ԱՎԱՐՏԻ ԺԱՄԿԵՏԸ ՄՈՏ Է
Զոհրաբ ԸՌՔՈՅԱՆ
2011 թվականին Բերձորում սկսվեց Քաշաթաղի շրջանային բուժմիավորման նոր շենքի կառուցումը։ Անցած 8 տարիների ընթացքում պարբերաբար կատարվել են շինարարական աշխատանքներ, սակայն առայսօր Քաշաթաղի բուժմիավորումը տեղակայված է նախկին շենքում և ունի բազում խնդիրներ։ Բուժզննվելու, բուժվելու համար քաշաթաղցիներն ստիպված են մեկնել Ստեփանակերտ, Երևան, Կապան, Գորիս։
Վերջերս Արցախի Հանրապետության քաղաքաշինության նախարար Կարեն Շահրամանյանը հեռուստահարցազրույցի ժամանակ հայտնեց, որ 2019թ. սեպտեմբերին Քաշաթաղի բուժմիավորման շենքը կհանձնվի շահագործման. անհրաժեշտ ֆինանսավորումն ապահովված է, և շինարարներն աշխատում են։ Արդեն 2 տարի է, ինչ բուժմիավորման շենքի շինարարությունն իրականացվում է Ստեփանակերտում գործող ՙՍուր-Նարեկ՚ ՍՊԸ-ի կողմից։ Պարթև Հովհաննիսյանը, ով ղեկավարում է աշխատանքները, տեղեկացրեց՝ շենքի տարածքում այս օրերին կատարում են հարթեցման, բարեկարգման, ջրագծի և հոսանքալարերի անցկացում։ Այցի պահին ՍՊԸ-ին պատկանող էքսկավատորը շենքի արևելյան պատի մոտ փոս էր բացում՝ ջրագծի և հոսանքագծի անցկացման համար։ Ներսում հիմնական աշխատանքներն ավարտվել են, տեղադրվել են դռներն ու պատուհանները, էլեկտրական ջրատաքացուցիչները. պատրաստ է սան-հանգույցը. մնացել է՝ հատակների սալիկապատումը, ջեռուցման մարտկոցների տեղադրումը և ներքին հարդարման այլ աշխատանքներ։ Գործում է նաև վերելակը։ Պ. Հովհաննիսյանն ասաց՝ շինանյութի կեսը տեղում է արդեն, մնացածը կբերեն շուտով։ Այս օրերին տեղում աշխատում են մոտ 10 շինարարներ, աշխատողի խնդիր չկա։ Կարևորեց, որ ֆինանսավորումը լինի ժամանակին։
Պ. Հովհաննիսյանի հետ շրջեցի շենքի տարածքում։ Նկուղային հարկում, որտեղ կգործեն լաբորատորիա, լվացքատուն, խոհանոց, ճաշարան, դեղատուն, ջրամատակարարման սենյակ և այլն, հատակը ևս պատրաստ է, և քիչ աշխատանքներ են մնացել կատարելու։ Առաջին հարկում կգործեն պոլիկլինիկան, ռենտգեն և այլ ախտորոշիչ սենյակներ։ Հիվանդանոցը կունենա ընդհանուր 27 մահճակալ։ Որոշ սենյակներում՝ վիրահատարան, ծննդատուն, վիրակապարան և այլն, գործելու է օդափոխության ներածման և արտածման համակարգը։ Շինարարներն զբաղված էին կաթասայատան, վառելափայտի պահեստի և դիզել-գեներատորի սենյակի կարգավորման աշխատանքներով։ Պատրաստ է նաև պահակատան հիմքը։ Մելսիկ Սաֆարյանը և Հրայր Ղազարյանը 11 տարի է, ինչ աշխատում են ՙՍուր-Նարեկ՚ ՍՊԸ-ում, իսկ գյումրեցի Մելքոն Հակոբյանը 4-5 ամիս է, ինչ այստեղ է։ Եռակցող Մամիկ Սարաջյանը Բերձորից է։ Գոհ են նաև մյուս շինարարները, որ ունեն աշխատանք, պատրաստ են նախատեսած ժամկետին ավարտել այս կարևոր կառույցի շինարարությունը, միայն թե հարկադիր պարապուրդ չլինի։ Բժշկական սարքավորումներն ու գույքը կտեղադրվի ԱՀ առողջապահության նախարարության մասնագետների կողմից շինարարական աշխատանքներն ավարտելուց հետո։ Շինարարությունը վերահսկվում է ԱՀ Քաղաքաշինության նախարարության տեխհսկիչների կողմից։ Գագիկ Ասրյանը տեղեկացրեց՝ աշխատանքները կատարվում են նախատեսված նորմերով, որակով։ Կատարվող աշխատանքներին զուգահեռ բարեկարգվում է տարածքը (ասֆալտապատում, կանաչապատում, լուսավորության անցկացում, ցանկապատում մետաղական հատուկ ցանցով և այլն)։
Հիվանդանոցն ունենալու է առանձին ենթակայան, իսկ էլեկտրական հոսանքի անջատման դեպքում կգործի 50կ/վ հզորությամբ դիզել-գեներատորը։ Հատակները կպատվեն հատուկ ՙՎինիլ՚ նյութով, որը էկոլոգիապես անվտանգ է, դիմացկուն։ Ռենտգեն սենյակի համար հատուկ են դռները, և ներսի պատերը պատվելու են հատուկ նյութով, որ ճառագայթումը բացառվի։ Գ. Ասրյանը նույնպես հույս հայտնեց, որ սեպտեմբեր-հոկտեմբեր ամիսներին բուժմիավորման շենքը պատրաստ կլինի։ Հուսանք՝ շինարարները պարապուրդ չեն ունենա, և շուտով շրջանը կունենանք երկար սպասված նոր հիվանդանոց։