապմունքներից բացի  ճամբարային օրերի ընթացքում  պատանիներին սպասվում է  ժամանցային հետաքրքիր ծրագիր` հագեցած սպորտային խաղերով և  էքսկուրսիաներով,  հանդիպումներ մարտական գործողությունների մասնակիցների, արվեստի և մշակույթի գործիչների հետ, ինչպես նաև ` գիտակների  մրցույթներ, ամենօրյա մարզաառողջարարական միջոցառումներ`ուղղված առողջ ապրելակերպի ձևավորմանը, հոգեկան ու ֆիզիկական ուժերի վերականգնմանը:

Գեղեցիկ այդ օրն իրենց համերգային ծրագրերով ավելի գեղեցիկ դարձրին մշակույթի Ստեփանակերտի քաղաքային տան սաները և ՊԲ ՙԱսպետ՚ համույթը: 

Սվետլանա ԽԱՉԱՏՐՅԱՆ