ԱՇԽԱՏՈՂՆԵՐԻ ԻՐԱՎՈՒՆՔՆԵՐԻ ՀԱՃԱԽ ԳՐԱՆՑՎՈՂ ԽԱԽՏՈՒՄՆԵՐԸ ԱՐՀՄԻՈՒԹՅՈՒՆՆԵՐԻ ՖԵԴԵՐԱՑԻԱՅԻ ԴԻՏԱՆԿՅՈՒՆԻՑ
Վան ՆՈՎԻԿՈՎ
Արցախի Հանրապետության Արհմիությունների ֆեդերացիան ներկայում միավորում է շուրջ 696 արհմկազմակերպություններ՝ 21 հազար 850 անդամներով, ընդ որում՝ 40 տոկոսը պետական հիմնարկների աշխատողներ են, 60-ը՝ մասնավոր հատվածի։
Արհմիությունների ֆեդերացիայի նախագահ Արա Ղահրամանյանը տեղեկացրեց, որ իրենց գործունեության վերջին 5 տարվա ընթացքում շուրջ 7320 դիմում-բողոք են ստացել, որից 20 տոկոսը կամ 1464-ը, վերաբերում է աշխատանքային օրենսգրքի խախտումներին։ Ըստ այդմ արձանագրել են, որ գործատուների կողմից աշխատողների իրավունքների խախտումներն ու վիճահարույց հարցերը հիմնականում առնչվում են աշխատավարձերի չափին, դրանք ոչ ժամանակին վճարելուն, աշխատանքային պայմանագրերին, արձակուրդների ու անաշխատունակության թերթիկների տրամադրման կարգերին, ինչպես նաև խանութներում ժամկետանց ապրանքին ու հացթխման կետերի որակի թերացումներին։
Աշխատանքային օրենսգրքի խախտումների նման վիճակագրությունն ու բովանդակությունը, անկախ իրավական-կազմակերպչական ձևից, ընդհանրական է և՜ պետական համակարգի, և՜ մասնավոր հատվածի գործատուների դեպքում։ Մասնավորապես, պետական համակարգի աշխատողներից ստացված դիմում-բողոքների համաձայն այստեղ գերակշռում են աշխատատեղերի կրճատման կարգի և աշխատավարձերի վճարման ժամանակացույցի խախտումները։ Մասնավոր հատվածում՝ աշխատավարձերի չհստակեցված չափի ու վճարման ժամկետների, հավելյալ աշխատաժամանակի ու հավելավճարների, աշխատանքային արձակուրդների և անաշխատունակության թերթիկների տրամադրման՝ օրենքով սահմանված կարգի խախտումների վերաբերյալ։ Ըստ ոլորտների՝ աշխատողների իրավունքների ամենաշատ խախտումները գրանցվել են շինարարական և առևտրային կազմակերպություններում։
-Օրինակ, շինարարությունում միջամտությամբ լուծված խնդրից է եղել աշխատողների վերջնահաշվարկների վերականգնումը։ Երբ աշխատողի համապատասխան դիմումը ստանալուց հետո զանգահարեցին համապատասխան շինարարական կազմակերպություն, հաշվապահը զարմացավ, ապա տեղեկացրեց, որ իրենց մոտ վերջնահաշվարկի վճարման կարգ սահմանված չէ։ Այդուհանդերձ, վերջին 5 տարվա կտրվածքով վերականգնել ենք աշխատողների շուրջ 780 հազար դրամի չափով վերջնահաշվարկ։ Շուրջ 21 արհմիութենականներ վերականգնվել են աշխատանքի, բազմաթիվ դեպքերում էլ՝ մեր միջամտությունն օգնել է, որպեսզի աշխատավարձերը ժամանակին հասնեն հասցեատիրոջը։ Ի պատասխան մեր հարցումների՝ շինարարական կազմակերպությունների ներկայացուցիչները պատճառաբանում են, որ տարեսկզբին պատվիրատուն, ըստ կնքված պայմանագրերի, սահմանված վճարումները ժամանակին չի կատարում,- մանրամասնեց Ա. Ղահրամանյանը՝ հավելելով նաև, որ բացի այդ, շինարարական և առևտրային կազմակերպություններում աշխատանքային պայմանագրերի երկրորդ օրինակը աշխատողին չի հանձնվում։
