ԱՐՑԱԽՑԻՆ ԱՆԿՈՏՐՈՒՄ ՈԳՈՎ ՄՆՈՒՄ Է ՆՈՒՅՆ ՄՇԱԿԸ
Նանիկ ԱՂԱՍՅԱՆ
Արցախյան երրորդ պատերազմից հետո Արցախի Հանրապետության կառավարության առաջնահերթություններից է տեղահանված բնակիչների բնակարանային, զբաղվածության, սոցիալ-կենցաղային պայմաններով ապահովումը։
Տեղահանված ընտանիքներին բնակարան է տրամադրվում ոչ միայն քաղաք Ստեփանակերտում, այլև Ասկերանի, Մարտունու, Մարտակերտի շրջաններում։ Մարտակերտի շրջանի Քոլատակ գյուղն, ի դեմս բարերար, արմատներով քոլատակցի Հայկ Մաղաքելյանի, տեղահանվածներին ևս ապահովում է նորակառույց բնակարաններով և տան համար անհրաժեշտ գույքով։ Այստեղ բնակվելու համար առաջնահերթություն է տրվում նաև զինծառայողների ընտանիքներին։ Ներկայում Քոլատակ գյուղն ունի վերաբնակեցված 12 ընտանիք՝ 19 ներկայացված հայտից։
Քոլատակի (ինչպես տեղացիներն են անվանում) Նոր թաղամասում ենք։ Այստեղ նախկինում տիրող լռությանը փոխարինել է մանուկների աղմուկը, իսկ մեծահասակների մոտ աշխատանքային եռուզեռ է… ՙՄեկ ամիս դեռ չկա, ինչ այս գյուղում ենք։ Ծրագիր ունենք մոտակայքում հողատարածք վերցնել` ապագայում հողագործությամբ զբաղվելու համար։ Եկած օրվանից աշխատում ենք։ Ինչպես նախկինում Նոր Մարաղայում էինք պատրաստվում, այսօր էլ այստեղ, նույն ոգով, պատրաստվում ենք ձմեռվան՚,-իր խոսքում նշում է այժմ Քոլատակի բնակչուհի Հասմիկ Բեգլարյանը։
Քոլատակում, վերաբնակվածների հավաստմամբ, ապահովված են մշտական տաք և սառը ջրով, էլեկտրաէներգիայով, համացանցով։ Միակ խնդիրը գյուղում գազամատակարարման բացակայությունն է, որի պակասն զգում են նաև քոլատակցիները։ Ընդհանուր առմամբ, գյուղի պայմանների, հատկապես քոլատակցիների մասին, բոլորն էլ գոհունակությամբ են արտահայտվում։
Բնակիչները, կարելի է ասել, արդեն իսկ ինտեգրված են գյուղին. ոմանք գյուղում արդեն աշխատանք ունեն, ոմանք ծրագիր ունեն սկսելու իրենց սեփական բիզնեսը, մյուսներն էլ զբաղվում են այգեգործությամբ, թռչնաբուծությամբ, իսկ բանջարաբոստանային կուլտուրաների մշակմամբ զբաղվում են գրեթե բոլորը։ ՙՊատերազմից կրած բոլոր արհավիրքներն անտեսելով՝ արցախցին իրեն բնորոշ կամքով՝ այսօր էլ ամուր է, արարող, միշտ անկոտրում ոգով մնում է նույն մշակը՝ կառչած իր հողին՚,- նշում է Սվետլանա Բաղրյանը։
Հնարավորություն ունեցանք զրուցելու վերաբնակիչների մի մասի հետ։ Նրանք բոլորը կարոտով և մեծ թախիծով էին հիշում իրենց բնակավայրերը։ Իսկ մեր այն հարցին, թե ՙի՞նչ են կորցրել, թողել իրենց նախկին բնակավայրերում՚` բոլորի պատասխանը մեկն էր. ՙՄեր էսչանք զոհերի քշտէն՝ վեշմին պէն՚։