COVID-19 ՎԱՐԱԿՈՎ ՊԱՅՄԱՆԱՎՈՐՎԱԾ ԻՐԱՎԻՃԱԿՆ ԱՐՑԱԽՈՒՄ ՎԵՐԱՀՍԿԵԼԻ Է
Զարինե ՄԱՅԻԼՅԱՆ
ԱՀ առողջապահության նախարարության տվյալներով Արցախում հուլիսի 17-ի ժամը 11։00-ի դրությամբ հաստատվել է կորոնավիրուսային հիվանդության 7 նոր և ընդհանուր 163 դեպք: Վարակակիրներից 2-ը հայտնաբերվել է ՀՀ-ԱՀ սահմանային անցակետում իրականացված թեստավորման արդյունքում, իսկ 4 հիվանդ էլ նախկինում հաստատված վարակակիրների շփման շրջանակից են, մեկ այլ դեպք էլ՝ նոր օջախից: Բոլոր նոր վարակվածները Ստեփանակերտից են: Նույն ժամանակաընթացքում ապաքինվել է 5 քաղաքացի, իսկ ընդհանուր առմամբ Արցախում բուժվել է 133 վարակակիր: Ներկայումս բուժվում է 30 հիվանդ. նրանցից երկուսի առողջական վիճակը ծանր է, չորսինն էլ՝ միջին ծանրության: Հուլիսի 17-ի դրությամբ մեկուսացված է 50 քաղաքացի, իսկ ընդհանուր կատարվել է 3504 փորձանմուշի հետազոտություն:
Արցախում ձևավորված նոր տիպի կորոնավիրուսային համավարակի տարածման կանխարգելման աշխատանքները համակարգող միջգերատեսչական հանձնաժողովի շրջանակներում գործարկվող տեղեկատվական շտաբը հուլիսի 14-ից վերսկսել է առցանց ասուլիսների շարքը: COVID-19 -ի դեմ պայքարի հակահամաճարակային միջացառումների, աշխարհում, ԱՀ-ում և ՀՀ-ում հաստատված դեպքերի ու հիվանդացության վիճակագրության մասին ներկայացրեց Արցախի առողջապահության նախարարության աշխատակազմի պետական հիգիենիկ և հակահամաճարակային տեսչության պետ Օֆելյա Հարությունյանը: Նրա հավաստմամբ՝ մեր հանրապետությունում նոր տիպի կորոնավիրուսով պայմանավորված իրավիճակը վերահսկելի է։ Վարակվածների մեծ մասը (շուրջ 43%) Ստեփանակերտից են, մնացած դեպքերը գրանցվել են ԱՀ բոլոր շրջաններում։ Նոր տիպի կորոնավիրուսային վարակով հիվանդները բուժում են ստանում ԱՀ հանրապետական բժշկական կենտրոնում, իսկ մեկուսացվածները գտնվում են հյուրանոցներում՝ բուժհսկողության ներքո։ Օ. Հարությունյանի պարզաբանմամբ՝ յուրաքանչյուր նոր հաստատված դեպքի ժամանակ կատարվում են անհրաժեշտ աշխատանքներ հիվանդների շփման շրջանակը պարզելու և նրանց մեկուսացնելու առումով։ Վարակի օջախներում էլ կատարվում են ախտահանման աշխատանքներ։ Ինչ վերաբերում է սահմանային անցակետերում վարակի դեմ իրականացվող կանխարգելիչ աշխատանքներին, տեսչության պետը նշեց, որ դրանք մեկնարկել են դեռևս մարտ ամսից։ Սկզբնական փուլում Աղավնո, Խնձորեսկ, Խարխափուտ հսկիչ-անցագրային կետերում պարտադիր ջերմաչափվել են Հայաստանից Արցախ մուտք գործած անձինք« իսկ կլինիկական ախտանշաններ ունեցողները՝ մեկուսացվել։ Հունիսի կեսից Արցախ մուտք գործողները պարտադիր պետք է արագ թեստ հանձնեին, իսկ արդեն հուլիսի 10-ից հսկիչ-անցագրային կետերում իրականցվում է նմուշառում ՊՇՌ (պոլիմերազային շղթայական ռեակցիա) մեթոդով հետազոտության համար։ ԱՀ առողջապահության նախարարության համաճարակաբանության և հիգիենայի կենտրոնի