ԹԱՂԱՎԱՐԴ. ԵՐԿՈՒ ԿԵՍ՝ ՄԵԿ ԱՄԲՈՂՋՈՒԹՅՈՒՆ
Կարինե ԴԱԴԱՄՅԱՆ
Թաղավարդ. երբեմնի ծաղկուն ու ապագային հավատով նայող գյուղն այսօր երկու կես է դարձել՝ մեկը հակառակորդի հսկողության տակ, մյուսը՝ կարոտով հեռուն նայող։
Համայնքի ղեկավար Օլեգ Հարությունյանի հետ մեր զրույցը գյուղի խնդիրների, մարդկանց ապրուստի մասին էր։ Դժվար է, բայց հողը ուժ է տալիս ու ամուր ձգում է տիրոջը, իսկ գյուղում ապրելու պայքարը գերբնական է թվում, երբ խորքից ես տեղեկանում պայմաններին և հնարավորություններին։ Հակառակորդի տեսադաշտում Թաղավարդն /Թաղավարդ Կալերը/ իր կռիվն է տանում՝ դարավոր պատմությունը շարունակելու համար կռիվը։
Թաղավարդ Կալերում պահի դրությամբ փաստացի բնակվում է 148 ընտանիք՝ 602 բնակչով։ Թաղավարդցիների վերադարձը շարունակվում է: Գյուղ են տեղափոխվել ևս 10 ընտանիք Թաղավարդից, 4 ընտանիք Հադրութից, երկու ընտանիք Ջիվանուց, երկու ընտանիք Հայաստանից։ Թշնամու կողմում է մնացել 190 տուն։ Թաղավարդի 140 ընտանիք՝ 520 բնակչով, առայժմ գյուղից դուրս է՝ 80 ընտանիք Ստեփանակերտում, 10 ընտանիք՝ Մարտունիում, 3 ընտանիք՝ Ճարտարում, 10 ընտանիք՝ Խնածախում, մնացածը՝ ՀՀ-ում, ՌԴ-ում։ Համայնքի ավագանու անդամները մշտական կապ են պահում բնակիչների հետ և հնարավորության սահմանում ձգտում օգնել։ Վերջերս նոր երկու ընտանիք ՌԴ-ից վերադարձել են։ Ամեն վերադարձ հույսի նոր շող է տեղի բնակիչների համար։
Գյուղում գործում է մեկ դպրոց, վարչական տարածքում՝ նաև Կարմիր շուկայի դպրոցը, որի ուսուցիչների, աշակերտների գերակշիռ մասը Թաղավարդից են։ Թաղավարդի դպրոցում 27 աշակերտ է սովորում՝ նախկին 52-ի փոխարեն, մոտ 50 ընտանիքի երեխաներ հաճախում են Կարմիր շուկայի դպրոց՝ հաշվի առնելով ավելի մոտ գտնվելու հանգամանքը։ Դպրոցական շենքը կոսմետիկ վերանորոգել են, շուտով կվերանորոգվի տանիքը։ Ամեն ինչ արվում է, որպեսզի կրթությանն ուղղված` բնականոն, բավարար աշխատանք տարվի։ Աշակերտների թիվը վերադարձողների շնորհիվ կավելանա. համոզված են։
Համայնքի հիմնական խնդիրը մնում է անվտանգությունը, բայց ամեն ինչ արվում է, որ բնակիչներին սպառնալիք չլինի։ Սա խոստանում են նաև տարածքում ծառայող և բարձրաստիճան ՊԲ սպաները։
Բնակարանների վերանորոգման ուղղությամբ ինտենսիվ աշխատանք է տարվում։ Սկզբից` զոհված, վիրավոր զինծառայողների ընտանիքների, հետո՝ համեմատաբար շատ վնասված բնակարաններն են վերանորոգում։ Գյուղի տների 90 տոկոսի պատուհանների ապակիները փոխել են։ Շինարարությունն իրականացնում է 6 շինարարական ընկերություն: Աշխատանքներում ներգրավված են նաև գյուղի բնակիչներ։ Հրետակոծությունից և ռմբակոծությունից 145 տուն էր վնասվել, 5-ը վառվել է, 3-ը՝ հիմնովին ավերվել։ Մեկ տան տանիքն արդեն փոխվել է, մնացել են ներքին հարդարման աշխատանքները, 2-ի նախագծանախահաշվային աշխատանքները կատարվել են, 5 ընտանիքի համար էլ` Թաղավարդի 140 ընտանիքների համար Կարմիր շուկայում հատկացված տարածքում նոր տուն կկառուցվի։
ՙ700հա գյուղատնտեսական նշանակության հող ուներ մինչ պատերազմը Թաղավարդ համայնքը, որից 600հա վարելահող, նաև 4հա խաղողի, 70հա պտղատու այգի լրիվությամբ գտնվում է հակառակորդի հսկողության տակ։ Չեզոք գոտու հետ 150հա հող է մնացել ընդամենը։ Գոնե եթե կարողանանք 100հա մշակել, էլի մի բան է։ 700հա անտառները, բոլոր եկեղեցիներն ու սրբավայրերը՝ ներառյալ գերեզմանոցը, նույնպես թշնամու ձեռքին են։ Միայն Չուրվիշ մատուռն է մնացել՝ ավերված վիճակում՚,- շարունակում է ներկայացնել համայնքի ղեկավարը։
Նրա խոսքով` 230 գլուխ խոշոր եղջերավոր անասուն ունի համայնքը՝ գոմեշ ու կով, 20 գլուխ ոչխար, 200 գլուխ խոզ, 5000 թև թռչուն: Մսուրային պահվածքով հնարավոր չէ անասնապահությամբ զբաղվել։ Խոտհարք, վարելահող չունեն։ Ձմռանն անասուններն ինչպես կպահեն՝ չգիտեն։ Փորձում են մեղվաբուծությամբ զբաղվել։ Ներկայացրել են մի քանի ծրագրեր՝ թռչնաբուծության, խոզաբուծության և մեղվաբուծության զարգացման համար։
Թաղավարդում արդեն լուծվել է ջրի խնդիրը։ Այսօր շուրջօրյա ջուր է ստանում համայնքը։ Ասֆալտապատվում և բարեկարգվում են գյուղ բերող ու համայնքային նշանակության ճանապարհներն ու փողոցները։
ՙՄեր սրբությունները, մեր գերեզմանոցը գտնվում են հակառակորդի հսկողության տակ, ինչը մեր մեծագույն ցավն է։ Գոնե այն կարողանայինք վերադարձնել՚,- ասում է Օ. Հարությունյանը։
Բայց թաղավարդցու մեջ հույսը միշտ արթուն է՝ մի օր գյուղն ազատագրված, բնակիչներին՝ գյուղում համախմբված տեսնելու հույսը։