ՙԳՆԱՃԻ ՎՐԱ ԱԶԴՈՂ ԳՈՐԾՈՆՆԵՐԸ՚ ԹԵՄԱՅՈՎ ԴԱՍԱԽՈՍՈՒԹՅՈՒՆ
Ալիսա ՍԱՐԳՍՅԱՆ
Շուշիի տեխնոլոգիական համալսարանի տնտեսագիտական բլոկի ուսանողների, ինչպես նաև՝ բուհի պրոֆեսորադասախոսական կազմի համար ՙԳնաճի վրա ազդող գործոնները՚ թեմայով դասախոսություն է կարդացել Երևանի պետական համալսարանի Նորարարության տնտեսագիտության ամբիոնի վարիչ, տնտեսագիտական գիտությունների դոկտոր, պրոֆեսոր Ա. Մարկոսյանը։
Դասախոսությանը ներկա են եղել բուհի հոգաբարձուների խորհրդի նախագահ, տ.գ.դ., պրոֆեսոր Հ. Թոքմաջյանը, պրոռեկտոր Ռ. Ավագյանը, Համահամալսարանական ինժեներական էկոնոմիկայի և ագրոբիզնեսի ամբիոնի վարիչի պաշտոնակատար Լ.Հարությունյանը։
Ա. Մարկոսյանն ունկնդիրներին ներկայացրել է, թե ինչ է գնաճը, դրա հիմնական պատճառների մանրամասն նկարագրությունը, թե ինչ ազդեցություն և հետևանքներ է ունենում այն բնակչության ապրելակերպի որակի վրա՝ զուգահեռականներ անցկացնելով ՀՀ-ի, ԱՀ-ի և տարբեր երկրների միջև։
Պրոֆեսորն անդրադարձել է այն հարցերին, թե ինչպես են հաշվարկում գնաճը և ինչպես կարելի է զսպել այն։ Խոսելով գնաճի վրա ազդող գործոններից և դրանց հետևանքով առաջացող խնդիրներից՝ Ա. Մարկոսյանն առաջարկել է նաև լուծման ուղիներ:
Ըստ բանախոսի` ներկայումս գնաճն ամենացավոտ և վտանգավոր գործընթացներից մեկն է, որը բացասաբար է ազդում տնտեսական համակարգի վրա. ՙՑանկացած երկրի տնտեսական զարգացման կայունությունը խաթարում է նաև գնաճի գործընթացը, ուստի պետք է հաշվի առնել տարածաշրջանային բաղադրիչը և ելնել տնտեսական զարգացման համար ռիսկերի հաշվեկշռից։ Հարցն այն է նաև, թե ինչպես պետք է խուսափել գնաճից։ Բարձր գնաճի պայմաններում դժվար է գործնական որոշումներ կայացնել, ավելի դժվար է երկարաժամկետ ներդրումներ կատարել: Ժամանակակից մարդը, ով ցանկանում է իրականացնել նմանատիպ ծրագրեր, պետք է տիրապետի ֆինանսական որոշակի նրբությունների՝ նախ ուսումնասիրի միջազգային փորձը և առաջ շարժվի համաշխարհային տնտեսության օրինաչափություններով, - նշել է իր խոսքում Ա. Մարկոսյանը։
Դասախոսությունն ավարտվել է թեմայի շուրջ մասնակիցների հարցադրումներով, որոնց պրոֆեսորը պատասխանել է հանգամանալից։