[ARM]     [RUS]     [ENG]

ԲՆԱԳԻՏԱԿԱՆ ԴՊՐՈՑ-ՃԱՄԲԱՐԸ՝ ԱԿԱԴԵՄԻԿՈՍ ԻՈՍԻՖՅԱՆԻ ԾՆՆԴԱՎԱՅՐՈՒՄ

Մարտակերտի շրջանի Ծմակահող գյուղում` ականավոր գիտնական և մեծ հայրենասեր Անդրանիկ Իոսիֆյանի ծննդավայրում, հուլիսի 21-ին` ակադեմիկոսի ծննդյան օրը, նրա  անունը կրող դպրոցի կանաչապատ, ընդարձակ բակում տեղի ունեցավ բնագիտական դպրոց-ճամբարի հանդիսավոր բացումը: 

 Ներկա էր ԱՀ կրթության, գիտության և սպորտի նախարար Նարինե Աղաբալյանը:

ԱՀ կրթության, գիտության և սպորտի նախարարության հովանու ներքո ամառային դպրոց-ճամբար այստեղ գործում է 2014 թվականից, իսկ տարվա ընթացքում` կիրակնօրյա դպրոց, ուր հաճախում են ենթաշրջանի դպրոցների բնագիտամաթեմատիկական հակումներով երեխաները, որոնց հետ պարապմունքներ են անցկացնում ԱրՊՀ համապատասխան մասնագետները: Ծրագրի նպատակն է զարգացնել աշակերտների հետաքրքրությունը բնագիտամաթեմատիկական առարկաների նկատմամբ, նրանց տալ  մաթեմատիկական և ծրագրավորման բազային գիտելիքներ, ի հայտ բերել  հեռանկարային աշակերտներին, ծանոթացնել նրանց արցախցի մեծ գիտնականների հայտնագործություններին և կողմնորոշել դեպի գիտության ուղղությունները: 

Ճամբարին մասնակցում են Ծմակահողի կիրակնօրյա դպրոցի աշակերտները  և հարզազրույցի արդյունքներով ընտրված` ենթաշրջանի դպրոցների 5-6-րդ դասարանների աշակերտներ, ընդհանուրը` 70 հոգի:

Անդրանիկ Իոսիֆյան գիտնականի, գյուտարարի, ճարտարագետի, քաղաքացու, իր բնօրրանին նվիրված մարդու կերպարը հպարտություն է առաջացնում յուրաքանչյուր հայի և առանձնապես` արցախցու մեջ: 

Նա ոչ միայն 20-րդ դարի ծնունդ է (ծնվ. 1905թ.), այլև 20-րդ դարը կերտողներից:  Հայ ճարտարագետն ու գյուտարարը էլեկտրամեխանիկայի խորհրդային դպրոցի, խորհրդային հրթիռաշինության և տիեզերագնացության նախահայրերից  է:

Ա. Իոսիֆյանն իրականացրել է սոցիալիստական առաջին երկրի էլեկտրիֆիկացումը, մասնակցել տիեզերքի նվաճմանը:  Ռազմական և տիեզերագնացության գլխավոր կոնստրուկտորներից մեկն էր: Խորհրդային առաջին  տիեզերանավերն ամբողջությամբ հագեցած էին Իոսիֆյանի ստեղծած էլեկտրասարքավորումներով: Մասնագետները նրա անունը դասում էին Կուրչատովի, Կորոլյովի և Կելդիշի կողքին: Մեծ գիտնականն ամուր թելերով կապված էր իր ծննդավայրի հետ, ամառները արձակուրդներն անց էր կացնում հայրենի գյուղում, շփվում գյուղացիների հետ,  մասնակցում խոտհարքին, խորհուրդներ տալիս, օգնում գյուղին:

Բնական է, որ Ծմակահողում բնագիտական ամառային դպրոց-ճամբարի բացման արարողությունն էլ պետք է սկսվեր հանճարեղ զավակի մասին զրույցով, որն էլ ներկայացրեց Արցախի պետական համալսարանի ֆիզիկայի ամբիոնի պրոֆեսոր, ճամբարի ստեղծման ջատագով Կարեն Արամյանը:  ՙԱնդրանիկ Իոսիֆյանին երախտապարտ լինելու դրսևորումը պիտի լինի Արցախում բնագիտամաթեմատիկական ուղղության զարգացումը: Երեխաներին ճամբար բերելու հիմնական նպատակներից մեկը հենց դա է.  նախ`  զգան Իոսիֆյանի ոգին, երկրորդ` ընտրեն այնպիսի ուղղություններ, որոնցով լավագույն ապագա ստեղծեն իրենց  և մեր երկրի համար՚,-  ասաց նա և աշակերտներին մաղթեց միշտ ՙտառապել՚ առաջադեմ գաղափարներով: 

 ԱՀ կրթության, գիտության և սպորտի նախարար Ն. Աղաբալյանը  երեխաներին հորդորեց ճանաչել մեր մեծերին և նաև հասկանալ, որ իրենք էլ այդ նույն գեների կրողներն են, և դրանք կարթնանան նրանց մեջ, եթե յուրաքանչյուրն իր առջև դնի  նպատակ  ու  հետևողական աշխատանք տանի գիտելիքների յուրացման ուղղությամբ, ճանաչելի դառնալ ոչ միայն հայրենիքում, այլև ամբողջ աշխարհում: Նա մաղթեց նրանց բնության այդ հիասքանչ անկյունում հաճելի հանգիստը զուգորդել նոր գիտելքիներով զինվելու հետ և կողմնորոշվել իրենց հետագա մասնագիտության հարցում:

Շրջանի ղեկավարության անունից մասնակիցներին ողջունեց և ճամբարի  ճանաչողական, ուսուցողական, դաստիարակչական  առաքելությունը կարևորեց  Մարտակերտի շրջվարչակազմի կրթության և սպորտի բաժնի վարիչ Դավիթ Լալայանը: 

Ճամբարում դասընթացներ են վարում ԵՊՀ ծրագրավորման և տեղեկատվական տեխնոլոգիաների ամբիոնի դասախոս, ֆիզմաթ գիտությունների թեկնածու, դոցենտ Սվետլանա Ավետիսյանը, ուսանողներ,  ֆիզմաթ դպրոցների բարձր դասարանցիներ, մասնագետներ Արցախից: 

Ս. Ավետիսյանը` ճամբարի շարժիչ ուժը, ով  Ա. Իոսիֆյանի քրոջ աղջիկն է,  իր գոհունակությունը հայտնեց մասնակիցների և դասավանդողների խմբերից: ՙԱյս դպրոցի գլխավոր դերը ոչ միայն այն է, որ երեխաների մեջ  սեր արթնացնենք  դեպի բնագիտամաթեմատիկական առարկաները, այլև այն, որ նրանք հասկանան, թե որ ուղղությամբ պետք  է գնան:  Շփումներն  ուսանողների, Երևանի լավագույն դպրոցների ներկայացուցիչների հետ նրանց հնարավորություն են տալիս ճիշտ կողմնորոշվել՚,-ասաց նա:

 Ի դեպ, Վանք գյուղից կիրակնօյա դպրոց և հինգ տարի  ճամբար հաճախած այս տարվա շրջանավարտներից մեկն ընդունվել է ԵՊՀ ծրագրավորման բաժին: Տեղեկացանք, որ ճամբարականների մեջ  կան հետևորդներ: Ս. Ավետիսյանը շուրջ երկու տասնամյակ հատուկ դասընթացներ է  վարում ԱրՊՀ-ում: Արցախում ծրագրավորման գործընթացի հիմնադիր, ԱրՊՀ պրոռեկտոր և այս ճամբարի ակտիվ նախաձեռնող Գեորգի Սահակյանը տեղեկացրեց, որ   համալսարանի գիտխորհուրդը  որոշում է կայացրել Սվետլանա Ավետիսյանին ԱրՊՀ պատվավոր պրոֆեսորի կոչում շնորհեու մասին`  Ծմակահողի կիրակնօրյա դպրոցի և ճամբարի ու  համալսարանի կիրառական մաթեմատիկայի ամբիոնի զարգացման գործում ունեցած ավանդի համար,  և  նրան հանձնեց վկայականը: 

Ճամբարականներին  ծրագիրը մատուցվում  է դասախոսությունների, թեմատիկ բանավեճերի, դասընթացների, խաղերի, մրցույթների միջոցով: Նրանց համար կազմակերպվելու են նաև արշավներ դեպի Արցախի պատմամշակութային վայրեր, այցեր թանգարաններ, նախատեսված է մարզամշակութային ժամանց:  

Մարդու կյանքը կարճ է, բայց նրա հոգին, միտքը, կատարած գործն անմահ են:  Արցախի մեծ զավակ Անդրանիկ Իոսիֆյանի կենդանի հոգին սավառնում է  հայրենի եզերքի երկնակամարում` կենսալիցքերով կենարար դաշտ ստեղծելով բարի պտուղների համար: 

 

 

                                                                                                             Սվետլանա ԽԱՉԱՏՐՅԱՆ