ԽԱՉՄԱՉ. ԶԱՐԳԱՑՈՂ ՀԱՄԱՅՆՔ
Անահիտ ՊԵՏՐՈՍՅԱՆ
Շրջկենտրոն Ասկերանից՝ 40 կմ, իսկ մայրաքաղաք Ստեփանակերտից 25 կմ հեռավորության վրա գտնվող Խաչմաչ գյուղը գտնվում է հանրապետության հարավ-արևելյան հատվածում։ Լեռնային է, ունի 1169 հա վարչական տարածք։ Բնակչության թվաքանակը 247 է` 52 տնտեսությամբ։ 2019 թվականին Խաչմաչում ծնվել է 6 երեխա, ընթացիկ տարում գրանցվել է 3 ծնունդ։
Ինչպես նշում է համայնքի երկարամյա ղեկավար Ռաֆայել Գրիգորյանը՝ բնակչության 80 տոկոսից ավելին զբաղմունք ունի։ Հիմնականում զբաղված են գյուղատնտեսությամբ: Իսկ երիտասարդներն աշխատում են տարբեր վայրերում, ծառայում ՊԲ-ում։ Տրանսպորտային խնդիր համայնքը չունի։ Գյուղում խիստ կարիքավոր ընտանիքներ չկան։ Բոլորն էլ աշխատում են՝ արդար քրտինքով վաստակելով օրվա հացը։
-Խաչմաչն աճող և զարգացող գյուղ է։ Այն ապահովված է բնական գազով, էլէկտրաէներգիայով, հասանելի է համացանցը։ Գործում է միջնակարգ դպրոց, որտեղ սովորում է 39 աշակերտ, ունենք նախադպրոցական տարիքի 32 երեխա։ 2015 թվականին ՙՀայաստան՚ համահայկական հիմնադրամի և ԱՀ կառավարության համաֆինանսավորմամբ կառուցվել է համայնքային կենտրոն, որտեղ տեղակայված են համայնքապետարանը, բուժկետը, գրադարանն ու մշակույթի տունը՝ 150- տեղանոց դահլիճով։ Գյուղում բավականին աշխատանքներ իրականացվում են ՙԽաչմաչ՚ հիմնադրամի միջոցներով։ Այն ստեղծվել 2009 թվականին, որին հանգանակություն են անում գյուղից դուրս, բայց գյուղի հոգսերով ապրող խաչմաչցիները։ Հիմնադրամի միջոցներն ուղղվում են համայնքի ներքին խնդիրների լուծմանը։ 2019 թվականին հիմնադրամի միջոցներից մեկ միլիոն 188 հազար դրամ գումարի չափով գյուղում տարբեր աշխատանքներ են իրականացվել,- նշեց համայնքի ղեկավարը։
Բարերար Սեյրան Կարապետյանի միջոցներով գյուղում կառուցվել է մանկական խաղահրապարակ։ Տարիներ շարունակ Խաչմաչի երախտավոր զավակներ Սեյրան Կարապետյանի և Արայիկ Հարությունյանի անձնական միջոցներից գյուղում ծնված յուրաքանչյուր երեխայի տրամադրվում էր 2000-ական ԱՄՆ դոլարին համարժեք դրամ։ Վերջին տարիներին այդ վեհ առաքելությունն իրականացնում է Նորայր Հարությունյանը՝ տրամադրելով 1000-ական ԱՄՆ դոլարին համարժեք դրամ։ Համայնքի ղեկավարի խոսքով՝ իրականացվող բարեգործական ծրագրերը դրական մեծ ազդեցություն են ունենում գյուղի զարգացման և աճի դինամիկայի վրա։
-Գյուղն արցախյան որոշ բնակավայրերի նման հոգսաշատ կլիներ, եթե չլինեին արմատներով խաչմաչցի մեր երախտապարտ զավակները։ Բարեգործների իրականացրած ծրագրերը հույս ու հավատ են ներշնչում վաղվա օրվա հանդեպ և պարտավորեցնում համայնքի պատասխանատուներին գործել՝ ամեն ինչ հանուն խաչմաչեցու բարեկեցիկ ապագայի նշանաբանով։
Տեղեկացանք, որ համայնքային բյուջեն միշտ էլ գերակատարվում է։ 2019 թվականին այն կատարվել է 124 տոկոսով։ Խաչմաչցիները ըմբռնումով են մոտենում հարկերի և տուրքերի ժամանակին վճարմանը։