- Բազմիցս տեղեկացրել ենք, որ գործատուն պարտավոր է պայմանագրի երկրորդ օրինակը, որտեղ ամրագրված են երկու կողմերի իրավունքներն ու պարտականությունները, հանձնել աշխատողին։ Եթե պայմանագրի օրինակը աշխատողի մոտ չի գտնվում, ապա վիճահարույց դեպքերում դժվար է ապացուցել այն խախտումները, որոնք վերաբերում են աշխատավարձի չափին կամ աշխատաժամանակին։ Ընդ որում, նմանօրինակ վեճերի լուծումը և խախտված իրավունքների վերականգնումը դժվար է նույնիսկ դատական միջամտությամբ։ Մինչդեռ, երբ առկա է աշխատանքային պայմանագրի երկրորդ օրինակը, ապա, վեճը, որպես կանոն, լուծվում է գործատուի հետ երկխոսության արդյունքում, - ասաց մեր զրուցակիցը՝ նշելով, որ գործատուի հետ անմիջական երկխոսության ու բանակցությունների միջոցով վեճի կարգավորումը իրենց հիմնական գործելաոճն է։
Ի դեպ, վերջին 15 տարվա ընթացքում, Արհմիությունների ֆեդերացիան միայն 10 անգամ է դիմել Արցախի դատախազություն՝ աշխատողների իրավունքների վերականգնման համար։
Անդրադառնալով օրենսդրական դաշտում իր նկատած խնդիրներին, Ա. Ղահրամանյանը նշեց, որ ներկայում Արցախի Հանրապետությունը չունի աշխատանքային օրենսգիք և առաջնորդվում է ՀՀ-ում գործող օրենսգրքով։ Մասնավորապես՝ աշխատատեղերի կրճատման գործընթացում գործատուները հաճախ առաջնորդվում են այդ օրենսգրքի 113-րդ հոդվածով։
-Օրինակ՝ մեր իրականության մեջ գործատուն կարող է աշխատակցին հեռացնել աշխատանքից` պատճառաբանելով դրա ծավալի նվազմամբ։ Նույն հոդվածի մեկ այլ կետի համաձայն գործատուն կարող է աշխատողին անվստահություն հայտնել։ Լինում են դեպքեր, երբ 15 տարվա համատեղ աշխատանքից հետո գործատուն աշխատողին անվստահություն է հայտնում։ Պարադոքս է։ Բացի այդ, գործող աշխատանքային օրենսգրքի այդ հոդվածից ապահովագրված չեն մեր սոցիալապես խոցելի խմբերի աշխատողները՝ հաշմանդամներ, բազմազավակներ, ինչպես նաև համապատասխան մասնագիտական որակավորում ունեցող անձինք։ Նույնը վերաբերում է անաշխատունակության թերթիկների տրամադրման կարգին, որը 3 անգամ փոփոխության է ենթարկվել։ Առաջին տարբերակով աշխատողի հիվանդանալու և անաշխատունակության թերթիկի առկայության դեպքում սահմանված էր աշխատավարձի 100 տոկոսի չափով վճար՝ գործատուի կողմից։ Այնուհետև օրենքի փոփոխությամբ շեմն իջեցվել է 80 տոկոսի։ Մինչդեռ պետությանը հարկեր վճարող աշխատողը, հիվանդանալու դեպքում, պիտի գոնե աշխատավարձի չափով վճար ստանա,- ասաց Ա. Ղահրամանյանը։
Արհմիությունների նախագահի կարծիքով, խնդրահարույց է նաև կոլեկտիվ պայմանագրերի մասով գործող կարգը։ Ըստ այդմ, ներկայում գործատուն իրավունք ունի աշխատողներին կամավորության սկզբունքով սոցիալական փաթեթներ տրամադրել։ Ըստ նրա, աշխատանքային իրավահարաբերություններին վերաբերող օրինագծերը մինչ կառավարությունում և Ազգային ժողովում շրջանառելը, պետք է հանրային քննարկման դրվեն։