ԱՇԽԱՏԱՆՔՆԵՐ ԿԱՏԱՐՎՈՒՄ ԵՆ, ԲԱՅՑ ԽՆԴԻՐՆԵՐԸ ԴԵՌԵՎՍ ՇԱՏ ԵՆ
Արմինե ԴԱՆԻԵԼՅԱՆ
ք. Մարտունի
Ճարտար բնակավայրը 6-րդ տարին է՝ քաղաքի կարգավիճակ ունի։ Այն Արցախի Հանրապետության խոշորագույն համայնքներից է։ Մեր զրույցը Ճարտար համայնքի ղեկավար Վլադիկ Հովհաննիսյանի հետ կատարված ու ընթացիկ աշխատանքների և համայնքի խնդիրների շուրջ էր։
Ճարտարում գործում է 5 դպրոց՝ 660 աշակերտով, 187 ուսուցչով։ Դպրոցներից մեկը միջնակարգ հոսքային է։ Ճարտարում գործում է Սևակ Ղուկասյանի անվան մարզամշակութային պալատ, 2 մանկապարտեզ, արվեստի դպրոց, հիվանդանոց, Արցախկապի հենակետ, ՙՂարաբաղ կարպետ՚ ՓԲԸ մասնաճյուղ, ՙԱրցախփոստ՚ ՓԲԸ բաժանմունք, ՙՎարանդաշին՚ ՓԲԸ Ճարտարի տեղամաս։
Համայնքում օրվա դրությամբ հաշվառված է 1143 ընտանիք՝ 4350 բնակչով։ Առկա է նախադպրոցական տարիքի 316, մինչև 14 տարեկան՝ 748 երեխա։
Զբաղվածության խնդիրը լուծում են համայնքի հիմնարկ-ձեռնարկությունները, ՊԲ-ը և գյուղատնտեսությունը։
Համայնքում զարգացած է անասնապահությունը, վկան՝ տարեցտարի ավելացող ֆերմերային տնտեսությունները։
Ճարտարի բնակչությունն ապահովված է խմելու ջրով, բացի Վերին Ղուզե Ճարտար թաղամասից։ Ջուրը բնակչությանը մատակարարվում է գրաֆիկով։ Համայնքի ջրային համակարգը կառուցվել է 70-80-ական թվականներին։ 2015թ. կատարվել են համակարգի նորացման նախագծման աշխատանքներ, կազմվել է նախահաշիվ՝ գրեթե երկու միլիարդ դրամ արժողությամբ։ Ճարտարում կա 8 արտեզյան ջրհոր, 11 աղբյուր։ Նախագահ Արայիկ Հարությունյանի և ՙՖերզիտ՚ ՍՊԸ տնօրեն Արթուր Խաչատրյանի բարեգործությամբ՝ Գյունե Վերին թաղամասում կառուցվել է ջրամատակարարման համակարգ։
Համայնքը, բացի Վերին Ղուզե թաղամասից, գազաֆիկացված է։ Ապահովված է բջջային հեռախոսակապով, համացանցով։ Առկա է 3 հանդիսությունների տուն և 56 խանութ։
Անցած տարում Հայկական գյուղերի զարգացման հիմնադրամի կողմից փոխվել է հ.1 միջնակարգ հոսքային դպրոցի մարզադահլիճի հատակը, համայնքի Սուրբ Վարդան եկեղեցու հենապատը, գումարներ են տրամադրվել բազմաֆունկցիոնալ մարզադաշտի կառուցման և կառուցվող բազմաբնակարան շենքի հարդարման աշխատանքների համար։ ՙՂարաբաղ Տելեկոմ՚ ՓԲԸ բաժանմունքի կողմից համայնքապետարանին հատկացրած գումարային նվիրատվությամբ համայնքում տեղադրվել է 95 փողոցային լուսավորման սարք, 5 ավտոմատ անջատիչ, 12 հենասյուն։ ԱՀ կառավարության որոշմամբ հաստատված՝ Ճարտարի անասնաբուծության կանոնակարգման և արոտների կառավարման ծրագրի շրջանակներում վերանորոգվել է 11 աղբյուր, միջդաշտային ճանապարհներն առանձնացվել են փշալարերով։ Պետական միջոցներով վերանորոգվել են զոհված 4 ազատամարտիկի ընտանիքների տները, մեկ բնակչի հրդեհված տան դիմաց պետության կողմից գնվել է տուն, համայնքի 28 բնակչի /զոհված ազատամարտիկների, բազմազավակ, հաշմանդամ, սոցիալապես անապահով ընտանիք/ հատկացվել է շինանյութ։
Համայնքում խնդիր է աղբահանության վիճակը, ինչն ունի օբյեկտիվ և սուբյեկտիվ պատճառներ։ Ճանապարհների լայնությունները թույլ չեն տալիս բոլոր տեղերում աղբարկղեր տեղադրել։ Տեղադրված է 50 աղբաման։
Աղբահանության ոչ պատշաճ կատարման սուբյեկտիվ պատճառ նշվեց այն, որ համայնքում աղբահանությունը սկսվել է իրականացվել 3 տարի առաջ և բնակչության մոտ չի ձևավորվել աղբահանության իրականացման մշակույթ։
2019թ. ձեռք է բերվել ՄԱԶ մակնիշի աղբահավաք մեքենա։
Խնդիր է նաև ջրահեռացման հարցը։ Համայնքը չունի ջրահեռացման համակարգ։
Սկսված է Ճարտար-Ներքին Ճարտար ճանապարհի ասֆալտապատման աշխատանքը, շարունակվում է բազմաբնակարան շենքերի ներսի հարդարումը, ավարտվել է Ղուզե Վերին թաղամասից Ներքին թաղամաս տանող ճանապարհի բարեկարգումը։
Զրույցի վերջում Ճարտարի քաղաքապետ Վ.Հովհաննիսյանը շեշտեց, որ համայնքի բարեկեցության համար պատասխանատու է յուրաքանչյուրը: