ՙՋՐՄՈՒՂ-ԿՈՅՈՒՂԻ՚ ԸՆԿԵՐՈՒԹՅՈՒՆԸ ՁԳՏՈՒՄ Է ԿԱՆԽԱՐԳԵԼԵԼ ՋՐԻ ՀՆԱՐԱՎՈՐ ՍԱԿԱՎՈՒԹՅՈՒՆԸ
Էմմա ԲԱԼԱՅԱՆ
Ամռան տապ օրերի շունչն արդեն զգացվում է և դեռ զգացնել կտա: Վերջին տարիներին դա զուգորդվում էր շուրջօրյա ջրամատակարարման ընդհատումներով: Մտահոգությունս ինձ տարավ դեպի ՙՋրմուղ-կոյուղի՚ ՓԲ ընկերություն` տնօրեն Գագիկ Պողոսյանի հետ հանդիպման, ում հետ պարզեցինք մի շարք մտահոգիչ հարցեր:
-Պարոն Պողոսյան, որքանո՞վ է ընկերությունը պատրաստ հաղթահարելու վերջին տարիներին ամռանն առաջ եկող ջրամատակարարման խնդիրները: Կա՞ բավականաչափ ջրային ռեսուրս:
-Այսօրվա դրությամբ ջրի պաշարները բավարար են, սակայն ըստ մեր հաշվարկների, հնարավոր է օգոստոսին և սեպտեմբերին ջրի պակաս ունենանք: Խնդրի մասին զեկուցել ենք իշխանություններին, արվել որոշ առաջարկներ: Մասնավորապես՝ ծրագրված էր Պատարա գետից խողովակներով ջուր բերել մայրաքաղաք: Դա, անշուշտ, ծախսատար ծրագիր է, որը ստեղծված իրավիճակում անհնար է իրագործել: Քանի որ Հովսեփավանում կան արտեզյան ջրեր, առաջարկեցինք պոմպերով դա հասցնել մինչև նշված խաչմերուկը, այդտեղից խողովակներով բերել մինչև Այգեստան, որտեղից վաղուց գործող խողովակաշարով ջուրը կհասնի քաղաք: Դա ողջամիտ առաջարկ է, քանի որ ծախսերը մի քանի անգամ կրճատվում են, իսկ երբ կյանքի կոչվի նախատեսված ծրագիրը, ամբողջի մի մասը գործող կլինի և կխնայվեն ծախսերը:
-Ի՞նչ կասեք ջրհորերի տարբերակի մասով:
-Մայրաքաղաքում արդեն գործում է 18 ջրհոր, դրանց ավելացումը դառնում է ոչ արդյունավետ, քանի որ ընկերությունն այլևս ի վիճակի չի լինի փակելու էլեկտրաէներգիայի ծախսերը:
-Ձեր առաջարկներն ընդունվե՞լ են, աշխատանքները սկսվե՞լ են:
-Առաջարկները քննարկման փուլում են: Ցուցումներ դեռևս չենք ստացել:
-Զտիչ կայանները վնասվե՞լ են պատերազմից:
-2 զտիչ կայաններն էլ մասնակի վնասվել են՝ ջարդվել են ապակիները, վնասվել են պատուհանները, տանիքը: Պատերազմից հետո դրանք արագ նորոգվել են, այժմ աշխատում են ամբողջ հզորությամբ: Ջրի մաքրման լիարժեք աշխատանքները կատարվում են զտիչ կայաններում:
-Պատերազմի ժամանակ ընկերության աշխատանքը կարելի է բարձր գնահատել, քանի որ շուրջօրյա ջրամատակարարումը գրեթե չի ընդհատվել:
-Ընդհանրապես չի ընդհատվել: Եղել են վթարներ, որոնք կարճ ժամանակում վերացվել են: Նորոգման ամենաերկար աշխատանքները տևել են, երբ ռմբակոծության հետևանքով լուրջ վնասվել են Վ. Սարգսյան փողոցի որոշ շենքերի տանիքները և ջրախողովակները, որոնք անցնում էին տանիքի տակով: Այդ աշխատանքները տևել են 2 օր, 3-րդ օրը ջրամատակարարումը վերականգնվել էր՝ չնայած տարհանված բնակիչները դեռ չէին վերադարձել: Նման ցուցանիշով ենք աշխատել փոքրաթիվ աշխատակիցներով՝ մոտ 190 աշխատակիցներից 45 կանայք էին, 65 տղամարդ էլ մեկնել էր հայրենիքը պաշտպանելու, մի մասն էլ ծեր մարդիկ էին: Մի խոսքով՝ 15 աշխատակիցներով՝ իմ ղեկավարությամբ, ապահովում էինք քաղաքի ջրամատակարարումը: Ի դեպ, նշեմ, որ զտիչ կայաններում որոշ կանայք շարունակում էին հերթափոխով աշխատել:
-Պատերազմից հետո վթարների քանակը շատացե՞լ է:
