ՆՈՐ ՄԱՐԱՂԱՆ ՎԵՐՔԵՐԻ ԱՄՈՔՄԱՆ ՃԱՆԱՊԱՐՀԻՆ
Հենրիխ ՄԱՆՈՒԿՅԱՆ
ք. Մարտակերտ
...Երբեմնի ծաղկուն Մարաղան բնակչության և արդյունաբերական օբյեկտների առումով Մարտակերտի շրջանի ամենախոշոր բնակավայրերից էր: Այստեղ մարդիկ ապրում էին բարեկեցիկ կյանքով: Սակայն անցյալ դարի 90-ական թվականներին ադրբեջանա-արցախյան զինված առճակատումը շատ բան փոխեց մարաղացիների կյանքում: 1992-ի ապրիլի 10-ին ընկավ Մարաղան: Պատերազմից հետո երջանկահիշատակ Վագիֆ Համբարձումյանի աջակցությամբ իրականացվեց Արցախի իշխանությունների` Մարաղայի վերաբնակեցման որոշումը։ Հիմնվեց Նոր Մարաղան, որտեղ այսօր նախկին ավանդույթները շարունակում են 560 բնակիչները։
Մեր հարցազրույցը համայնքի նորընտիր ղեկավար Արտյոմ ԳՐԻԳՈՐՅԱՆԻ հետ:
-Պարոն Գրիգորյան, համայնքի ղեկավար լինելը պատասխանատու գործ է, մանավանդ չլուծված խնդիրների, հոգսերի ֆոնին։ Պատրաստ ե՞ք դիմակայել առկա մարտահրավերներին։
-Մինչև թեկնածությունս առաջադրելը ուսումնասիրել եմ համայնքի խնդիրներն ու հանգել նրան, որ ի զորու եմ լուծել համայնքի բնակիչների պահանջները։
Իհարկե, կան խնդիրներ, որոնք մտահոգում են համայնքին, մանավանդ, որ նա աճող է։ Օրինակ, մինչև այսօր չունենք հանդիսությունների սրահ, մարդիկ յուրովի են կազմակերպում իրենց միջոցառումները։ Հիմա այդ հարցը լուծման փուլում է, կառուցում ենք նաև երկար սպասված մանկապարտեզի շենքը, ապաստարան։ Շրջվարչակազմի ղեկավար Էդգար Հարությունյանի անմիջական աջակցությամբ լուծվել է համայնքով անցնող մայրուղու գիշերային լուսավորության հարցը, նորոգվել են տասնյակ տների տանիքներ։ Համայնքին թարմություն ու նոր շունչ կտա նաև դպրոցական շենքի ընդլայնումը, ինչի համար ՙԲեյզ Մեթըլս՚-ի տնօրինությունը հատկացրել է 45 մլն դրամ։ Այնպես որ, գյուղը կամաց-կամաց ամոքում է վերքերը։
-Բոլոր ընտանիքնե՞րն են օգտվել հողերի սեփականաշնորհումից:
-Ներկա պահին` ոչ բոլորը, համայնքի հողային ֆոնդի ոչ ճիշտ բաշխման հետևանքով ընտանիքներ կան, որ չեն օգտվել։ Դեռևս շարունակվում է դիմումների ներկայացման գործընթացը։
-Սեփականաշնորհված հողատարածքներում աշխատելը ևս աշխատատեղ է։
-Այո, բոլորն աշխատում են, ունենք նաև վարձակալներ։ Երիտասարդների մի մասը ծառայում է բանակում, մի մասն էլ հանքարդյունաբերությունում։
-Լավ է, որ միջոցներ է ներդրվում դպրոցական շենքի ընդլայնման համար, նշանակում է դպրոցահասակ երեխաների աճ կա։
-Միանշանակ, աշակերտների աճ է գրանցվում, ինչը միայն ողջունել կարելի է: Հավելեմ, որ բոլոր տոն ու հիշատակի օրերին դպրոցը կազմակերպում է տարաբնույթ միջոցառումներ, ինչին աջակցում է նաև համայնքի ակումբավար Սվետլանա Հակոբյանը։
Տնտեսության կայացմանը նպաստում է նաև աշնանացան և գարնանացան մշակաբույսերի վար ու ցանքսը։
Անշուշտ: Անցյալ տարի կատարել ենք շուրջ 300 հա աշնանացան, որից ապահովվել է գոհացուցիչ բերք։ Այս տարի թեև չորային է, պահպանվելու է այդ բնագիծը։ Նշեմ նաև, որ բանջարաբոստանային մշակաբույսերից լավ բերք ենք ստացել։
Օրըստորե բարձրանում է համայնքի ավագանու դերը:
Բարեբախտաբար ավագանու կազմում կարող է մարդիկ են ընտրվել։ Արդեն հասցրել ենք աշխատանքի բաժանում կատարել, իսկ բոլոր հարցերը կքննարկվեն ու կլուծվեն կոլեգիալ հիմունքներով։