մասնագետները գործուղվել էին Շահումյանի և Քաշաթաղի շրջանների Նոր Խարխափուտի և Աղավնոյի սահմանային բժշկասանիտարական հսկիչ կետեր և տեղի բուժանձնակազմին ցուցաբերել մեթոդական օգնություն: Վերոնշյալ անցակետերում մասնագետներն Արցախ մուտք գործող քաղաքացիների քիթըմպանից ու բերանի խոռոչից վերցված քսուկներն ուղարկվում են ԱՀ ԱՆ Համաճարակաբանության և հիգիենայի կենտրոն` ՊՇՌ մեթոդով լաբորատոր հետազոտություն իրականացնելու համար: Օ. Հարությունյանի խոսքով՝ վարակի տարածումը կանխարգելող աշխատանքները կկրեն շարունակական բնույթ, պարզապես քաղաքացիներն էլ իրենց հերթին պարտավոր են պահպանել հիգիենայի տարրական կանոնները, լինեն ուշադիր ու պատասխանատու համավարակի դժվարին պայմաններում։
Իսկ ՀՀ-ում հուլիսի 17-ի ժամը 11:00-ի դրությամբ հաստատվել է կորոնավիրուսային հիվանդության 442 նոր և ընհանուր 34001 դեպք։ Ապաքինվել է 22492 հիվանդ, մահացել՝ 620 մարդ: Կորոնավիրուսային հիվանդությամբ ներկայումս բուժում է ստանում 10692 քաղաքացի: ՀՀ առողջապահության նախարարության կայքէջի փոխանցմամբ՝ ընդհանուր առմամբ կատարվել է 143114 թեստավորում: Կորոնավիրուսային հիվանդությունից վերջին օրն առողջացել է 561 մարդ, ցավոք« գրանցվել մահվան ևս 13 դեպք։ Մահացածները եղել են 49- 84 տարեկան։ Նրանք ունեցել են ուղեկցող քրոնիկ հիվանդություններ։ Նախորդ օրն արձանագրվել է մահվան 8 դեպք, երբ հիվանդների մոտ հաստատվել է կորոնավիրուսային վարակ, սակայն մահը վրա է հասել այլ հիվանդության պատճառով: Այդպիսի դեպքերի ընդհանուր թիվը 197 է:
Նշենք, որ աշխարհում հուլիսի 17-ի տվյալներով՝ COVID-19-ով հաստատվել է շուրջ 13 809 681 դեպք։ Նոր տիպի կորոնավիրուսի հետազոտական կենտրոնների տվյալներով՝ աշխարհում վարակից մահացել է 589 990 հիվանդ, ապաքինվել՝ 8 285 924-ը։ Վարակվածության ցուցանիշով առաջին տեղում շարունակում է մնալ Միացյալ Նահանգները` հաստատված 3 576 430 դեպքով և մահվան՝ 138 359 ելքով։ Երկրորդ տեղում Բրազիլիան է, որտեղ գրանցվել է 2 012 151 վարակակիր, մահացել՝ 76 688 հիվանդ, իսկ երրորդը՝ Հնդկաստանը՝ 1 003 832 դեպքով ու մահվան՝ 25 602 ելքով։ Այնուհետև հաջորդում են Ռուսաստանը՝ գրանցված 751 612 վարակակրով (11 920 մահ), Պերուն՝ 341 586 դեպք (12 615 մահ), Հարավային Աֆրիկայի Հանրապետությունը՝ 324 221 (4 669 մահ), Մեքսիկան՝ 324 041 (37 574 մահ), Չիլին` 323 698 վարակակրով (7 290 մահ):
Իսկ Վրաստանում վերջին մեկ օրվա ընթացքում գրանցվել է COVID-19 վարակի 4 նոր և ընդհանուր 1010 դեպք: Այս երկրում վարակից ապաքինվել է 885 հիվանդ, մահացել՝ 15-ը:
COVID-19 վիրուսը տարածվել է աշխարհի 213 երկրում և համավարակը դեռևս մոլեգնում է՝ ժամառժամ գրանցելով վարակվածության նորանոր դեպքեր։ Առողջապահության ոլորտի պատասխանատուները կրկին կոչ են անում լինել զգոն, պահպանել վարակի տարածումը կանխարգելող միջոցները։