-Վթարների քանակը էական փոփոխություն չի կրել, բայց ավելացել են կոյուղու հետ կապված խցանումները, ինչը բացատրվում է նրանով, որ քաղաքի բնակչությունն ավելացել է մոտ 20 000-ով: Երեք բրիգադով, որոնցից մեկն աշխատում է գիշերային հերթափոխով, արագ վերացնում ենք առաջացած խցանումները:
-Իսկ ի՞նչ աշխատանքներ են կատարվում՝ կապված ստորգետնյա ցանցերի նախագծերի ճշտման, պահպանման հետ:
-2013թ. ընկերությունում բացվել է տեխնիկական բաժին, որի առջև դրված էր ստորգետնյա ցանցերի, գծագրերի ճշտման խնդիրը: Այս տարիների ընթացքում այդ առումով մեծ աշխատանք է կատարվել, բայց, հասկանալի է՝ դա գործընթաց է, որը պահանջում է համագործակցություն ԱՀ քաղաքաշինության նախարարության, կապալառու կազմակերպությունների հետ: Մեր ինժեներ-նախագծողները կատարում են կոմունիկացիաների փաստացի գծագրեր, քանի որ շինարարության ժամանակ հաճախ խախտվում են նախագծերը:
Տարբեր խնդիրների ծագման հետևանքով պատահում է, որ ընկերության կողմից էլ փոփոխություններ են կատարվում, որոնք նույնպես ֆիքսվում են նշված բաժնի կողմից: Դա ահռելի և ժամանակատար գործ է: Այսօրվա դրությամբ կատարվել է այդ ծավալուն աշխատանքի գրեթե կեսը: Այդ աշխատանքների վերջնական արդյունքում կունենանք ստորգետնյա ՙքաղաքի՚ լիարժեք պատկերը:
-Տեղեկացված ենք, որ ընկերությունը ստեղծել է կայքէջ: Ո՞րն է նպատակը և որքանո՞վ է այն արդյունավետ:
-Նշեմ, որ 2019թ. ընկերության համար ստեղծվել է էլեկտրոնային կայքէջ, որի միջոցով բնակիչներին տեղեկացնում ենք նորությունների մասին: Հաշվիչների ցուցմունքների գրանցման աշխատանքներն ավելի թափանցիկ դարձնելու նպատակով ընկերությունը կայքէջի միջոցով հայտարարություն է տարածել՝ խնդրելով ջրաչափի նկարը հնարավորության դեպքում ուղարկել ՙՋրմուղ-կոյուղի՚ Viber ծրագրի +37497252347 համարին, կամ զանգահարել 047961858 հեռախոսահամարով, ինչը կթեթևացնի հսկիչների աշխատանքը, իսկ լավագույն դեպքում՝ նրանց թիվը կհասցնի նվազագույնի: Արձագանքման դեպքում էլ՝ հսկիչները չեն անհանգստացնի բնակչությանը, որոնք հաճախակի դժգոհ են լինում հսկիչների այցերից, քանի որ հաշվիչները մեծամասամբ տեղադրված են անհարմար տեղերում: Սակայն բնակիչների մի մասն անուշադիր է, մյուս մասը, երևի, լավ չի պատկերացնում ինչ է պետք անել և սխալ ժամանակահատվածում է ուղարկում տվյալները: Որոշել ենք օրերս հեռուստատեսությամբ հանդես գալ ազդակային հոլովակով, որտեղ ակնառու կցուցադրվի, թե ինչ է պահանջվում բաժանորդից և որ ժամկետում: Հուսով ենք` դա կօգնի մեր ընդհանուր գործին:
-Նոր մոտեցումներ նախատեսվո՞ւմ են:
-Իմ տնօրինության ժամանակ փոփոխություն է կատարվել միայն վարձավճարային բաժնում. եթե նախկինում ջրավարձերի հավաքագրումը կատարվում էր մեկ ամիս ուշացած, այժմ տվյալ ամսվա վարձավճարը հավաքագրվում է հաջորդ ամսվա առաջին իսկ օրերից: Փոփոխություն է կատարվել նաև հաստիքացուցակում՝ որոշ հաստիքների աշխատավարձը բարձրացվել է: Այժմ քաղաքապետարանի աջակցությամբ աշխատանքներ են կատարվում անցնելու հեռակառավարման` ռացիաներով աշխատելու ձևաչափին, քանի որ բջջային կապը լավ չի գործում և առավել ազդում է աշխատակիցների բյուջեի վրա:
Նշենք, որ Գ. Պողոսյանը տնօրեն է նշանակվել 2021թ. հունվարին, մինչ այդ զբաղեցնում էր ընկերության գլխավոր ինժեների պաշտոնը: