Ամփոփվեցին երիտասարդական ծրագրերի մրցույթի արդյունքները
Սրբուհի Վանյան
ԱՀ ռազմահայրենասիրության, երիտասարդության, սպորտի և զբոսաշրջության (ՌԵՍԶ) նախարարությունը պետական երիտասարդական քաղաքականության հայեցակարգում ամրագրված դրույթները հաշվի առնելով, հայտարարել էր երիտասարդական ծրագրերի մրցույթ ոչ ֆորմալ կրթության, ձեռնարկատիրության զարգացման- զբաղվածության, ընտանիքի ինստիտուտի ամրապնդման ու ժողովրդագրության, հոգևոր-մշակութային, ռազմահայրենասիրական դաստիարակության, երիտասարդների ժամանցի կազմակերպման, հասարակությանը՝ խոցելի խմբերի ինտեգրման, կամավորական շարժման զարգացման, պետական երիտասարդական ծրագրերին երիտասարդների տեղեկացվածության բարձրացման թեմաներով: Նշենք, որ հայեցակարգն ընդունվել է 2015 թվականին: Նախատեսվում է, որ 2021թվականին նախարարությունը շրջանառության մեջ կդնի նոր հայեցակարգ:
Սեպտեմբերի 17-ին ԱՀ կառավարության շենքում քննարկվել և ամփոփվել են պետական վերոնշյալ ծրագրերի արդյունքները:
Նախարարության երիտասարդության վարչության պետ Դավիթ Ղուկասյանը լրագրողների հետ զրույցում ասել է, որ արդյունքներն ամփոփելիս առաջնահերթությունը կտրվի շրջանային ծրագրերին: Նրա տեղեկատվությամբ, Արցախում պետական երիտասարդական քաղաքականությանն ուղղված ծրագրերը պետբյուջեի միջոցներով ֆինանսավորվում են 2009 թվականից՝ տարեկան չորս անգամ՝ ամեն եռամսյակ:
Այս մրցույթին մասնակցության հայտ է ներկայացրել 9 կազմակերպություն՝ 12 ծրագիրով: Պանդեմիայի հետ կապված առաջին և երկրորդ եռամսյակների ծրագրերը, Դ. Ղուկասյանի խոսքով, չեն իրականացվել, և այդ եռամսյակների համար նախատեսված գումարները՝ 4 մլն դրամ գումարի չափով, տեղափոխվել են երրորդ եռամսյակ:
Ծրագրերի ամփոփմանը մասնակցել են 13 փորձագետներ, որոնք էլ որոշում են ընդունել թե որ ծրագրերն են ֆինանսավորվելու և ինչ չափով: Քննարկումների արդյունքների հիման վրա ֆինանսական աջակցություն Է տրամադրվել 8 հայտատուի:
Փորձագիտական հանձնաժողովի անդամ Վարուժան Առաքելյանը լրագրողներին ասել է, որ իրենց հիմնական գործունեությունը կապված է երիտասարդական ծրագրերի քննարկման, ընդունման և ֆինանսավորման հետ:
«Ներկայացված ծրագրերն ընդգրկում են երիտասարդների առօրյային, համախմբմանը վերաբերող հարցեր,-ասել է Վ. Առաքելյանը:- Այդ ծրագրերի իրականացման վերաբերյալ փորձագիտական խմբի կողմից տրվում են նաև խորհուրդներ» :
«Հաղթանակած սերունդ» երիտասարդական հասարակական կազմակերպության նախագահ Գևորգ Միրզոյանը, ում ծրագիրը հավանության է արժանացել փորձագետների կողմից, տեղեկացրել է, որ ծրագիրն ուղղված է սահմանամերձ գյուղերում ապրող երիտասարդների կյանքի աշխուժացմանը, մշակութաժամանցային ծրագրերի հասանելիությանը, գեղագիտական ճաշակի բարձրացմանը: