ՍՏԵՓԱՆԱԿԵՐՏԻ ՎԵՐԱՆՎԱՆՄԱՆ ՏՈՆԸ ԿՆՇՎԻ ՀԱՄԵՍՏ
Էմմա ԲԱԼԱՅԱՆ
Ավանդույթի համաձայն, սեպտեմբերի 4-րդ շաբաթ օրը տոնվում է Ստեփանակերտի վերանվանման օրը, որն այս տարի կնշվի սեպտեմբերի 26-ին: Չնայած համաճարակի հետևանքով ստեղծված իրավիճակին` Ստեփանակերտի քաղաքապետ Դավիթ Սարգսյանի որոշմամբ ստեղծվել է Ստեփանակերտի օրվան նվիրված տոնական միջոցառումների կազմակերպման և անցկացման քաղաքային հանձնաժողով, որի նախագահն է քաղաքապետ Դ. Սարգսյանը, համակարգողը՝ փոխքաղաքապետ Սուրեն ԹԱՄՐԱԶՅԱՆԸ։ Վերջինիցս էլ տեղեկացանք նախատեսված միջոցառումների մասին:
Ըստ Ս. Թամրազյանի՝ ծրագրի կազմումը կապված էր արտակարգ դրության ավարտման կամ երկարաձգման որոշումից: Քանի որ այն երկարաձգվել է, միջոցառումների ցանկը սահմանափակվել է, ուստի և անցկացվելու է ըստ համապատասխան իրավիճակի: Միջոցառումները կանցկացվեն առանց մարդկային կուտակումների` քաղաքացիներին հաղորդելով տոնական տրամադրություն: Կզարդարվեն փողոցները, պուրակները՝ հատկապես Ստ. Շահումյանի անվան օղակաձև պուրակը, ներքաղաքային երթուղիները կզարդարվեն գույնզգույն փուչիկներով, կհնչի փողային նվագախմբի զվարթ երաժշտություն…
Ս. Թամրազյանի տեղեկատվությամբ՝ կարևորելով մեծն Կոմիտասի ծննդյան օրը, որը նշվում է սեպտեմբերին և փաստորեն համընկնում է մայրաքաղաքի վերանվանման տոնակատարությանը, որոշվեց սեպտեմբերի 26-ին« ժամը 12-ին« Կոմիտասի անվան երաժշտական դպրոցի բակում աշակերտների ուժերով կազմակերպել համերգ, որի ծրագրի առաջին մասը կնվիրվի Կոմիտասին և կազմված կլինի նրա ստեղծագործություններից, 2-րդ մասն էլ՝ Ստեփանակերտի վերանվանման 97-ամյակին: Սեպտեմբերի 25-ին քաղաքապետարանի առջև կազմակերպվելու է բացօդյա նկարչական մրցույթ, որին քաղաքի բոլոր դպրոցներից մասնակցելու են լավագույն նկարող մեկ-երկու աշակերտներ: 1-ին դպրոցի մարզահրապարակում կկազմակերպվի մինի-ֆուտբոլ՝ տարրական դասարանների միջև, դարսի մրցույթ, քաղաքային շախմատի դպրոցում կմրցեն փոքրիկ շախմատիստները: Կանցկացվի նաև ամենամյա ՙՍտեղծագործում են մեր աշակերտները՚ շարադրությունների մրցույթ՝ նվիրված օրվա խորհրդին, որը կանցկացվի առցանց:
Ըստ ավանդույթի` սեպտեմբերի 25-ին քաղաքապետարանի նիստերի դահլիճում տեղի կունենա պարգևատրման արարողություն, որի ժամանակ պատվոգրերով և թանկարժեք նվերներով կպարգևատրվեն ինչպես քաղաքապետարանի ենթակայության տակ գտնվող հիմնարկ-ձեռնարկությունների լավագույն աշխատողները, այնպես էլ քաղաքապետարանի հետ սերտ համագործակցության մեջ գտնվող պետական հաստատությունների մասնագետները, ովքեր աջակցել են քաղաքապետարանի աշխատանքներին:
Սուրեն Թամրազյանի հաստատմամբ՝ բոլոր միջոցառումները կանցկացվեն արտակարգ իրավիճակի կանոնների պահպանմամբ: Միջոցառումների անցկացման վայրերում կհերթապահեն շտապօգնության բժիշկները:
;