-Համայնքի վարչական տարածքի հողերից 361հա համայնքային սեփականության հողերն են, 190.5հա սեփականության իրավունքով տրամադրված է գյուղացիներին, վարելահողերը կազմում են 280հա։ Գյուղացիների հիմնական զբաղմունքը հողագործությունն ու անասնապահությունն է։ Դեռևս շարունակվում են բերքահավաքի աշխատանքները, սակայն մեծ ակնկալիքներ չունենք, քանի որ գարնանացանը երաշտի պատճառով տապալված է, իսկ ոռոգման ջուր ընդհանրապես չունենք,- ասում է Ռ. Գրիգորյանը՝ ավելացնելով, որ բերքահավաք մեքենաների պակաս համայնքը չունի։
Չնայած ջրային ներքին ցանցը տարիներ առաջ ամբողջությամբ փոխվել է ՙՍեդրիկ Մարտեն՚ ֆրանսիական բարեգործական հիմնադրամի միջոցներով և տեղադրված են ջրաչափեր, այնուամենայնիվ, ջրի պաշարների պակաս այս տարի շատ է զգացվում։ Ներկայում գյուղում առաջնահերթ խնդիր է համարվում խմելու ջուրը։ Փողոցների լուսավորության, հանդիսությունների տան վերանորոգման հարցերը ևս մտահոգիչ են։
Գյուղի դպրոցական շենքը կառուցվել է նախորդ դարի սկզբին։ Փոքր շենք է, մասնակի վերանորոգված։ Առայժմ բավարարում է նորմալ ուսուցում կազմակերպելու համար: Համայնքի ղեկավարի գնահատմամբ՝ առաջիկայում նոր դպրոցական շենք ունենալու խնդիր կառաջանա։
-Համայնք-դպրոց կապը գտնվում է բարձր հիմքերի վրա, և բոլոր նախաձեռնություններում մեր գլխավոր աջակիցը դպրոցն է։ Խաչմաչցիներն աշխատասեր ժողովուրդ են, համախմբված և պատասխանատու։ Ուրախությամբ եմ նշում, որ գյուղից արտահոսք չկա, բնակիչների զգալի մասը երիտասարդներ են, և միահամուռ ուժերով կարողանում ենք գյուղում դրական տեղաշարժեր արձանագրել։ Տոն և հիշատակի օրերին կազմակերպում ենք շաբաթօրյակներ, սանմաքրման աշխատանքներ՝ հուշարձանների և աղբյուրների շրջակայքներում,- ասում է համայնքի ղեկավարը։
Հյուսիս-հարավ մայրուղուց 1.5կմ հեռավարության վրա գտնվող գյուղում արտադրանքի իրացման խնդիր չկա։ Տեղական արտադրանքը հիմնականում սպառվում է մայրաքաղաքի շուկայում։
Գյուղի գործող Սբ. Ստեփանոս եկեղեցում (1651թ.) ամեն կիրակի Սուրբ պատարագ է մատուցվում։ Այստեղ նաև երգչախումբ է գործում։ Եկեղեցին և հարակից տարածքը վերանորոգվել ու բարեկարգվել է բարերար Սեյրան Կարապետյանի միջոցներով։
-Երախտապարտ ենք մեր բոլոր բարերարներին։ Մեր մաղթանքն ու ցանկությունը մեկն է՝ կայունություն և խաղաղություն ամբողջ աշխարհին և մեր հարազատ երկրին՝ Արցախին։ Բոլորիս ծրագրերը ձախողած համավարակի շուտափույթ հաղթահարում եմ մաղթում։ Այն ևս մեկ փորձություն է մեզ համար, որը պետք է մեր կարգապահությամբ հաղթահարենք։ Համոզված եմ, որ առաջիկա տարիները Արցախի տարեգրության մեջ լինելու են հաջողությունների ամրագրման տարիներ,- ասաց Ռ. Գրիգորյանը։
Միայն հավատարիմ մնալով հայրերի պատգամին՝ կշենացնենք երկիրը և հզոր ու հարուստ ժառանգություն կթողնենք մեր սերունդներին։