[ARM]     [RUS]     [ENG]

ՔՅՈՒՐԱԹԱՂՈՒՄ ԱՊԱԳԱՅԻ ՀԱՆԴԵՊ ՀԱՎԱՏ ՈՒՆԵՆ

Քյուրաթաղի համայնքը Հադրութի շրջանի կայացած համայնքներից է:

Այն առանձնանում է համայնքային բուռը կյանքով ու բնակիչների ներքին   համախմբվածությամբ: Համայնքում արտագաղթ չկա, երիտասարդները մնում են գյուղում և իրենց  ամենօրյա աշխատանքով շենացնում գյուղը: Այն տեղակայված է Վանեսա սարի ստորոտում, հյուսիս-հարավ մայրուղուց 17 կմ հեռավորության վրա: Գյուղում կա Սուրբ Աստվածածին եկեղեցին (17-րդ դար), որը վերանորոգվել է համագյուղացի բարերարի միջոցներով: 

1990 թվականին գյուղում կազմավորվել էր կամավորական ջոկատ, որի հենքի վրա 1992-ին ձևավորվել էր Առաջին պաշտպանական գնդի վաշտերից մեկը: Արցախյան գոյամարտում գյուղից  զոհվել է 7 ազատամարտիկ:

 2018 թվականի հունվարի 1-ի դրությամբ համայնքում առկա է 79 տնտեսություն, բնակչության թիվը` 343 մարդ: Համայնքում բնակչության աճ է գրանցվել` 2017 թվականին ծնվել է 9 երեխա: Մինչև 5 տարեկան մոտ  40 երեխա կա գյուղում: Գործում է միջնակարգ դպրոց, որտեղ սովորում են 64 աշակերտներ, նրանց ուսուցմամբ զբաղված են 23 ուսուցիչներ: Ակումբը դարձել է երիտասարդության հավաքատեղի, սակայն այն վերանորոգման կարիք ունի: Բուժական-մանկաբարձական կետն ապահովում է գյուղի բնակչության բուժսպասարկումը: Գյուղը լրիվությամբ էլեկտրիֆիկացված է, ապահովված  հեռախոսակապով, հասանելի է համացանցը: Ապահովված է խմելու ջրով, փորվել է արտեզյան ջրհոր, վերակառուցվել է գյուղի ներքին ջրատար ցանցը: Լուծում է ստացել գյուղի բնակչությանը հուզող հարցերից մեկը` կառուցվել  է համայնքային կենտրոն, որտեղ տեղակայված է գյուղապետարանի աշխատակազմը, բուժական-մանկաբարձական կետը, գրադարանը, համակարգչային սենյակը: Գործում է հանդիսությունների տունը: 

Համայնքի բնակչությունը հիմնականում զբաղվում է հողագործությամբ և անասնապահությամբ: Համայնքի ընդհանուր տարածքը  578 հա է, որից 530 հա`  գյուղատնտեսական նշանակության հողեր: Վարելահողերը կազմում են 162,21 հա: 2018 թվականի բերքի տակ կատարվել է 90 հա  ցորենի ցանքս: Անցյալ տարվա նույն ժամանակահատվածի համեմատությամբ անասնագլխաքանակի  նվազում է գրանցվել: Ենթաշրջանի   զարգացման ծրագրով փորվել է արտեզյան ջրհոր  բանջարաբոստանային կուլտուրաների ոռոգման նպատակով: 

Համայնքն ունի մի շարք չլուծված խնդիրներ: Չնայած գյուղում կառուցվել  են բնակելի տներ բազմազավակ և զոհված ազատամարտիկի ընտանիքների համար, բայց և այնպես դեռևս բնակարանի պակասի խնդիր կա: Գյուղի ներքին ջրատար ցանցը, գյուղ մտնող ճանապարհը և գյուղամիջյան փողոցները վերանորոգման կարիք ունեն: Բնակչությունը հավատով է լցված ապագայի հանդեպ և հույսով է, որ, լուծելով այս խնդիրները, համայնքը զարգացում կապրի:

 

 

Էդիկ ԴԱՎԹՅԱՆ

ք. Հադրութ