ԲՆԱԿԱՐԱՆԱՅԻՆ ՊԱՅՄԱՆՆԵՐԻ ԲԱՐԵԼԱՎՄԱՆ ՔԱՂԱՔԱԿԱՆՈՒԹՅՈՒՆԸ ՇԱՐՈՒՆԱԿԱԿԱՆ Է
Էդիկ ԴԱՎԹՅԱՆ
ԱՀ կառավարության 2018 թվականի դեկտեմբերի 7-ի ընդունված որոշման համաձայն շրջանների վարչակազմերում ստեղծվել են հանձնաժողովներ, որոնք կազմակերպել են բնակարանային պայմանների բարելավման կարիք ունեցող առանձին սոցիալական խմբերում ընդգրկված քաղաքացիների հաշվառման և նրանց բնակարանների կամ բնակելի տների վերանորոգման գործընթացը։ Կատարված աշխատանքների մասին կիսվեցինք Հադրութի շրջվարչակազմի ղեկավարի տեղակալ, հանձնաժողովի նախագահ Նվեր Գրիգորյանի հետ։
- Պարոն Գրիգորյան, արցախյան գոյամարտի հրադադարից անցել է շուրջ 26 տարի։ Այդ տարիներին պետության և հովանավորների միջոցներով զգալի աշխատանքներ են իրականացվել սոցիալական տարբեր խմբերի բնակարանային պայմանների բարելավման համար։ Անցած մեկ տարում հանձնաժողովը ի՞նչ աշխատանքներ է իրականացրել բնակարանային պայմանների բարելավման կարիք ունեցող առանձին սոցիալական խմբերում ընդգրկված քաղաքացիների հաշվառման ուղղությամբ։
- Հանձնաժողովի կողմից կատարված աշխատանքները տեսանելի են։ Հանձնաժողով են դիմել 227 քաղաքացի։ Յուրաքանչյուր դիմումատուի համար ստեղծված են անձնական գործեր։ Ձգտել ենք երևան հանել յուրաքանչյուր դիմումատուին նախկինում հատկացված գումարները և կատարված աշխատանքների ծավալը։ Այդ իսկ առումով դիմումատուներից 58-ի խնդրանքը մերժվել է` հաշվի առնելով, որ ժամանակին պետական աջակցությամբ ձեռք է բերվել բնակարան կամ բնակելի տուն։ Նրանց տեղեկացվել է, որ հնարավորության սահմաններում կհատկացվեն շինանյութեր բնակարանների վերանորոգման համար։ Հանձնաժողովի որոշմամբ առաջին հերթին քննարկվել է այն դիմումատուների խնդրանքը, որոնք պետական աջակցությունից ընդհանրապես չեն օգտվել։ Կատարված աշխատանքների արդյունքներով ձևավորված հերթացուցակներում ընդգրկվել են 27 զոհված ազատամարտիկների և երկու 1-ին խմբի հաշմանդամների ընտանիքներ, որոնց համար պետք է կատարվեն բնակելի տների կամ բնակարանների վերանորոգման, կառուցման կամ գնման աշխատանքներ։
- Այդ ուղղությամբ ի՞նչ աշխատանքներ եք իրականացրել 2019 թվականին
- 2019 թվականին բնակարանային պայմանների բարելավման կարիք ունեցող առանձին սոցիալական խմբերում ընդգրկված քաղաքացիներին աջակցություն ցուցաբերելու նպատակով Հադրութի վարչակազմին հատկացվել է 80 մլն դրամ։ Նշված գումարից հինգ զոհված զինծառայողի և մեկ 1-ին կարգի զիվորական հաշմանդամի ընտանիքներին տրամադրվել է փոխհատուցում բնակելի տների վերանորոգման համար։ Սկսված է երկու զոհված զինծառայողի ընտանիքների բնակարանների վերանորոգումը։ Կառավարության թույլտվությամբ մեկ առաջին խմբի զինվորական հաշմանդամի տրամադրվել է 10 մլն դրամ փոխհատուցում` բնակարան ձեռք բերելու համար։ Կատարված աշխատանքների արդյունքում հերթացուցակում գրանցված 27 քաղաքացիներից 9-ի խնդրանքը բավարարվել է։ Այդ աշխատանքները շարունակական են, և 2020 թվականին հատկացված գումարներով կլուծվեն հերթագրված մյուս քաղաքացիների բնակարանային հարցերը։ Բնակարանների վերանորոգման ծավալների և գումարի հստակության նպատակով յուրաքանչյուր բնակելի տան համար համապատասխան մարմնի կողմից կազմվում են նախահաշվային փաստաթղթեր։
- Բնակարանների վերանորոգման կարևոր պայման է նաև շինանյութերի տրամադրումը, այդ ուղղությամբ ի՞նչ աշխատանքներ են տարվել։
- Առաջնորդվելով ԱՀ կառավարության համապատասխան որոշումներով` Հադրութի շրջվարչակազմի կողմից շրջանի համայնքներին և բնակիչներին տրամադրվել է 168,9 խոր. մետր կողահատ փայտանյութ, 284,7 տոննա ցեմենտ, 22 հազար 893 քառ. մետր թիթեղ, ինչպես նաև մոտ 50 անվանում այլ շինանյութեր/ ներկ, ծեփամածուկ, նրբատախտակ և այլն/։ Ընդհանուր առմամբ 2019 թվականին շինանյութերի տրամադրման ծրագրի շահառուների թիվը կազմել է 580 քաղաքացի։ Նշված ծրագրի ծախսերի ընդհանուր գումարը կազմել է 126 մլն 012 հազար դրամ։ Աշխատանքները ավելի թափանցիկ դարձնելու նպատակով հարցը քննարկվել է վարչակազմի ղեկավարին կից շրջանային խորհրդի նիստում` համայնքների ղեկավարների մասնակցությամբ։ Քննարկման արդյունքներով մի շարք առաջարկություններ ընդունվել են, որոնք կիրականացվեն 2020 թվականին։